༢༠༡༤ ཟླ་ ༥ ཚེས་ ༡༦ རེས་གཟའ་པ་སངས།
༄༅། །ཕྱི་ལོ་ ༢༠༡༤ ཟླ་ ༥ ཚེས་ ༡༥ ཉིན་གྱི་སྔ་དྲོ་ཆུ་ཚོད་ ༨།༣༠ ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕེ་རེང་ཀོ་ཕོ་ཊིར་(Frankfurt) རྟེན་གཞི་བྱས་པའི་ (Museum of Modern Art) ཞེས་པའི་ནང་ཇར་མན་དུ་གནས་སྡོད་བོད་རིགས་ ༣༠༠ བརྒལ་བར་བཀའ་སློབ་སྩལ་དོན། ངོས་རང་དེ་རིང་འདི་གར་ཡོང་ནས་ཁྱེད་རང་ཚོ་དང་ཐུག་རྒྱུ་བྱུང་བར་ཧ་ཅང་དགའ་པོ་བྱུང། ང་ཚོ་བོད་མི་རིགས་དང་རྒྱལ་ཁབ་ཀྱི་བླ་སྲོག་ལྟ་བུར་གྱུར་བའི་བོད་མི་རིགས་ཀྱི་སྐད་ཡིག་སྲུང་སྐྱོབ་བྱེད་རྒྱུ་ཧ་ཅང་གལ་ཆེན་པོ་ཆགས་ཡོད། དེ་བཞིན་རྒྱལ་ཁབ་དང་མི་རིགས་ཀྱི་མདུན་ལམ་ལེགས་པོ་ཡོང་ཆེད་མང་གཙོའི་ལམ་དུ་བསྐྱོད་རྒྱུ་གལ་འགངས་ཆེན་པོ་ཆགས་ཡོད། ལྷག་པར་ཁྱེད་རང་ཚོ་གཞོན་སྐྱེས་ཚོས་བོད་སྐད་དང་བོད་ཡིག་སྦྱང་དགོས། སྤྱིར་བཏང་ཁྱེད་རང་ཚོ་འདི་གར་སྐྱེས་འཚར་བྱུང་ཡོད་ཀྱང་བོད་པའི་སྐད་ཡིག་ཡིིན་གཅིག་མིན་གཅིག་ཤེས་ཐུབ་པ་བྱས་ཏེ་མ་བརྗེད་པ་བྱེད་དགོས། དེང་སྐབས་ང་ཚོ་མང་གཙོའི་ལམ་དུ་བསྐྱོད་དང་སྐྱོད་བཞིན་ཡོད། ངོས་ཀྱིས་ཆབ་སྲིད་ཀྱི་ལས་འགན་ཡོངས་རྫོགས་མཚམས་འཇོག་བྱས་པ་ཡིན། དེ་ནི་ངོས་རང་སེམས་ཤུགས་ཆག་པ་དང་བོད་སྤྱི་པའི་དོན་ལ་རེ་བ་མེད་པར་ཆབ་སྲིད་ཀྱི་འགན་ཁུར་བཞག་པ་མིན། གང་ལྟར་ང་ཚོ་མང་གཙོའི་ལམ་དུ་འགྲོ་རྒྱུ་ཧ་ཅང་གལ་ཆེན་པོ་རེད། ངོས་རང་ཆུང་དུས་ནས་མང་གཙོའི་ལམ་ལུགས་ལ་དགའ་ཞེན་ཆེན་པོ་ཡོད། ང་ཚོ་རྒྱ་གར་ལ་སྐྱབས་བཅོལ་དུ་བསླེབས་རྗེས་མང་གཙོའི་ལམ་ནས་སྤྱི་འཐུས་བསྐོ་གཞག་བྱས་པ་རེད། ཕྱི་ལོ་ ༢༠༠༡ ལོར་བཀའ་བློན་ཁྲི་པ་མི་མང་གིས་འོས་བསྡུ་བྱས་ཏེ་བསྐོ་གཞག་བྱས་པ་ཞིག་ཆགས་ཡོད། ཆབ་སྲིད་ཀྱི་འགན་དབང་གཙོ་བོ་བཀའ་བློན་ཁྲི་པས་ཁུར་ཏེ་ངོས་རང་ཕྱེད་རྒན་ཡོལ་གྱི་གནས་སྟངས་ཐོག་བསྡད་པ་ཡིན། ཕྱི་ལོ་ ༢༠༡༡ ནས་ངོས་རང་རྒན་ཡོལ་ཆ་ཚང་ཞུས་པ་ཡིན། དེ་བཞིན་བཀའ་བློན་ཁྲི་པའི་མིང་ཡང་སྲིད་སྐྱོང་ལ་བསྒྱུར་བ་རེད། ངོས་ཀྱིས་ལོ་བཅུ་དྲུག་སྐབས་སྲིད་སྐྱོང་སྟག་བྲག་རིན་པོ་ཆེའི་དྲུང་ནས་ཆབ་སྲིད་ཀྱི་འགན་དབང་ཞུས་པ་ཡིན། ངོས་རང་ལོ་བདུན་ཅུ་དོན་དྲུག་ལ་བསླེབས་སྐབས་མང་གཙོའི་ལམ་ནས་འོས་བསྡུ་བྱས་ཏེ་བསླེབས་པའི་སྲིད་སྐྱོང་ལ་འགན་དབང་ཕུལ་བ་ཡིན། དེ་ནི་རླབས་ཆེན་ཞིག་རེད། ཅེས་སྐབས་དེའི་མཛད་སྒོར་ངོས་ཀྱིས་བཤད་པ་ཡིན།
ཆབ་སྲིད་ཀྱི་ལས་འགན་རྣམས་འོས་བསྡུ་བྱས་ཏེ་བསླེབས་པའི་འགོ་ཁྲིད་ཀྱིས་གཙང་མ་འཁྱེར་སྐབས། རྒྱ་མི་མཁྲེགས་བཟུང་བྱེད་མཁན་ཚོས་བོད་པའི་གནད་དོན་དེ་ཏཱ་ལའི་བླ་མར་ཐུག་ཡོད་པར་བརྟེན། ཏཱ་ལའི་བླ་མ་འཆི་སོང་ན་བོད་པའི་གནས་ཚུལ་མེད་པ་ཆགས་ཀྱི་རེད། ཅེས་སྔོན་མ་ནས་ཤོད་ཀྱི་འདུག ད་ཆ་དེ་ལྟར་ཤོད་རྒྱུ་ལྷག་མེད། ངོས་འཆི་ཡང་མི་མང་གིས་ལོ་ལྔ་རེའི་མཚམས་སུ་འོས་བསྡུའི་ལམ་ནས་འདེམས་ཐོན་བྱུང་བའི་འགོ་ཁྲིད་མུ་མཐུད་གནས་ཀྱི་རེད། དེར་བརྟེན་ང་ཚོས་འཇོན་ན་ང་ཚོའི་འགྲོ་སྟངས་ཧ་ཅང་བརྟན་པོ་ཆགས་ཡོད། དེ་བཞིན་ཆབ་སྲིད་ཀྱི་ངོ་བོའི་ཐོག་ནས་བརྩིས་ཀྱང་ཕར་ཕྱོགས་དེར་རྒྱ་མི་སྟོབས་ཤུགས་ཆེན་པོ་ཡོད་ཀྱང་གཅིག་བསྡུས་རིང་ལུགས་རེད། འཛམ་གླིང་གི་ཁྲོམ་རྭའི་ནང་གཅིག་བསྡུས་རིང་ལུགས་ཀྱི་ལམ་ལུགས་དེ་དུས་ཚོད་ཡོལ་ཟིན་པ་ཆགས་ཡོད། ང་ཚོ་ཆུང་ཆུང་ཡིན་རུང་མང་གཙོའི་ལམ་ཐོག་བརྒྱ་ཆ་བརྒྱ་ཐམ་པ་བསྐྱོད་ཀྱི་ཡོད་སྟབས། དེ་ང་ཚོའི་གཟི་བརྗིད་རེད། ཅེས་སོགས་ཀྱི་བཀའ་སློབ་སྩལ་ཡོད། །
