༢༠༠༩ ཕྱི་ཟླ་ ༡༠ ཚེས་ ༨ རེས་གཟའ་ཕུར་བུ།
༸གོང་ས་མཆོག་ལ་ཁལ་གྷ་རི་གྲོང་ཁྱེར་སྤྱི་ཁྱབ་པས་སྲོལ་རྒྱུན་གྱི་དབུ་ཞྭ་དཀར་པོ་དང་བྱ་སྒྲོ་ཕུལ་ཏེ་ཕེབས་བསུ་ཞུས་པ།
༄༅། །ཕྱི་ཟླ་ ༩ ཚེས་ ༣༠ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཁལ་གྷ་རི་གཙུག་ལག་སློབ་གཉེར་ཁང་ནས་གདན་ཞུའི་གསོལ་འདེབས་ཞུས་དོན་ལྟར་ཆིབས་སྒྱུར་བཀའ་དྲིན་ཆེ་བ་བསྐྱངས་ཏེ་ཁེ་ཎ་ཌའི་གྲོང་ཁྱེར་ཁལ་གྷ་རིའི་གནམ་ཐང་དུ་༸ཞབས་སོར་འཁོད་སྐབས་ཕེབས་བསུར་ས་གནས་བོད་རིགས་ཚོགས་པས་བོད་ཀྱི་སྲོལ་རྒྱུན་གྱི་གྲོ་སོ་ཕྱེ་མར་འདེགས་འབུལ་དང་སྦྲགས་ཕེབས་བསུ་ཞུས་ཡོད་པ་དང། ཁལ་གྷ་རི་གཙུག་ལག་སློབ་གཉེར་ཁང་གི་སློབ་སྤྱི་མཆོག་ནས་ལྷ་རྫས་ཁ་བཏགས་དཀར་གཙང་འབུལ་ལམ་
༸གོང་ས་མཆོག་ཁལ་གྷ་རི་གཙུག་ལག་སློབ་གྲྭ་ཆེ་མོས་ཆེ་བསྟོད་ཀྱི་མཁས་དབང་ཕྱག་འཁྱེར་འབུལ་ལམ་ཞུ་བཞིན་པ།
གྱི་ཕེབས་བསུ། དེ་བཞིན་ལྷོ་ཨལ་བ་ཌའི་གདོད་མའི་མི་རིགས་ཀྱི་དབུ་ཁྲིད་དང་། ཁལ་གྷ་རི་གྲོང་ཁྱེར་སྤྱི་ཁྱབ་མཆོག་སོགས་ཆེད་བཅར་ཞུས་ཏེ་ཕེབས་བསུ་ཞུས་ཡོད་པ་མ་ཟད་སྐབས་དེར་ཁལ་གྷ་རི་གྲོང་ཁྱེར་སྤྱི་ཁྱབ་སྐུ་ཞབས་སྦོ་རོན་ཁོ་ནི་ཡེར་མཆོག་ནས་མགོན་པོ་གང་ཉིད་ལ་ཧ་ཅང་ཚད་མཐོའི་གུས་བཀུར་ཆེན་པོའི་ཐོག་ནས་ཡུལ་དེའི་སྲོལ་རྒྱུན་གྱི་མཚན་མཐོང་ཆེ་བའི་རྒྱ་གར་ཞྭ་མོ་དཀར་པོ་ཞིག་བསྒྲོན་པ་དང་བྱ་སྒྲོ་ཞིག་འབུལ་ལམ་ཞུས་ཏེ་ཕེབས་བསུ་གཟབ་རྒྱས་ཞུས་ཡོད་པ་རེད། དབུ་ཞྭ་དཀར་པོ་འདི་ནི་གྲོང་ཁྱེར་འདིར་ཧ་ཅང་ཆེས་མཐོའི་གནད་ཡོད་མི་སྣར་མ་གཏོགས་བསྒྲོན་སྲོལ་མེད་པ་ཞིག་ཡིན་འདུག
ཐེངས་འདིར་༸གོང་ས་མཆོག་ལ་ཁལ་གྷ་རི་གཙུག་ལག་སློབ་གཉེར་ཁང་ནས་གདན་ཞུའི་གསོལ་འདེབས་ཞུས་དོན་ལྟར་སློབ་གཉེར་ཁང་དེའི་གོ་སྒྲིག་ཞུས་པའི་ད་ལྟ། ཞེས་པའི་ལྷན་ཚོགས་ཀྱི་ཚོགས་མགོན་དུ་ཕྱི་དྲོ་ཆུ་ཚོད་ ༡།༣༠ ཐོག་ཆིབས་སྒྱུར་བསྐྱངས་ཏེ་སློབ་ཕྲུག་དང་མང་ཚོགས་གྲངས་ ༢༠༠༠༠ བརྒལ་བར་བྱམས་བརྩེ་ལ་བརྟེན་ནས་ཞི་བདེ་སྤེལ་བ་ཞེས་པའི་བཀའ་སློབ་སྩལ་ཡོད། སྐབས་དེར་༸གོང་ས་མཆོག་ནས་བཀའ་སློབ་མ་གནང་སྔོན་དུ་ཕྱི་རྒྱལ་བ་དང་བོད་རིགས་སོགས་ནས་ཕེབས་བསུའི་རོལ་དབྱངས་སྣ་ཚོགས་དང་འཁྲབ་སྟོན་བགྱིས་ཏེ་གཟིགས་ཕུད་འབུལ་ལམ་ཞུས་ཡོད། དེ་རྗེས་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་ཕེབས་ཡོད་པའི་ནང།། ཞི་བདེ་ནི་དྲག་སྤྱོད་མེད་པ་ཙམ་མིན། གཞན་གྱི་འཚོ་གནས་དང་བདག་དབང་ལ་བརྩི་འཇོག་ཡོད་པའི་ཐོག་ནས་དྲག་སྤྱོད་ལ་ཚོད་འཛིན་བྱེད་པ་ཞིག་ཡིན་པ་རེད། ཅེས་སོགས་ཀྱི་བཀའ་སློབ་ཕེབས་ཡོད། དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་ནས་དུས་རྒྱུན་དུ་ང་ཚོ་ནི་གཅིག་ལ་གཅིག་རྟེན་ཞིག་ཡིན་ཞེས་བཀའ་སློབ་ཕེབས་ཀྱི་ཡོད་པ་ལྟར་བཀའ་སློབ་ཞུ་མཁན་ཡོངས་ཀྱི་རང་གི་སྐེ་ལ་དཀར་གཙང་ཁ་བཏགས་རེ་གྱོན་ཏེ་ཕན་ཚུན་ལག་གདང་སྦྲེལ་ཏེ་ཚང་མ་གཅིག་གིས་གཅིག་ལ་འབྲེལ་བ་ཡོད་པ་མཚོན་པར་བྱས་ཡོད། སྐབས་དེར་༸གོང་ས་མཆོག་ནས་བཀའ་སློབ་ཕེབས་པའི་ནང་དུ་ནང་སེམས་ཀྱི་ཞི་བདེ་དེ་ཇི་ལྟར་སྤེལ་དགོས་སམ་ཞེ་ན། ནང་སེམས་ཀྱི་ཞི་བདེའི་གནད་དོན་དེས་རང་ཉིད་ལ་ཡིད་ཆེས་བརྟན་པོའི་འདུན་པ་ཆེན་པོ་ཞིག་སྐྱེས་པ་ཡིན་ལ་དེ་ནི་གལ་ཆེན་པོ་ཡིན། ཞེས་སོགས་ཀྱི་ཞི་བདེ་སྤེལ་ཐབས་སྐོར་ལ་བཀའ་སློབ་ཟབ་རྒྱས་སྩལ་གྲུབ་རྗེས་ཚོགས་ཁང་དེའི་ནང་བཅར་བའི་མི་དམངས་ཡོངས་རྫོགས་ཡར་ལངས་ནས་༸གོང་ས་༸སྐྱབས་མགོན་ཆེན་པོ་མཆོག་ལ་བཀའ་དྲིན་ཆེ་ཞུ་བའི་དགའ་བསུའི་རྣམ་པ་གསལ་པོ་བསྟན་ཡོད་པ་རེད།
