༢༠༡༤ ཟླ་ ༥ ཚེས་ ༣༠ རེས་གཟའ་པ་སངས།
༄༅། །ཨ་རིའི་ནང་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་ནས་ཡུ་རོབ་གྲོས་ཚོགས་ཀྱི་འོས་བསྡུ་ཆེན་མོའི་སྔ་སྣུར་དུ་འདི་ལོ་ཕྱི་ཟླ་ ༢ ཚེས་ ༡༩ ཉིན་ཡུ་རོབ་རྒྱལ་ཁབ་སྦེལ་ཇམ་གྱི་རྒྱལ་ས་སྦི་རལ་སིལ་དུ་ཚོགས་པའི་ཡུ་རོབ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་འདུ་ཐེངས་བརྒྱད་པའི་ཐོག་ཕྱི་ལོ་ ༢༠༡༤ བོད་དོན་ལ་རྒྱབ་སྐྱོར་གྱི་དམ་བཅའ་ཞེས་པའི་ལས་འགུལ་དབུ་འཛུགས་གནང་ཡོད་པ་ལྟར། དེའི་ཐོག་ད་ལྟ་བར་ཡུ་རོབ་གྲོས་ཚོགས་འཐུས་མི་བདུན་ཅུ་བརྒལ་བས་ཡིག་ཆ་དེར་མཚན་རྟགས་བཀོད་ནས་བོད་དོན་ལ་མུ་མཐུད་རྒྱབ་སྐྱོར་གནང་རྒྱུའི་དམ་བཅའ་བཞག་འདུག
གནས་ཚུལ་དེའི་སྐོར་འདི་ཟླའི་ཚེས་ ༢༢ ཉིན་རྒྱལ་སྤྱིའི་བོད་དོན་ལས་འགུལ་ཁང་གི་དྲ་གནས་ནང་གསལ་ལྟར་ན། ཕྱི་ལོ་ ༢༠༡༤ བོད་ཀྱི་ལོ་ཞེས་པའི་བོད་དོན་རྒྱབ་སྐྱོར་གྱི་དམ་བཅའ་ཞེས་པའི་ཡིག་ཆའི་ཐོག་མཚན་རྟགས་འགོད་མཁན་གྱི་མིང་གཞུང་འདོན་སྤེལ་གནང་བའི་ནང། ཡུ་རོབ་རྒྱལ་ཁབ་འདྲ་མིན་བཅུ་དྲུག་ནང་གི་ཆབ་སྲིད་ཚོགས་པའི་འཐུས་མི་ཡོད་ཁོངས་ནས་བཞི་བཅུ་ཞེ་གཅིག་བསྐྱར་དུ་འོས་འདེམས་བྱུང་ཡོད་པ་དང། སུམ་ཅུ་སོ་གཉིས་གསར་དུ་འཐུས་མིར་འཁོོད་མཁན་བཅས་ཁྱོན་བསྡོམས་འཐུས་མི་ ༧༣ ནས་བོད་དོན་ལ་རྒྱབ་སྐྱོར་གྱི་མཚན་རྟགས་བཀོད་འདུག
དེ་བཞིན་རྒྱལ་སྤྱིའི་བོད་དོན་ལས་འགུལ་ཁང་གི་ཆབ་སྲིད་ངེས་སྟོན་པས་གསུང་གསལ། ཡིག་ཆའི་ཐོག་མཚན་རྟགས་བཀོད་པ་དེ་ནི་བོད་དོན་ལ་རྒྱབ་སྐྱོར་གྱི་རྣམ་པ་ཤུགས་ཆེན་བསྟན་ཡོད་པ་མ་ཟད། འཐུས་མི་མང་དག་གིས་མཚན་རྟགས་བཀོད་པ་དེས་ཡུ་རོབ་མཐུན་ཚོགས་ངོས་ནས་རྒྱ་ནག་གཞུང་དང་ལྷན་འབྲེལ་བ་བྱེད་སྐབས། བོད་ནང་གི་བོད་མིའི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་བཏང་དང་གཏོང་མུས་ཐོག་ལ་གླེང་སློང་དང་སྐུལ་མ་མུ་མཐུད་ནས་གནང་རྒྱུ་ཡིན་པའི་རྟགས་མཚན་གསལ་པོ་ཞིག་ཆགས་ཡོད་སྐོར་འགྲེལ་བརྗོད་གནང་འདུག
ཕྱོགས་མཚུངས་ཡུ་རོབ་གྲོས་ཚོགས་ནང་གི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་དང་མི་མང་ཚོགས་པའི་འཐུས་མི་སྐུ་ཞབས་ཐོ་མི་སེ་མན་ལགས་ཀྱིས་གསུང་གསལ། ཡུ་རོབ་མཐུན་ཚོགས་ནས་བོད་དོན་ཐོག་ལངས་ཕྱོགས་འཛིན་སྟངས་ནས་མཐུན་ཚོགས་ཀྱི་ངོ་གདོང་ངོ་མ་འདི་མཐོང་གི་ཡོད་པ་མ་ཟད། ང་ཚོའི་ངོས་ནས་བཟང་སྤྱོད་ཀྱི་རིན་ཐང་ལ་ཆེ་མཐོང་ག་ཚོད་འཇོག་གི་ཡོད་མེད་གསལ་པོ་མཚོན་བཞིན་ཡོད། ཅེས་འགྲེལ་བརྗོད་གནང་འདུག
ལྷག་པར་ཡུ་རོབ་མཐུན་ཚོགས་ནང་གི་བོད་དོན་རྒྱབ་སྐྱོར་ཚོགས་པའི་འཐུས་མི་སྐུ་ཞབས་ཨན་ངྷར་གྷ་ངྷིར་ལགས་ཀྱིས་གསུང་གསལ། འཐུས་མི་རྣམ་པས་ཡིག་ཆའི་ཐོག་མཚན་རྟགས་བཀོད་པ་དང་དུས་མཚུངས་ཡུ་རོབ་གྲོས་ཚོགས་ནང་བོད་དོན་རྒྱབ་སྐྱོར་ཚོགས་པ་མུ་མཐུད་གནས་རྒྱུར་རྒྱབ་སྐྱོར་ཡང་མཚོན་བཞིན་ཡོད། ཡུ་རོབ་གྲོས་ཚོགས་བོད་དོན་རྒྱབ་སྐྱོར་ཚོགས་པས་དཀའ་ངལ་མང་དག་ཅིག་བསྐྱོན་པའི་གྲུབ་འབྲས་ལ་ད་ལྟ་ཡུ་རོབ་མཐུན་ཚོགས་ནང་བོད་དོན་རྒྱབ་སྐྱོར་གྱི་རྨང་གཞི་ལྟ་བུར་གྱུར་ཡོད་སྐོར་འགྲེལ་བརྗོད་གནང་འདུག
ཡིག་ཆའི་ཐོག་མཚན་རྟགས་འགོད་མཁན་འཐུས་མི་ ༧༣ ཡོད་ཁོངས་ནས་ཕྱེད་ཀ་ལྷག་ཕ་རན་སིའི་ལྗང་ཁུ་ཚོགས་པའི་འཐུས་མི་ཡིན་པ་དང་། ཁོང་རྣམ་པས་ཐུན་མོང་ཐོག་བསྒྲགས་གཏམ་ཞིག་ཀྱང་སྤེལ་འདུག་བཅས། །
