༢༠༡༤ ཟླ་ ༦ ཚེས་ ༢ རེས་གཟའ་ཟླ་བ།
༄༅། །ཕྱི་ལོ་ ༢༠༡༤ ཟླ་ ༦ ཚེས་ ༢ ཉིན་རྡ་ས་བཞུགས་སྒར་བོད་ཀྱི་སྨན་རྩིས་ཁང་གི་ཚོགས་ཁང་ནང་དབུས་སྨན་རྩིས་མཐོ་སློབ་ཁང་དབུས་བརྙེས་ནས་མི་ལོ་ ༥༣ འཁོར་བའི་རིག་གཞུང་སྲུང་བརྩིའི་དུས་དྲན་མཛད་སྒོར་འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་གིས་གསུང་བཤད་གནང་དོན། སྨན་རྩིས་ཁང་མཐོ་སློབ་དབུ་བརྙེས་ནས་ལོ་ ༥༣ འཁོར་བའི་རྗེས་སུ་འདིར་ཕེབས་པའི་སློབ་ཕྲུག་རྣམས་ཀྱི་དུས་ཚོད་འདི་གལ་ཆེན་པོ་ཆགས་ཀྱི་ཡོད། རྩིས་ཀྱི་སྐོར་ལ་ངས་དམིགས་བསལ་ཞུ་ཐུབ་རྒྱུ་མི་འདུག སྨན་པ་རྣམས་སྨན་སློབ་ཐོན་ཏེ་ལག་འཁྱེར་བཞེས་ནས་དངོས་སུ་ཕྱག་ལས་གནང་བའི་སྐབས་སུ་ནད་པར་བྱམས་དང་སྙིང་རྗེའི་ཐོག་ནས་ལྟ་སྐྱོང་གནང་རྒྱུ་ཧ་ཅང་གལ་ཆེན་པོ་རེད། ལྷག་པར་དུ་ནད་པ་ཚོར་བཀའ་མོལ་གནང་སྟངས་གལ་ཆེན་པོ་ཡིན་པར་བརྟེན། ནད་པར་གཟིགས་རྟོགས་གནང་རྒྱུ་དང་བཀའ་མོལ་གནང་རྒྱུ་དེ་རིགས་སྨན་པའི་སློབ་སྦྱོང་ཐོན་པ་ཙམ་གྱིས་རང་བཞིན་ཐོག་ཡོང་རྒྱུ་མེད། མི་ཞིག་ཡིན་པའི་དབང་གིས་སྤྱོད་པ་དང་སྐད་ཆ་ཤོད་སྟངས་སོགས་གང་ཅིའི་ཐད་དཀའ་ངལ་འཕྲད་ཀྱི་ཡོད། དེར་བརྟེན་ཉམས་མྱོང་གསག་སྟེ་ཡར་རྒྱས་གཏོང་རྒྱུ་ཧ་ཅང་གལ་ཆེན་པོ་རེད། དེ་བཞིན་སྨན་རྩིས་མཐོ་སློབ་དང་། བོད་ཀྱི་སྨན་རྩིས་ཁང་འདི་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཁྱབ་ཁོངས་བསྟི་གནས་གལ་ཆེན་པོ་ཞིག་ཏུ་རྩི་བཞིན་ཡོད། ད་བར་ལོ་ ༥༣ ལྷག་ཙམ་རིང་ཕྱག་ལས་ཧུར་ཐག་གནང་དང་གནང་མུས་རེད། འཛིན་སྐྱོང་བཀའ་ཤག་གིས་ཕྱི་ལོ་ ༢༠༡༤ ལོར་༸གོང་ས་༸སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་གི་བཀའ་དྲིན་རྗེས་དྲན་གྱི་ལོར་སྲུང་བརྩི་ཞུ་གནང་གི་ཡོད། དེ་དང་སྟབས་བསྟུན་བོད་ཀྱི་སྨན་རྩིས་ཁང་གིས་དེའི་ཐོག་གང་དང་གང་གནང་རྒྱུ་འདུག ༸རྒྱལ་བ་རིན་པོ་ཆེ་མཆོག་གིས་སྐུ་ངལ་འཛད་མེད་བསྐྱོན་པའི་དབང་གིས་ད་ལྟ་གནས་སྟངས་འདི་བྱུང་ཡོད་སྟབས། གཙོ་བོ་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་ཚང་མས་ཐུགས་ལ་ཉར་དགོས་པ་མ་ཟད། མི་རབས་རྒན་པ་རྣམས་ཀྱི་དཀའ་ལས་མང་པོ་བརྒྱབ་ཡོད་པ་དེ་དག་ཆུད་ཟོས་སུ་མ་འགྲོ་བ་བྱེད་རྒྱུ་ཧ་ཅང་གལ་ཆེན་པོ་རེད།
བོད་ཀྱི་སྨན་རྩིས་ཁང་འདི་གཙོ་བོ་འཕྲོད་བསྟེན་དང་། དེ་བཞིན་སྨན་དང་འབྲེལ་བའི་བསྟི་གནས་གལ་ཆེན་པོ་ཞིག་ཡིན་པ་མ་ཟད། ནད་པ་དང་། སྤྱི་ཚོགས་འཕྲོད་བསྟེན། ནད་པའི་དཀའ་ངལ་ཉུང་དུ་གཏོང་མཁན་གྱི་བསྟི་གནས་གལ་ཆེན་པོ་ཞིག་ཀྱང་ཆགས་ཀྱི་ཡོད། འོན་ཀྱང་དེ་ལས་གལ་ཆེ་བ་ཕྱི་ལུགས་སྨན་གྱི་ཐོག་ནས་ཞུས་ན། མི་ཞིག་ལ་ན་ཚ་འགོ་བ་དང་། ན་བ་གཉིས་ལ་ཁྱད་པར་ཧ་ཅང་ཆེན་པོ་ཡོད། མི་ཞིག་ལ་ནད་འབུ་ཡོད་པ་ཙམ་གྱིས་ན་ཚ་ཡོད་པ་ཁྱབ་ཀྱི་མེད་པར་བརྟེན། འབྲེལ་ཡོད་ཚང་མས་མཁྱེན་པ་གནང་རྒྱུ་གལ་ཆེན་པོ་ཆགས་ཀྱི་འདུག བོད་ཀྱི་སྨན་རྩིས་ཁང་གིས་སྤྱི་ཚོགས་ཀྱི་འཕྲོད་བསྟེན་ཐོག་སྔར་ལྷག་ལྟ་རྟོག་བྱེད་རྒྱུ་གལ་ཆེན་པོ་རེད། སྨན་རྩིས་ཁང་གི་འགན་འཛིན་མཆོག་དང་། འགན་འཛིན་ལྷན་ཚོགས། ཚོགས་ཆུང་། ལས་བྱེད། སྨན་པ། སློབ་ཕྲུག་བཅས་ནས་དུས་རྒྱུན་ཕྱག་ལས་གནང་ཕྱོགས་ཐད་དགོངས་པ་བཞེས་རྒྱུ་གལ་ཆེན་པོ་འདུག སྨན་གྱི་ཐོག་ནས་བཟང་སྤྱོད་ ( Medical ethics) ཇི་ལྟར་བྱེད་དགོས་རྒྱུ་སྨན་པས་མཁྱེན་པ་གནང་དགོས། བོད་ཀྱི་གསོ་བ་རིག་པ་བརྒྱུད་ནས་སྤྱི་ཚོགས་ནང་ནད་གཞི་སྔོན་འགོག་ཐོག་སློབ་གསོ་ལས་འགུལ་གང་མང་སྤེལ་རྒྱུ་གལ་ཆེན་པོ་མཐོང་གི་འདུག བོད་ཀྱི་སྨན་རྩིས་ཁང་ལྟ་བུ་སྨན་པའི་ལྷན་ཚོགས་ཀྱང་གལ་ཆེན་པོ་ཆགས་ཀྱི་ཡོད། འཕྲོད་བསྟེན་ལས་ཁུངས་ནས་འདི་ལོ་ཕྱི་ཟླ་གསུམ་པའི་གྲོས་ཚོགས་ནང་ཞུས་པ་ལྟརབོད་ཀྱི་སྨན་རྩིས་ཁང་དང་། ལྕགས་པོ་རི། ཝར་ཎ་མཐོ་སློབ་བཅས་ལ་འབྲེལ་བ་ཞུས་ཏེ་ཁོ་རང་ཚོས་བསམ་ཚུལ་གང་ཡོད་པ་དེ་དག་བསྡུ་རུབ་བྱེད་བཞིན་ཡོད། བསམ་ཚུལ་ཕྱོགས་སྒྲིག་གིས་སྙན་ཐོ་བཀའ་ཤག་ཏུ་ཕུལ་ནས་གྲོས་ཚོགས་ལ་སྙན་སེང་ཞུ་རྒྱུ་ཡིན་ཞེས་སོགས་ཀྱི་གསུང་བཤད་གནང་ཡོད།
