༢༠༠༩ ཕྱི་ཟླ་ ༡༠ ཚེས་ ༦ རེས་གཟའ་མིག་དམར།
༄༅། །ཕྱི་ལོ་ ༢༠༠༩ ཟླ་ ༡༠ ཚེས་ ༤ ཉིན་༸གོང་ས་མཆོག་ནས་ཁེ་ཎ་ཌའི་གྲོང་ཁྱེར་མོཎ་ཊི་རིལ་གནམ་ཐང་གི་ཉེ་འགྲམ་དུ་ཡོད་པའི་ཝེན་ཌན་ཞེས་པའི་མགྲོན་ཁང་གི་ཚོགས་ཁང་ནང་ས་གནས་བོད་རིགས་དང་། ཉེེ་འཁོར་གྱི་ཞིང་ཆེན་ཨོན་ཊེ་རི་གྲོང་ཁྱེར་ཊོ་རོན་ཊོ་ནས་ཕེབས་པའི་བོད་མི་ཁག་གཅིག དེ་བཞིན་ཨ་རིའི་མངའ་སྡེ་ཁག་གཅིག་བཅས་ཁྱོན་བསྡོམས་བོད་མི་གྲངས་ ༡༥༠༠ བརྒལ་བ་འདུ་འཛོམས་བྱུང་བའི་ཚོགས་མགོན་དུ་ཆིབས་སྒྱུར་བཀྲིན་ཆེ་བ་བསྐྱངས། སྐབས་དེར་ཐོག་མར་མོཎ་ཊི་རེལ་ས་གནས་བོད་རིགས་ཚོགས་པའི་ཚོགས་གཙོ་འགྱུར་མེད་རྡོ་རྗེ་ལགས་ནས་ལས་སྡོམ་སྙིང་བསྡུས་ཤིག་༸གོང་ས་མཆོག་ལ་སྙན་སྒྲོན་ཞུས་ཡོད། དེ་རྗེས་མགོན་པོ་གང་ཉིད་ནས་བཀའ་སློབ་སྩལ་དོན། ན་ནིང་ལོ་དེ་ཕྱོགས་གཅིག་ནས་བསམ་བློ་བཏང་ན་ལོ་ནག་ལྟ་བུ་ཞིག་ཆགས་པ་རེད། གང་ལྟར་ཕྱི་ལོ་ ༢༠༠༨ ཟླ་ ༣ ཚེས་ ༡༠ ནས་བཟུང་འགོ་སྟོད་ལྷ་ས་ནས་འགོ་བཙུགས་དེ་ནས་བོད་ས་ཁུལ་ཡོངས་སུ་རྫོགས་པར་གང་ལྟར་མི་རབས་ནས་མི་རབས་སེམས་ཀྱི་ནང་ལ་ནད་མ་འཁྱོག་པ་གཅིག་ཡོད་པ་དེ་དངོས་སུ་རང་སྲོག་བློས་བཏང་ཐོག་ནས་ཕྱིར་བཏོན་པ་རེད། ཞེས་བཀའ་སྩལ་བ་དང་། དེ་བཞིན་མགོན་པོ་གང་ཉིད་ནས་ན་ནིང་གི་གསུམ་བཅུའི་དུས་དྲན་གྱི་དོན་རྐྱེན་དེ་བྱུང་རྗེས་ཕྱིར་སྡོད་རྒྱ་རིགས་ཚོས་དོན་ངོ་མ་ཤེས་པའི་རྗེས་བོད་མིར་ཤ་ཚ་དང་། རྒྱབ་སྐྱོར། གདུང་སེམས་མཉམ་སྐྱེ་ཀྱི་ནུས་པ་དེ་ཆེ་རུ་ཕྱིན་ཡོད་སྐོར་ཡང་བཀའ་ཕེབས་དོན། ཁར་ཐུག་དེར་རྒྱ་རིགས་བློ་གཟུ་བོར་གནས་པ་མང་པོ་ཞིག་གིས་བསམ་བློ་འཁོར་ཐག་ཆོད་རེད་འདུག དེ་བཞིན་འདས་པའི་ལོ་གཅིག་ལྷག་ཙམ་གྱི་རིང་ལ་ངོས་ལ་རྒྱ་རིགས་མང་པོ་ཐུག་བྱུང་། རྒྱ་རིགས་ཤེས་ཡོན་ཅན་དེ་འདྲ་མང་པོ་ཐུག་པ་རེད། མང་པོ་གཅིག་གིས་འདིའི་གོང་ལ་བོད་སྐོར་གང་ཡང་ཤེས་ཀྱི་མེད་བོད་སྐོར་ཤེས་པ་དེ་ཡང་རྒྱ་ནག་གཞུང་གིས་དྲིལ་བསྒྲགས་བྱས་པ་དེ་མ་གཏོགས་དོ་སྣང་གང་ཡང་བྱེད་ཀྱི་མེད། ན་ནིང་གསུམ་བཅུའི་དོན་རྐྱེན་དེ་བྱུང་བའི་རྗེས་བོད་ཀྱི་གནས་ཚུལ་དེ་ག་འདྲ་ཡིན་མིན་གཞི་ནས་སོ་སོའི་རྟག་དཔྱད་བྱེད་དགོས་རྒྱུ་ཞིག་དང་ཉམས་ཞིབ་བྱེད་དགོས་རྒྱུ་ཞིག་བྱུང་སོང་། དེ་འདྲ་བྱུང་བ་ཡིན་དུས་བོད་པའི་གནས་ཚུལ་དེ་དངོས་གནས་དྲང་གནས་དང་བོད་པ་ཚོར་ཁག་རྩ་བ་ནས་མི་འདུག ཅེས་མང་པོ་གཅིག་གིས་བོད་པར་ཤ་་ཚ། རྒྱབ་སྐྱོར། གདུང་སེམས་མཉམ་སྐྱེ་དབྱིན་སྐད་ནང་ solidarity ང་ཚོ་བོད་པ་དང་ལངས་ཕྱོགས་གཅིག་གྱུར་བྱས་ནས་གང་ལྟར་དམངས་གཙོ་གཅིག་བསྡུས་ཐོག་ནས་མ་དགའ་བ་བྱས་ཏེ་གཏམ་བརྗོད་རང་དབང་མེད་པ་དང་། འགྲོ་བ་མིའི་ཐོབ་ཐང་མེད་པ་དེ་ཚོའི་ཐོག་ལ་གདུང་སེམས་མཉམ་སྐྱེ་བྱ་རྒྱུའི་ནུས་པ་ཧ་ཅང་ཤུགས་ཆེ་རུ་ཕྱིན་ཡོད། ཅེས་བཀའ་སློབ་ཕེབས་ཡོད། དེ་བཞིན་༸གོང་ས་མཆོག་གིས་བཙན་བྱོལ་དུ་ཡོད་པའི་བོད་མི་ཚོས་རང་གི་ཆོས་དང་རིག་གཞུང་བདག་གཅེས་དགོས་གལ་ཆེ་བའི་སྐོར་ལ་ཡང་བཀའ་སློབ་ལམ་སྟོན་ཟབ་མོ་ཕེབས་ཡོད་པ་མ་ཟད་ད་དུང་༸གོང་ས་མཆོག་ནས་བོད་མི་ཚོར་བཀའ་ཕེབས་དོན། ཁྱེད་རང་ཚོ་ཚང་མ་འཆམ་པོ་དང་མཐུན་པོ་བྱེད། བོད་མི་ཡིན་བསམ་པའི་སྤོབས་པ་དང་སྦྲགས་དེའི་ཐོག་ལ་ལས་ཀ་ལ་དང་དོད་བྱེད། ཉམས་ཆུང་བྱེད། ཡུལ་མི་ཚོ་དངོས་ནས་བཀའ་དྲིན་ཆེན་པོ་རེད་ལ་ཁོང་ཚོ་དང་ལྷན་དུ་འཆམ་པོ་དང་མཐུན་པོ་བྱས་ཏེ་འགྲེལ་བཤད་ཡག་པོ་རྒྱོབ། ལྷག་པར་དུ་རྒྱ་རིགས་དེ་འདྲ་ཐུག་པའི་སྐབས་ལ་འགྲེལ་བཤད་ཡག་པོ་རྒྱོབ། དེ་གལ་ཆེན་པོ་ཞེ་དྲག་རེད། ནམ་རྒྱུན་དཀའ་ངལ་འདྲ་འཕྲད་པ་ཡིན་ན་གཅིག་གིས་གཅིག་ལ་རོགས་བྱེད་རྒྱུ་དང་ཕན་ཐོགས་བྱེད་རྒྱུ་དེ་གལ་ཆེན་པོ་རེད། དེ་སེམས་ལ་བཞོག་ཨང་། བཀྲིས་བདེ་ལེགས། ཞེས་བཀའ་སློབ་བཀའ་དྲིན་ཆེ་བ་ཕེབས་ཡོད།
