༢༠༡༤ ཟླ་ ༥ ཚེས་ ༢༣ རེས་གཟའ་པ་སངས།
༄༅། །ཕྱི་ལོ་ ༢༠༡༤ ཟླ་ ༥ ཚེས་ ༢༣ ཉིན་གྱི་སྔ་དྲོ་ ༡༠ ཐོག་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་ཕྱི་ལོ་ ༢༠༡༤ ལོ་འདི་ནི་༸གོང་ས་༸སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་གི་བཀའ་དྲིན་རྗེས་དྲན་གྱི་ལོར་སྲུང་བརྩི་གཟབ་རྒྱས་ཞུ་རྒྱུའི་སྐོར་གོ་སྒྲིག་ཚོགས་ཆུང་གིས་གསར་འགོད་ལྷན་ཚོགས་ཤིག་སྤེལ་སོང་། དེ་ཡང་གོ་སྒྲིག་ཚོགས་ཚུང་གི་ཚོགས་གཙོ་ཕྱི་དྲིལ་དྲུང་ཆེ་བཀྲ་ཤིས་ཕུན་ཚོགས་ལགས་དང་། ཚོགས་གཙོ་ཤེས་རིག་དྲུང་ཆེ་སྟོབས་རྒྱལ་ཚེ་རིང་ལགས། ཚོགས་མི་ཆོས་རིག་དྲུང་འཕར་བསྟན་འཛིན་ལུང་རྟོགས་ལགས། ཚོགས་མི་ནང་སྲིད་དྲུང་འཕར་འཆི་མེད་རིག་འཛིན་ལགས་ཕེབས་ཏེ་ཕྱི་ནང་གི་གསར་འགོད་པ་ ༢༥ བརྒལ་བར་གོ་སྒྲིག་ཚོགས་ཆུང་གི་ཚོགས་གཙོས་འཚམས་འདྲི་དང་ལས་རིམ་ངོ་སྤྲོད་གནང་གྲུབ་མཚམས་གོ་སྒྲིག་ཚོགས་ཆུང་གི་ཚོགས་གཙོ་ཤེས་རིག་དྲུང་ཆེ་སྟོབས་རྒྱལ་ཚེ་རིང་ལགས་ཀྱིས་གསར་འགོད་ལྷན་ཚོགས་སྤེལ་དགོས་དོན་དང་ལས་འཆར་སྐོར་གསུང་དོན། ད་རེས་རྣམ་པ་ལྷན་རྒྱས་འདི་གར་ཕེབས་རོགས་ཞུས་དགོས་དོན་ནི། བོད་མིའི་སྒྲིག་འཛུགས་བཀའ་ཤག་གིས་ཕྱི་ལོ་ ༢༠༡༤ ལོར་༸གོང་ས་༸སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་གི་བཀའ་དྲིན་རྗེས་དྲན་གྱི་ལོར་སྲུང་བརྩི་ཞུ་རྒྱུར་ཐག་གཅོད་གནང་སྟེ། འདི་ལོའི་གསུམ་བཅུའི་དུས་དྲན་ཉིན་དཔལ་ལྡན་སྲིད་སྐྱོང་མཆོག་གིས་བཀའ་ཤག་གི་གསུང་བཤད་ནང་ཐོག་མར་ཡོངས་ཁྱབ་གསལ་བསྒྲགས་གནང་ཡོད། དེ་རྗེས་གྲོས་ཚོགས་ནང་དུའང་གསལ་བསྒྲགས་ཕེབས་ཡོད།
དཔལ་ལྡན་བཀའ་ཤག་གིས་དབུས་སུ་དུས་དྲན་སྲུང་བརྩི་ཞུ་སླད་བཀའ་དྲིན་རྗེས་དྲན་གྱི་ལས་རིམ་བཟོ་རྒྱུ་དང་། ལག་བསྟར་ཆེད་ཚོགས་མི་ལྔ་ལས་གྲུབ་པའི་ཚོགས་ཚུང་ཞིག་ཆེད་བཙུགས་གནང་སྟེ་ཚོགས་ཚུང་ངོས་ནས་ལས་འཆར་བཟོས་ཏེ་འཆར་འབུལ་དགོས་སྐོར་བཀའ་ཕེབས་པ་ལྟར་འཆར་འབུལ་ཞུས་ཏེ་བཀའ་ཤག་གིས་ལས་འཆར་གཏན་འབེབས་གནང་བ་ ༢༥ ཡོད་ཁོངས་ནས་དབུས་ཀྱི་ལས་ཁུངས་ཁག་གཅིག་དང་།
དེ་དག་གི་ཁྱབ་ཁོངས་དང་བཅས་པའི་ཞུ་དགོས་ཁག་ནི། ཆོས་རིག་ལས་ཁུངས་ཀྱི་འོག་ལ་ལས་རིམ་ལྔ་དང་། ནང་སྲིད་ལས་ཁུངས་ལ་ལས་རིམ་གཉིས། ཤེས་རིག་ལས་ཁུངས་ལ་ལས་རིམ་བཞི། ཕྱི་དྲིལ་ལས་ཁུངས་ལ་ལས་རིམ་ལྔ། འཕྲོད་བསྟེན་ལས་ཁུངས་ལ་ལས་རིམ་གཅིག གོ་སྒྲིགས་ཚོགས་ཆུང་ལ་ལས་རིམ་བརྒྱད་བཅས་ཁྱོན་བསྡོམས་ལས་རིམ་ ༢༥ གཏན་འཁེལ་བྱུང་ཡོད་པའི་ཁྲོད་ནས་ལས་རིམ་གཉིས་ལག་བསྟར་ཞུས་ཟིན་ཡོད།
དང་པོ། ༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་མཆོག་དགུང་གྲངས་ ༢༥ ཕེབས་པའི་སྐུའི་འཁྲུངས་སྐར་མཛད་སྒོ་དེ་བཞིན་དབུས་བོད་མིའི་སྒྲིག་འཛུགས་ཀྱི་ངོས་ནས་གཞུང་འབྲེལ་ཐོག་སྲུང་བརྩི་ཞུས་ཡོད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་༸ཀུན་གཟིགས་༸པཎ་ཆེན་སྐུ་ཕྲེང་བཅུ་པའི་ཡང་སྲིད་འཁྲུལ་བྲལ་དུ་ངོས་འཛིན་མཛད་པར་བརྟེན་བཀའ་དྲིན་རྗེས་དྲན་གྱི་ལས་འཆར་ཁོངས་གཅིག་འདི་ཞུས་ཡོད།
གཉིས་པ། ཕྱི་ཟླ་ ༥ ཚེས་ ༧ ཉིན་ནོར་ཝེ་ཨོ་སི་ལོར་ནོ་བེལ་བསྟི་གནས་ཁང་དུ་དེ་སྔའི་ནོ་བེལ་ཞི་བའི་གཟེངས་རྟགས་ཚོགས་ཆུང་གི་ཚོགས་མི་ཁག་ལྔ་དང་ལྷན་༸གོང་ས་མཆོག་དང་གསོལ་སྟོན་ཚོགས་འདུའི་མཛད་རིམ་བསྐྱངས་ཡོད། ལས་རིམ་གཞན་རྣམས་རིམ་པས་ལག་བསྟར་ཞུ་རྒྱུ་ཡིན། འདི་ལོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༧༩ ཕེབས་ཀྱི་ཡོད་པར་བརྟེན་དབུས་ས་གཉིས་སུ་སྔར་ལྷག་སྐུའི་འཁྲུངས་སྐར་དུས་ཆེན་གཟབ་རྒྱས་ངང་སྲུང་བརྩི་ཞུ་རྒྱུ་དང་། ༸གོང་ས་མཆོག་གིས་བོད་མི་ཚོར་རྒྱལ་ཁབ་གཞན་དང་དཔུང་པ་མཉམ་གཤིབས་ཐོག་འགྲོ་ཐུབ་ཆེད་མང་གཙོ་གསོལ་རས་སྕལ་བར་བཀའ་དྲིན་རྗེས་དྲན་ཞུ་ཆེད་འདི་ལོའི་ཕྱི་ཟླ་ ༩ ཚེས་ ༢ མང་གཙོ་དུས་དྲན་སྲུང་བརྩི་གཟབ་རྒྱས་ཞུ་རྒྱུ་ཡིན། ཕྱི་ཟླ་ ༡༠ ཚེས་ ༢ ཉིན་ཏེ་གྷན་རྡིའི་འཁྲུངས་སྐར་ཉིན་བཞུགས་སྒར་རྡ་ས་དང་།
ལྡི་ལི་ས་གནས་སུ་ནོ་བེལ་ཞི་བདེའི་གཟེངས་རྟགས་བཞེས་མཁན་རྒྱལ་སྤྱིའི་མི་སྣ་ཁག་གཅིག་གདན་འདྲེན་ཞུས་ཏེ་ལས་རིམ་སྤེལ་རྒྱུ་ཡིན། དེ་བཞིན་ཕྱི་ཟླ་ ༡༢ ཚེས་ ༡༠ ཉིན་༸གོང་ས་མཆོག་གིས་ནོ་བེལ་ཞི་བདེའི་གཟེངས་རྟགས་བཞེས་ནས་ལོ་ ༢༥ འཁོར་གྱི་ཡོད་སྟབས། རྡ་སའི་གཙོས་བོད་མི་གནས་སྡོད་ས་གནས་ཁག་ཚང་མར་དུས་ཆེན་སྲུང་བརྩི་གཟབ་རྒྱས་ཞུ་རྒྱུ་ཡིན། ལས་ཁུངས་ཁག་ལྔ་ལ་ལས་འཆར་བགོས་པ་གཞིར་བཟུང་སོ་སོའི་ཁྱབ་ཁོངས་སུ་ཡོད་པའི་གཞིས་ཆགས་ཁག་དང་། ཆོས་སྡེ་ཁག སློབ་གྲྭ་ཁག་གི་ནང་ལས་འཆར་སྤེལ་རྒྱུ་ཡིན་པའི་ངོ་སྤྲོད་གནང་།
དེ་ནས་གོ་སྒྲིག་ཚོགས་ཚུང་གི་ཚོགས་གཙོ་བཀྲ་ཤིས་ཕུན་ཚོགས་ལགས་ཀྱིས་སྐད་ཡིག་གཞན་གྱི་གསར་འགོད་པའི་ཆེད་དབྱིན་སྐད་ཐོག་ལས་འཆར་ཁག་ཞིབ་ཕྲ་ངོ་སྤྲོད་གནང་བ་མ་ཟད། གསར་འགོད་པའི་དྲི་བ་ཁག་ལ་ལན་འདེབས་ཀྱང་གནང་འདུག
