༢༠༡༤ ཟླ་ ༦ ཚེས་ ༢ རེས་གཟའ་ཟླ་བ།
༄༅། །ཕྱི་ལོ་ ༢༠༡༤ ཟླ་ ༥ ཚེས་ ༣༡ ཉིན་གྱི་སྔ་དྲོ་ཆུ་ཚོད་ ༨།༣༠ ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་མཧཱ་ར་ཤེ་ཊ་ (Maharashtra)མངའ་སྡེའི་རྒྱལ་ས་མུམ་བྷེའི་(Mumbai) ནང་ཆོས་འབྲེལ་སྩལ་བཞིན་ཡོད་པ་ལྟར། ཆོས་འབྲེལ་ཉིན་གཉིས་པ་དབུ་འཛུགས་མ་གནང་གོང་༸གོང་ས་མཆོག་གིས་སོ་མི་ཡ་ཝི་དྷི་ཡ་ཝི་ཧར་(Somiya Vidhya Vihar) མཐོ་སློབ་ཀྱི་ཁོངས་སུ་ཡོད་པའི་སོ་མི་ཡ་སློབ་གྲྭ་དབུ་འབྱེད་དང་སྦྲགས་དགེ་ལས་སློབ་ཕྲུག་རྣམས་ལ་ལམ་སྟོན་བཀའ་སློབ་སྩལ་འདུག
དེ་རྗེས་མགོན་པོ་གང་ཉིད་མཆོག་གིས་ཉིན་གཉིས་པའི་ཆོས་འབྲེལ་དབུ་འཛུགས་ཀྱི་བཀའ་སློབ་སྩལ་དོན། གཞུང་དེའི་བརྗོད་བྱ་དེ་མངོན་མཐོ་དང་ངེས་ལེགས་བསྒྲུབ་རྒྱུ་གསུངས་ཡོད། ངེས་ལེགས་ཐར་པ་དང་ཐམས་ཅད་མཁྱེན་པའི་གོ་འཕང་འཐོབ་རྒྱུ་དེ་རེད། ང་ཚོ་ཚང་མ་བདེ་བ་འདོད་མཁན་ཤ་སྟག་རེད། འདོད་བྱའི་བདེ་བར་མངོན་མཐོའི་བདེ་སྐྱིད་དང་། དེ་ནས་ངེས་ལེགས་ཀྱི་ཐར་པའི་བདེ་སྐྱིད། གཙོ་བོ་བདེ་སྐྱིད་ཀྱི་དོན་དུ་རེད། སངས་རྒྱས་ཀྱི་ཆོས་ཞེས་པ་དེ་རྒྱུ་མཚན་རིག་དཔྱད་ཀྱི་སྤྲོ་བ་རྙེད་པའི་ཐོག་ནས་སྦྱངས་བཤད་ཉམས་ལེན་གནང་རྒྱུ་གལ་ཆེ་ཡིན། སངས་རྒྱས་པའི་ཆོས་ཀྱི་འགྲོ་སྟངས་ཞེས་པ་དེ་ཞེད་སྣང་གི་ཐོག་ནས་འགྲོ་རྒྱུ་ཞིག་ཕལ་ཆེར་མ་རེད། སེམས་ནང་སྤྲོ་བ་ཧ་ཅང་སྐྱེས་ནས་དངོས་གནས་དྲང་གནས་ཀྱི་བསམ་བློ་རྒྱ་ཆེན་པོ་བཏང་སྟེ་
དངོས་ཡོད་གནས་ཚུལ་ལ་ཞིབ་འཇུག་བྱས་ཏེ། སེམས་ལ་སྤྲོ་བ་བསླེབས་པའི་ཐོག་ནས་ཉམས་ལེན་བྱེད་རྒྱུ་ཞིག་རེད། སངས་རྒྱས་པའི་ཆོས་ཞེས་པ་དེ་བདེན་པ་བཞིའི་ཐོག་ནས་ཐར་པའི་གོ་འཕང་ངོ་སྤྲོད་ཀྱི་ཡོད། ང་ཚོས་སྡུག་བསྔལ་འདོད་ཀྱི་མེད། སྡུག་བསྔལ་རྩ་བ་ནས་མེད་པ་ཞིག་བྱུང་ན་དེ་དགོས་རྒྱུ་རེད། ཐར་པ་ངོ་འཕྲོད་པའི་ཐོག་ནས་ཐར་པ་དོན་གཉེར་གྱི་བསམ་པས་སངས་རྒྱས་པའི་ཆོས་བྱེད་རྒྱུ་གཅིག་དང་། དེ་ལྟ་བུའི་ཐར་པ་བསྒྲུབ་རྒྱུ་ཞེས་པ་དེ་བསླབ་པ་གསུམ་ལ་ཉམས་ལེན་བྱེད་དགོས། ཤེས་རབ་ཀྱི་བསླབ་པ་བརྗོད་སྐབས་ལས་སླ་པོ་ཞིག་མེད། མི་ཚེ་འདིའི་ནང་ཐར་པའི་གོ་འཕང་ཐོབ་མ་ཐོབ་ཟེར་རྒྱུ་ཁག་པོ་རེད། དེར་བརྟེན་སྐྱེ་བ་བརྒྱུད་ནས་བསྒྲུབ་དགོས་རྒྱུ་ཞིག་རེད། གལ་ཆེ་ཤོས་མངོན་མཐོའི་ལུས་རྟེན་གྱི་ཆོས་རབ་ཏུ་རྣམ་འབྱེད་ཀྱི་ཤེས་རབ་ཀྱི་ནུས་པ་བེད་སྤྱོད་བྱས་ནས་ཏིང་ངེ་འཛིན་གྱི་བསླབ་པ་དང་།
ལྷག་པར་ཤེས་རབ་ཀྱི་བསླབ་པའི་ཐོག་ནས་ཉམས་ལེན་བྱས་ཏེ་ཐར་པའི་གོ་འཕང་བསྒྲུབ་རྒྱུ་ཞིག་ཆགས་ཀྱི་ཡོད། པཎ་གྲུབ་བཅུ་བདུན་ནང་ནས་མཁན་ཆེན་ཞི་བ་འཚོ་དང་། སློབ་དཔོན་པདྨའི་ངང་ཚུལ། མར་མེ་མཛད་བཅས་བོད་ལ་ཕེབས་ཡོད། ཁོང་གསུམ་མྱ་ངན་ལས་འདས་ས་བོད་ཡིན། ན་ལེནྡྲ་དང་ཐུན་མོང་མ་ཡིན་པའི་འབྲེལ་བ་ཡོད་སྟངས་དང་། ན་ལེནྡྲའི་ཆོས་བརྒྱུད་དྲི་མ་མེད་པ་ཡིན་སྟངས་དེ་འདི་ལྟར་རེད། ལུང་པ་དེ་དག་གི་ནང་ཕལ་ཆེར་དཔལ་ན་ལེནྡྲའི་མཁས་པས་མཛད་པའི་ཚད་མའི་གཞུང་ཆ་ཚང་བསྒྱུར་ཡོད་པ་མ་ཟད། ཚད་མའི་གཞུང་ལ་ཤུགས་བརྒྱབ་ནས་སློབ་གཉེར་བྱེད་མཁན་དེ་ཕལ་ཆེར་བོད་པ་གཅིག་པུ་ཡིན་འདུག བོད་ཀྱི་མཁས་པ་འགས་འདི་ལྟར་གསུངས་ཀྱི་ཡོད། ཕར་ཕྱིན་ཡུམ་ཤེས་རབ་ཀྱི་ཕ་རོལ་དུ་ཕྱིན་པ་དང་སྦས་དོན་མངོན་རྟོགས་གསལ་བར་མཛད་མཁན་གྱི་གཞུང་གཙོ་བོ་ཆགས་ཡོད་པར་བརྟེན། ཕར་ཕྱིན་དེ་གཞུང་གཙོ་བོ་དང་རྩ་བ་བྱས་ཏེ། དབུ་མ་དེ་ཕར་ཕྱིན་གྱི་ལྟ་གྲུབ། འདུལ་བ་དེ་ཕར་ཕྱིན་གྱི་བསླབ་བྱ། མཛོད་དེ་ཕར་ཕྱིན་གྱི་དྲང་བདེན། ཚད་མ་དེ་ཕར་ཕྱིན་གྱི་རིགས་ལམ། པོ་ཏི་ལྔ་ཀར་རྩ་བ་ཕར་ཕྱིན་གྱི་ཡན་ལག་ལྟ་བུར་བཟུང་། ཞེས་ལྟ་བུ་གསུང་ཚུལ་ཡོད། འདི་ཕལ་ཆེར་བདེན་པ་རེད། ཅེས་སོགས་ཀྱི་བཀའ་སློབ་དང་ཆོས་འབྲེལ་དངོས་སུ་དབུ་འཛུགས་མཛད་ཡོད་པ་མ་ཟད། ཕྱེད་ཡོལ་༸གོང་ས་མཆོག་གིས་མང་ཚོགས་ཀྱི་དྲི་བར་བཀའ་ལན་སྩལ་ཡོད།
གཞན་ཡང་གོང་ཚེས་ཉིན་སློབ་གྲྭ་དབུ་འབྱེད་ཀྱི་མཛད་སྒོ་གྲུབ་མཚམས་རྒྱ་གར་གྱི་གསར་ཁང་ཁག་གཅིག་གི་གསར་འགོད་པའི་དྲི་བར་བཀའ་ལན་ཡང་སྩལ་ཡོད་པ་བཅས།།
