༢༠༠༩ ཕྱི་ཟླ་ ༡༠ ཚེས་ ༡༢ རེས་གཟའ་ཟླ་བ།
༄༅། །ཕྱི་ལོ་ ༢༠༠༩ ཟླ་ ༡༠ ཚེས་ ༡༠ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིའི་སྲིད་འཛིན་སྐུ་ཞབས་བྷ་རཀ་ཨོ་བྷ་མ་མཆོག་ལ་འདི་ལོའི་ནོ་བེལ་ཞི་བདེའི་གཟེངས་རྟགས་ཐོབ་པར་འཚམས་འཕྲིན་སྩལ་ཡོད། དེ་ཡང་༸གོང་ས་མཆོག་གི་ཨ་རིའི་དམིགས་བསལ་སྐུ་ཚབ་ལས་ཁུངས་བརྒྱུད་ཨ་རིའི་སྲིད་འཛིན་སྐུ་ཞབས་ཨོ་བྷ་མ་མཆོག་ལ་༸གོང་ས་མཆོག་གི་འཚམས་འདྲིའི་གསུང་འཕྲིན་ཞིག་སྩལ་ཡོད་པའི་ནང་འཁོད་དོན། སྐུ་ཉིད་ཀྱིས་རྒྱལ་སྤྱིའི་རྩོད་རྙོག་དེ་དག་རྣམ་དཔྱོད་དང་གྲོས་མོལ་གྱི་ལམ་ནས་སེལ་རྒྱུའི་འབད་བརྩོན་གནང་བར་ནོ་བེལ་ཞི་བདེའི་གཟེངས་རྟགས་ཚོགས་ཆུང་གིས་ངོས་འཛིན་གནང་བ་དེར་ངོས་ནས་དགའ་ཚོར་ཆེན་པོའི་ཐོག་འཚམས་འདྲི་ཞུ་རྒྱུ་ཡིན། སྐུ་ཉིད་ཀྱིས་རྡུལ་ཕྲན་མཚོན་ཆ་མེད་པའི་འཛམ་གླིང་ཞིག་བསྐྲུན་ཐབས་དང་། ཁོར་ཡུག་སྲུང་སྐྱོབ་ཡོང་སླད་དོན་ཕན་ལྡན་པའི་ཕྱག་ལས་གནང་བར་ནོ་བེལ་ཞི་བདེ་ཚོགས་ཆུང་ནས་འོས་འཚམས་ཀྱི་ཐོག་ནས་ཞལ་བཞེས་གནང་ཡོད་པ་རེད། དུས་རབས་ ༢༠ པ་དེ་ནི་རྩོད་རྙོག་གི་དུས་རབས་ཤིག་ཡིན་པ་དང་། དུས་རབས་ ༢༡ དེ་གྲོས་མོལ་དང་མཐུན་འབྲེལ་གྱི་དུས་རབས་ཤིག་ཡོང་བ་བྱེད་རྒྱུར་ང་ཚོར་འགན་ཡོད།
དེར་བརྟེན་ཕན་ཚུན་གཅིག་ལ་གཅིག་བརྟེན་ཐོག་གནས་དགོས་པའི་འཛམ་གླིང་འདིའི་ནང་ཕྱོགས་ཡོངས་ནས་ང་ཚོ་མཉམ་རུབ་ཀྱི་ཐོག་བྱམས་བརྩེའི་ཐབས་ལམ་དེ་ལག་ལེན་དང་གོང་མཐོར་གཏོང་རྒྱུའི་འགན་ཞིག་ཡོད། ཨ་རིའི་རྒྱལ་ཁབ་གསར་འཛུགས་མཛད་མཁན་གྱི་མེས་པོ་རྣམས་ཀྱིས་ཨ་རིའི་རྒྱལ་ཁབ་འདི་མང་གཙོ་ཕུལ་བྱུང་ཞིག་དང་། གཞན་གྱི་རང་དབང་དང་། འདོད་དབང་སྲུང་སྐྱོབ་བྱེད་མཁན་གྱི་རྒྱལ་ཁབ་ཅིག་ཏུ་བསྐྲུན་ཡོད་པ་ངོས་ནས་འགྲེལ་བརྗོད་བྱས་ཡོད། དེར་བརྟེན་ད་ལྟའི་ཨ་རིའི་རྒྱལ་ཁབ་ཀྱི་དབུ་ཁྲིད་ཚོའི་ཆུ་ཚད་མཐོ་བའི་བཟང་སྤྱོད་ཀྱི་ལྟ་གྲུབ་དེ་དག་ལ་གཞི་བཅོལ་ནས་སྣེ་ཁྲིད་ཐུབ་པའི་ལངས་ཕྱོགས་དེ་བཟུང་ཐུབ་པ་བྱེད་རྒྱུ་གལ་ཆེན་པོ་རེད། ལངས་ཕྱོགས་དེས་ཨ་རིའི་རྒྱལ་ཁབ་ཀྱི་སྙན་གྲགས་ཆེ་རུ་གཏོང་རྒྱུ་མ་ཟད་འཛམ་གླིང་ནང་ཛ་དྲག་གི་གནས་སྟངས་ཚབས་ཆུང་དུ་འགྲོ་རྒྱུར་ལེགས་སྐྱེས་ཆེན་པོ་འབུལ་རྒྱུ་རེད། ཅེས་པའི་འཚམས་འདྲིའི་གསུང་འཕྲིན་སྩལ་ཡོད།
གསུང་འཕྲིན་ངོ་མ་དབྱིན་ཡིག་ཐོག་ཡོད་པ་ནས་འདི་ག་བོད་ཡིག་ཚན་པས་ཕབ་སྒྱུར་ཞུས་པས་ཚིག་དོན་ལ་ཧེ་བག་ཡོད་ཚེ་དབྱིན་ཡིག་ལ་རྩ་འཛིན་ཡོད་པ་ཞུ།
