༢༠༠༩ ཕྱི་ཟླ་ ༡༠ ཚེས་ ༡༣ རེས་གཟའ་མིག་དམར།
༄༅། །ཕྱི་ལོ་ ༢༠༠༩ ཟླ་ ༡༠ ཚེས་ ༡༠ ཉིན་ནས་བཟུང་ཉིན་གསུམ་གྱི་རིང་རྡ་ཤོད་བོད་ཁྱིམ་སློབ་གྲྭ་དབུ་བརྙེས་ནས་ལོ་ ༢༥ འཁོར་བའི་དུས་དྲན་སྲུང་བརྩི་གཟབ་རྒྱས་ཞུས་ཡོད་པ།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩།༠༠ ཐོག་སྐུ་མགྲོན་གཙོ་བོ་བཀའ་ཁྲི་ཟམ་གདོང་རིན་པོ་ཆེ་མཆོག་གིས་དབུས་ཆོས་རིག་བཀའ་བློན་ཚེ་རིང་ཕུན་ཚོགས་མཆོག་དང་། ཤེས་རིག་དྲུང་ཆེ་གཡུ་ཐོག་ཀརྨ་དགེ་ལེགས་ལགས། དེ་བཞིན་རྣམ་རྒྱལ་གྲྭ་ཚང་དང་རིགས་ལམ་སློབ་གཉེར་ཁང་གི་དབུ་འཛིན། གནས་ཆུང་སྒྲ་དབྱངས་གླིང་གྲྭ་ཚང་དང་དགའ་གདོང་གསལ་འབྱེད་གླིང་གྲྭ་ཚང་གི་སྐུ་ཚབ། རྒྱུད་སྟོད་གྲྭ་ཚང་གི་སྐུ་ཚབ། ཕྱོགས་མཚུངས་སློབ་གྲྭ་ཁག་གི་སློབ་སྤྱི། སྡེ་ཚན་ཁག་གི་འགན་འཛིན། སློབ་ཕྲུག་གི་ཕ་མ་དང་མི་མང་བཅས་ལྷན་འཛོམས་ཀྱིས་ཐོག་མར་སློབ་གྲྭའི་རྩེད་ཐང་དུ་ཁང་ཚན་ཁག་བཞིའི་སློབ་ཕྲུག་ཉིས་བརྒྱ་ལྷག་ནས་གུས་འདུད་རུ་སྒྲིག་དང་འཕགས་བོད་གཉིས་ཀྱི་རྒྱལ་གླུ་བཏང་རྗེས་གྲོ་མ་འབྲས་བསིལ་ཕུལ། དེ་ནས་སློབ་སྤྱིས་འཚམས་འདྲི་དང་ལས་སྡོམ་སྙིང་བསྡུས་ཤིག་སྒྲོགས་སྦྱང་ཞུས་རྗེས་བོད་ཁྱིམ་སྤྱི་ཁྱབ་འགན་འཛིན་ནས་གཏམ་བཤད་དེ་རྗེས་སྐུ་མགྲོན་གཙོ་བོ་བཀའ་ཁྲི་མཆོག་གིས་གསུང་བཤད་གནང་གསལ། བོད་ཁྱིམ་སྤྱི་ཁྱབ་འགན་འཛིན། འདི་གའི་སློབ་སྤྱི་དང་དགེ་ལས། གཞན་ཡང་སྐུ་མགྲོན་རྣམས་པ། སློབ་གཉེར་བ་རྣམས་པ། ཕ་མས་མཚོན་པའི་སྐུ་མགྲོན་ཡོངས་སུ་རྫོགས་པ་ལ་རྡ་ཤོད་བོད་ཁྱིམ་བཙུགས་ནས་ལོ་ཉེར་ལྔ་འཁོར་བའི་དུས་དྲན་ཉིན་མོ་འདིའི་ཐོག་ལ་ཚང་མར་བཙན་བྱོལ་བོད་གཞུང་བཀའ་ཤག་དང་ང་རང་སྒེར་ནས། སྙིང་ནས་དགའ་སེམས་འཁོལ་བའི་ཐོག་ནས་མཚམས་འདྲི་དང་བཀྲ་ཤིས་བདེ་ལེགས་ཞུ་གི་ཡོད། རྡ་ཤོད་བོད་ཁྱིམ་སློབ་གྲྭ་འདི་བཙན་བྱོལ་བོད་མིའི་སྤྱི་ཚོགས་ནང་སློབ་གྲྭ་མང་པོའི་ནང་ནས་འཛིན་སྐྱོང་དང་ཤེས་ཡོན་འབུར་དུ་ཐོན་པའི་སློབ་གྲྭ་ཞིག་ལ་ངོས་འཛིན་ཞུ་གི་ཡོད། བཙན་བྱོལ་སྤྱི་ཚོགས་ནང་རང་སོ་སོའི་འཚོ་བའི་འདུ་དགོས་རང་མགོ་ཐོན་པ་ཡོད་མཁན་རྣམས་ནས་གཞན་རྟེན་གྱི་བསམ་བློ་དོར་ནས་རང་ཉིད་ཀྱིས་ཕྲུ་གུའི་སློབ་སྦྱོང་གི་འགན་དང་འགྲོ་གྲོན་སོ་སོ་རང་ཉིད་ནས་གཏོང་རྒྱུའི་བསམ་བློ་འཁོར་ཏེ་འགྲོ་སོང་བཏང་ནས་རོགས་ཚོགས་དང་སྤྱི་ཚོགས་ཀྱི་དཀོར་ལ་བརྟེན་མི་དགོས་པ་བྱས་ཏེ་རང་སྐྱ་ཐོན་པའི་སྒོ་ནས་སློབ་སྦྱོང་བྱེད་རྒྱུའི་གོ་སྐབས་གནང་མཁན་ཐོག་མའི་གྲས་ཡིན་པར་བརྟེན་སློབ་གྲྭ་འདི་དམིགས་བསལ་བ་ཞིག་ཡིན་པར་བཙན་བྱོལ་བོད་གཞུང་དང་རང་ཉིད་སྒེར་ནས་ངོས་འཛིན་ཞུ་གི་ཡོད་ཅེས་སྔོན་མ་ནས་བརྗོད་མྱོང་ཡོད་ལ་དེ་རིང་ཡང་བསྐྱར་ཞུ་རྒྱུའི་འདོད་པ་བྱུང་། དེ་རིང་སང་ཉིན་བོད་མི་དཔལ་འབྱོར་ཡག་པོ་ཡོད་མཁན་མི་ཉུང་བ་ཞིག་གིས་སོ་སོའི་ཕྲུ་གུ་བོད་པའི་སློབ་གྲྭར་མ་བཏང་བར་གནས་ཡུལ་གྱི་གཞུང་དང་ཕྱི་རྒྱལ་གྱི་སྒྲིག་འཛུགས་ཁག་གིས་གཙོས་པའི་སློབ་གྲྭ་ཁག་ལ་གཏོང་མཁན་མི་ཉུང་བ་ཞིག་ཡོང་གི་ཡོད་པ་རེད། རང་ཉིད་ཕྱི་རྒྱལ་ལ་ཡོད་མཁན་གྱི་མི་ཞིག་ཡིན་ན་ཐབས་མེད་པ་ལྟ་བུ་ཞིག་རེད།
རྒྱ་བལ་འབྲུག་གསུམ་ལ་ཡོད་མཁན་ཞིག་ཡིན་ན་བོད་པའི་སློབ་གྲྭར་གཏོང་རྒྱུ་ཡོད་བཞིན་དུ་དཔལ་འབྱོར་ཡོད་པ་ཁོ་ན་རྒྱུ་མཚན་དུ་བྱས་ཏེ་སློབ་གྲྭ་གཞན་ལ་གཏོང་རྒྱུ་དེ་ཕྱོགས་གཅིག་ནས་བོད་རིགས་ཀྱི་ལ་ཞེན་དང་བོད་པའི་ཆོས་དང་རིག་གཞུང་རང་ཉིད་ཀྱི་ཕྲུ་གུར་འཇགས་དགོས་རྒྱུའི་བསམ་བློ་ཞིག་མ་འདང་བའི་གནས་སྟངས་ཤིག་ཆགས་ཀྱི་ཡོད། སྔོན་མ་ཡིན་ན་དེ་འདྲ་ཉུང་ཉུང་རེད་འོན་ཀྱང་བར་ལམ་ཞིག་ནས་གནས་ཚུལ་དེ་ཇེ་མང་ནས་ཇེ་མང་དུ་འགྲོ་གི་ཡོད་པ་རེད། དེ་ཚོའི་ཐོག་ནས་བལྟས་པ་ཡིན་ན་འགྲོ་སོང་གཏོང་རྒྱུ་ཡོད་པ་གང་ཞིག་ལ་བོད་པའི་སློབ་གྲྭའི་ནང་གཏོང་རྒྱུ་འབད་བརྩོན་བྱས་ན་ཡག་པོ་རེད་ལ་དེ་ནི་ཚད་དང་ལྡན་པ་ཡང་དག་པ་ཞིག་ཡིན་པར་ང་ཚོས་ངོས་འཛིན་བྱེད་ཀྱི་ཡོད། དེ་རིང་ཁྱེད་རང་ཚོ་འདིར་སློབ་གྲྭ་བཙུགས་ནས་ལོ་ཉི་ཤུ་རྩ་ལྔ་འཁོར་བའི་རྗེས་དྲན་དང་བོད་མི་རྣམས་སྐྱབས་བཅོལ་དུ་འབྱོར་ནས་ལོ་ལྔ་བཅུ་འཁོར་བའི་རྗེས་དྲན་ཡང་བྱེད་ཀྱི་ཡོད་པ་རེད། གོང་དུ་ཁྱེད་རང་ཚོའི་གཏམ་བཤད་གནང་མཁན་ལ་མཚོན་པ་ཡིན་ན། ད་ལྟ་ཁྱེད་རང་ཚོའི་སློབ་གྲྭ་གནས་ཡུལ་གྱི་ས་ཆ་འདི་གྲོག་རོང་ཞིག་ཡིན་པའི་སྐབས་ནས་མཐོང་མྱོང་མཁན་ཞིག་རེད། དེའི་སྟེང་ལ་སློབ་གྲྭ་གཞི་རྒྱ་ཆེན་པོ་འདི་ལྟ་བུ་འཛུགས་ཀྱི་རེད་བསམ་པའི་སྣང་བ་བྱུང་ཡོད་པ་མ་རེད་ཀྱང་སློབ་གྲྭར་བཙུགས་ནས་ལོ་ཉི་ཤུ་རྩ་ལྔ་འགྲོ་གི་ཡོད་པ་རེད། ལོ་ཉི་ཤུ་རྩ་ལྔ་ཟེར་རྒྱུ་དེ་སྒྲིག་འཛུགས་ཤིག་འཛུགས་སྐྲུན་དང་གོ་སྒྲིག་གི་ཕྱོགས་ནས་བལྟས་པ་ཡིན་ན་ཆ་ཚང་ལྷིང་འཇགས་རྒྱུ་དང་མཐུན་རྐྱེན་ཡག་ཏུ་གཏོང་རྒྱུའི་གོ་སྐབས་ཤིག་ཡོད་པ་རེད། དེར་བརྟེན་འདས་པའི་ལོ་ཉི་ཤུ་རྩ་ལྔའི་རིང་ཕྱིར་བལྟས་ཤིག་སློག་པ་ཡིན་ན།
གོང་དུ་ལས་བསྡོམས་ནང་གསལ་བ་ལྟར། བོད་ཕྲུག་མང་པོ་ཞིག་གིས་ཕུགས་ཀྱི་མདུན་ལམ་ཤེས་ཡོན་སློབ་སྦྱོང་གི་ཐོག་ལ་ཞབས་འདེགས་རླབས་ཆེན་ཞུ་ཐུབ་ཡོད། མ་འོངས་པ་ཡང་མུ་མཐུད་སྔར་ལས་ལྷག་ཞབས་འདེགས་སྒྲུབ་རྒྱུའི་ཆོད་སེམས་དང་ལྷག་བསམ་འཆར་གཞི་འདིང་དགོས་རྒྱུ་ཞིག་རེད། འདས་པའི་ལོ་ཉེར་ལྔའི་རིང་ལ་ལེགས་ཉེས་ཀྱི་ཆ་ག་རེ་བྱུང་བ་རེད། སྟོབས་དང་ནུས་པ་ག་རེ་ཐོན་ཡོད། ཞན་ཆ་དང་སྨད་ཆ་ག་རེ་བྱུང་ཡོད་དེ་དག་བསྐྱར་ཞིབ་བྱས་ཏེ་འབྱུང་འགྱུར་སྐྱོན་སེལ་རྒྱུར་ཡོན་ཏན་བསྡུར་རྒྱུའི་ཆེད་དུ་འདས་པའི་ཉམས་མྱོང་ལ་གཞི་བཞག་སྟེ་འབྱུང་འགྱུར་འཆར་གཞི་ཡག་པོ་ཞིག་སྒྲིག་རྒྱུ་དང་ཐབས་ལམ་ཡང་དག་པ་ཞིག་བསྟན་རྒྱུའི་ཆེད་དུ་རྗེས་དྲན་བྱེད་ཀྱི་ཡོད། ལྷག་པར་སློབ་གྲྭ་འདིའི་ལོ་ཉེར་ལྔའི་རིང་ཤེས་ཡོན་འཕེལ་རིམ་ལ་གཞི་བཅོལ་ཏེ་མ་འོངས་པར་བོད་མི་རིགས་ཀྱི་ཕྲལ་ཕུགས་རྒྱང་གསུམ་ལ་མཁོ་བའི་ཡང་དག་པའི་ཤེས་ཡོན་གང་འདྲ་ཞིག་སྤྲོད་ཐུབ་ཀྱི་འདུག་དེའི་ཆེད་དུ་དགོངས་པ་གཏིང་ཟབ་བཞེས་དགོས་རྒྱུ་ཞིག་དང་ལོ་ཉེར་ལྔའི་ཉམས་མྱོང་ཟེར་བ་དེ་གཏིང་ཟབ་པོ་ཞིག་རེད་ཅེས་སོགས་དང། ཡང་བཀའ་ཁྲི་མཆོག་ནས། འདི་གར་ཡོད་པའི་སློབ་ཕྲུག་ཚོ་བསོད་ནམས་ཆེན་པོ་ཡིན་པ་ངོས་ཟིན་པ་གནང་དགོས། སྲོལ་རྒྱུན་དང་དེང་རབས་གཉིས་ལྡན་ཤེས་ཡོན་ཡང་དག་པ་ཞིག་སློབ་སྦྱོང་བྱེད་རྒྱུའི་གོ་སྐབས་ཡོད་མཁན་ཧ་ཅང་ཉུང་ཉུང་རེད།
ལྷག་པར་དུ་བོད་མི་རིགས་ལ་མཚོན་པ་ཡིན་ན་བཙན་བྱོལ་དུ་ཡོད་པའི་བོད་མི་དེ་ས་ཡ་དྲུག་ནང་ནས་བརྒྱ་ཆ་ཉུང་ཤོས་ཤིག་རེད། དེའི་ནང་ནས་ན་གཞོན་མཚོན་པ་ཡིན་ན་བརྒྱ་ཆ་ཉུང་ཤོས་རེད། མང་ཤོས་དེ་བོད་ནང་ལ་ཡོད་པ་དེ་ཚོར་ཤེས་ཡོན་འགྲོ་སོང་ཆེན་པོ་གཏོང་རྒྱུ་ཡོད་ཀྱང་རྒྱ་སྐད། རྒྱ་ཡིག་ལམ་ནས་རྒྱ་ནག་ལ་མཁོ་བའི་ཤེས་ཡོན་ཞིག་མ་གཏོགས་བོད་ཀྱི་ནང་དོན་རིག་པ་གཙོ་བོ་གྱུར་པའི་དེང་རབས་ཤེས་ཡོན་ཆ་ཚང་ཐོབ་རྒྱུའི་གོ་སྐབས་མེད་པར་སོང་། སློབ་གྲྭ་འདི་ལྟ་བུ་ཞིག་ནང་དམིགས་བསལ་གྱི་གོ་སྐབས་བཟང་པོ་ཡིན་པ་དེ་ཤེས་དགོས་ཀྱི་འདུག་ཅེས་དང་། ལྷག་པར་བཀའ་ཁྲི་མཆོག་གིས་གསུང་དོན། སློབ་ཕྲུག་ཚོ་འཛིན་རིམ་བཅུ་གཉིས་དང་བཅོ་ལྔ་ཐོན་པ་ཙམ་དུ་སློབ་སྦྱོང་ཐོན་པའི་བསམ་བློ་འཁྱེར་རྒྱུ་མེད་པ་དང་སློབ་སྦྱོང་ངོ་མ་ནི་རང་གི་རིག་རྩལ་ཐོག་ནས་ཉམས་ཞིབ་བྱས་ཏེ་སྔོན་མའི་མི་ཚོས་བཤད་མ་ཟིན་པ་ཞིག་དང་བྲིས་མ་ཚར་ཞིག་སོ་སོའི་ཉམས་མྱོང་ཐོག་ནས་ཞིབ་འཇུག་དང་གསར་གཏོད་ཐབས་ལམ་ཞིག་ལ་ཟེར་སྟབས་༸གོང་ས་༸སྐྱབས་མགོན་ཆེན་པོ་མཆོག་གི་ཉམས་ཞིབ་དང་རིགས་གཅིག་རྐང་འཛིན་དེ་གལ་ཆེན་པོ་ཡིན་པ་བཀའ་སྩལ་དགོས་རྒྱུ་དེ་ཡང་བོད་མི་རིགས་ཀྱི་འདས་པའི་ལོ་ཆིག་སྟོང་སུམ་བརྒྱ་ཡན་མན་རིང་ལ་ནང་པའི་ཆོས་དང་རྒྱ་གར་ལ་སྔོན་ནས་དར་བའི་སྲོལ་རྒྱུན་ཐ་སྙད་རིག་གནས་ཚང་མའི་ཐོག་གསར་གཏོད་ཕན་ཐོགས་མང་པོ་ཞིག་བོད་ཀྱི་ཐུན་མོང་མ་ཡིན་པའིི་ཁྱད་ཆོས་མཐུན་པ་ང་ཚོས་བྱེད་ཐུབ་ཡོད་རེད། ད་དུང་ཡིན་ནའང་འཛམ་གླིང་ཆེན་པོ་འདིའི་ནང་ལ་བོད་རིགས་ལ་འཇིག་རྟེན་སྤྱི་ཡོངས་ལ་འཁྲི་བའི་ལས་འགན་དེ་ཕ་མེས་ནས་ད་ལྟ་བར་དུ་སྲོག་ལས་གཅེས་པའི་བདག་གཅེས་ཡར་རྒྱས་ཕྱིན་པའི་རིག་པའི་གཞུང་ལུགས་དེ་དག་ནང་གི་ཚན་རིག་རྣམ་གཞག་དག་འཇིག་རྟེན་སྤྱི་ཡོང་ལ་ཁྱབ་ཐུབ་པ་ཞིག་དང་མཉམ་སྤྱོད་བྱེད་ཐུབ་པ་བྱེད་རྒྱུ་དེ་ང་ཚོའི་ལས་འགན་རེད། དེར་བརྟེན་ཁྱེད་རང་ཚོས་རིགས་གཅིག་རྐང་འཛིན་དང་ཉམས་ཞིབ་ཐོག་ལ་འདས་པའི་ང་ཚོའི་མི་རབས་ཚོས་རྩལ་བཏོན་ཏེ་ཆོད་སེམས་ཆེན་པོའི་ཐོག་གནང་བ་གཞིར་བཟུང་ཁྱེད་རང་ཚོས་ཀྱང་དེ་ལྟར་བྱེད་རྒྱུའི་འབོད་སྐུལ་ཞུ་གི་ཡོད། ཅེས་སོགས་ཀྱི་གསུང་བཤད་གྲུབ་མཚམས་སློབ་གྲྭའི་འཁྲབ་སྟོན་པ་ཆུང་བ་རྣམས་ནས་བཀྲ་ཤིས་པའི་རྟེན་འབྲེལ་དུ་བཀྲིས་ཞོལ་པ་དང་གཞས་སྣ་བརྩེ་བའི་འཛུམ་བག་དང་། ལེགས་བྱུང་མཛད་བཟང་ཞེས་པ་འཁྲབ་སྟོན་དང་། བོད་ཁྱིམ་སློབ་གྲྭ་ཁག་བརྒྱད་ཀྱི་འཛིམ་རིམ་བདུན་པ་ནང་ཁུལ་རིགས་ལམ་རྩོད་འགྲན་དང་ལེགས་སོན་ལ་སྐུ་མགྲོན་གཙོ་བོས་བྱ་དགའ་གནང་ཡོད།
ཉིན་གཉིས་པའི་སྐུ་མགྲོན་གཙོ་བོ་དཔལ་རྒྱལ་བ་ཀ་རྨ་པ་རིན་པོ་ཆེ་མཆོག་ཕེབས་ཡོད་པ་དང་། སློབ་གྲྭ་ཁག་ནང་ཁུལ་རིགས་ལམ་རྩོད་འགྲན་དང་། ཕྲུ་གུའི་རི་མོ་འགྲེམས་སྟོན། བོད་ཁྱིམ་སློབ་གྲྭ་ཁག་ནང་ཁུལ་གཞས་སྣ་འགྲན་བསྡུར་བཅས་གནང་ཡོད། ཉིན་གསུམ་པའི་སྐུ་མགྲོན་གཙོ་བོ་ཀང་ར་རྗོང་གི་རྫོང་དཔོན་གདན་ཞུས་ཀྱི་བོད་མི་རྣམས་བཙན་བྱོལ་དུ་འབྱོར་ནས་ལོ་ངོ་ལྔ་བཅུ་འཁོར་བར་རྒྱ་གར་གཞུང་མང་ལ་ཐུགས་རྗེ་ཆེ་ཞུ་བའི་བཀའ་དྲིན་མཚོན་སླད་རྒྱ་གར་ལ་ཐུགས་རྗེ་ཆེ་ཞེས་པའི་གཞས་སྣ་དང་མཆོང་རྒྱུག་འཕེན་གསུམ་རྩེད་འགྲན་གྱིས་ལེགས་སོན་རྣམས་ལ་བྱ་དགའ་གནང་ཡོད་པ་རེད། སློབ་གྲྭ་འདི་ ༡༩༨༤ ལོར་ཐོག་མར་དབུ་འཛུགས་བྱེད་སྐབས་སློབ་ཕྲུག་བརྒྱ་ཐམ་པ་ཡོད་པ་དང་ད་ལྟའི་ཆར་སློབ་མ་ ༨༠༠ ལྷག་ཙམ་ཞིག་ཡོད་པ་བཅས་སོ།།
