༢༠༡༤ ཟླ་ ༥ ཚེས་ ༡༤ རེས་གཟའ་ལྷག་པ།
དོལ་རྒྱལ་གནད་དོན་ལ་རྒྱ་ནག་གཞུང་གིས་མངོན་ལྐོག་གཉིས་ནས་ཐེ་གཏོགས་ཤུགས་ཆེན་བྱེད་བཞིན་ཡོད་པར་བརྟེན། སྔར་ནས་ཆོས་ལུགས་ནང་ཁུལ་གྱི་གནད་དོན་གཅིག་པུ་ཞིག་མིན་པར། ཆབ་སྲིད་ཀྱི་གནད་དོན་ཞིག་ཏུ་གྱུར་ཡོད། བལྟས་ཚོད་ལ་བོད་བརྒྱུད་ནང་བསྟན་གྱི་ཆོས་ལུགས་དད་མོས་རང་དབང་རྩོད་ལེན་བྱེད་ བཞིན་པ་ལྟ་བུའི་ནུབ་ཕྱོགས་ཀྱི་དོལ་རྒྱལ་རྗེས་འབྲང་པ་དག་གིས། དུས་ནམ་ཡང་བོད་མིའི་བསམ་བློ་ལ་རྒྱུས་ལོན་བྱ་ཐབས་བྲལ་བ་མ་ཟད། དུས་གཏན་དུ་བོད་མིའི་བསམ་བློའི་འཇིག་རྟེན་མཐོང་མི་ཐུབ། དྲང་པོར་བཤད་ན། ཁོང་ཚོས་འཁྲབ་སྟོན་ཞིག་བྱེད་བཞིན་པ་དང་ཧ་ཅང་མཚུངས།
བོད་ལ་རྒྱལ་སྤྱིའི་རྒྱབ་སྐྱོར་དགོས་མཁོ་ཡོད་ནའང་། བོད་མི་ལས་ལྷག་པའི་བོད་ལ་རྒྱུས་མངའ་ཡོད་མདོག་བྱེད་མཁན་དག་གིས་ང་ཚོའི་ཆེད་ དུ་རྐང་བརྡ་ལག་བརྡ་བྱེད་དགོས་དོན་མེད། མི་དེ་དག་གིས་བོད་བརྒྱུད་ནང་བསྟན་གྱི་མིང་ཐོག་ནས་བོད་ལ་དཀའ་སྡུག་མི་སྟེར་བ་དང་། བོད་བརྒྱུད་ནང་བསྟན་གྱི་མིང་ཐོག་ནས་དུས་ཚོད་དེ་ལྟར་མང་པོ་ཞིག་བཏང་སྟེ་བོད་ ཀྱི་གནད་དོན་ལ་ཐེ་བྱུས་མི་བྱེད་པའི་རེ་བ་ཡོད། རང་སྣང་མཐོ་བའི་ཆོས་ལུགས་རྫུན་མ་ཞིག་གི་ཚོར་བའི་ནང་དུ་ཐིམ་ཏེ། མི་སེར་སྤེལ་བའི་དྲག་པོའི་དབང་ཤུགས་ཀྱིས་བོད་ལ་ཁ་གཏད་པའི་མདེའུ་ཞིག་ཏུ་གྱུར་མི་རུང་།
རང་ཉིད་བོད་མི་ཞིག་ཡིན་པའི་ངོས་ནས། བོད་ཕྱི་ལོགས་སུ་ཡོད་པའི་བཙན་བྱོལ་བོད་མི་ཡིན་ནའང་འདྲ། བོད་ནང་དུ་ཡོད་པའི་རང་དབང་མེད་པའི་བོད་མི་ཡིན་ཡང་རུང་། འདི་ལྟ་བུའི་བོད་ཀྱི་སྲོལ་རྒྱུན་གྱི་སྤྱི་ཚོགས་རྙིང་པའི་གནད་དོན་ཞིག་ལ་ གདོང་ལེན་བྱེད་སྐབས། དེའི་ཁྲོད་ཀྱི་རྙོག་འཛིང་ཆེ་བའི་རྒྱུ་རྐྱེན་ངོ་ཤེས་དགོས། རྒྱལ་ཁབ་ཆེན་པོ་དང་མི་ཆུང་ངུ་མཉམ་དུ་བསྲེས་པ་དང་། ཆབ་སྲིད་དང་སྒེར་དོན། བརྒྱུད་བསྒྲགས་དང་གསང་བ། དྲག་ཤུགས་དང་ཉེས་འཛུགས། ཉོ་བསླུ་དང་རྒྱབ་འགལ་སོགས་ཀྱི་གཡོ་ཇུས་ལམ་ནས། དོལ་རྒྱལ་ཤོག་ཁག་གིས་སྐད་ཅོར་ཆེན་པོས་༧གོང་ས་མཆོག་ལ་སྐྱོན་འཛུགས་བྱེད་བཞིན་ཡོད། གལ་སྲིད་བོད་མི་ཁོང་ཁྲོ་ལངས་པའི་བྱེད་སྟངས་ཐོག་ནས་དོལ་རྒྱལ་ཤོག་ཁག་ལ་དམའ་འབེབས།
དཔེར་ན་མཆིལ་མ་འཕེན་པ་དང་། ཅ་ལག་གཡུགས་པ་སོགས་བྱེད་ན། ཕན་ཐོགས་པ་ཕར་བཞག དེ་ལས་ལྡོག་ཏེ་བོད་ཀྱི་མཚན་སྙན་ལ་གནོད་སྲིད། དོལ་རྒྱལ་ཤོག་ཁག་གིས་འཁྲབ་སྟོན་བྱེད་སའི་སྡིངས་ཆ་འདི་ལྟ་བུ་ལ། རབ་ཏུ་བྱུང་ན་ཁ་ཡ་མ་བྱས་ན་བཟང་། གང་ཞིག་བཤད་དང་འཁྲབ་མིན་ལ་མ་ལྟོས་པར་གང་འདོད་ལྟར་ཁོང་ཚོའི་མགྲིན་པ་མ་ན་བར་ དུ་འབོད་བཅུག་དགོས། གལ་སྲིད་ཁོང་ཁྲོའི་རྣམ་པའི་ཐོག་ནས་ཚོར་བའི་ལམ་དུ་སོང་བ་ཡིན་ན། ཁོང་ཚོའི་མིག་དབང་འདྲེན་པའི་གོ་སྐབས་འཕར་མ་ཞིག་སྤྲད་པ་དང་མཚུངས།
མདོར་བསྡུས་ནས་བཤད་ན། ངའི་སྤུན་ཟླ་ཚོ། བློ་སེམས་རྣལ་དུ་ཕབ་ཏེ། དུས་རབས་ཉེར་གཅིག་པའི་སའི་གོ་ལའི་རང་བཞིན་གྱི་བྱེད་ཐབས་ལ་བརྟེན་ནས། རྟོག་དཔྱོད་དང་ལྡན་པའི་སྒོ་ནས་དངོས་ཡོད་ཀྱི་བདེན་དཔང་ལ་ཁུངས་གཏུགས་ཏེ། རྒྱུ་མཚན་དང་ལྡན་པའི་དངོས་ཡོད་གནས་ཚུལ་རེ་རེ་བཞིན་སྟོན་རོགས་གནང་། མང་གཙོའི་ཐོག་ནས། ཡོངས་གྲགས་ཐོག་དོལ་རྒྱལ་གྱི་རྒྱབ་ཏུ་སྦས་ཡོད་པའི་གསང་བ་ཕྱིར་བསྒྲགས་དགོས། བོད་ཀྱི་ཧ་ལས་པའི་གཡོ་ཇུས་ཤིག་དངོས་སུ་ཁྱུར་མིད་གཏོང་བཞིན་ཡོད།།
ཏྲེ་ཧོར་ཐུབ་བསྟན་གྱིས་བསྒྱུར།
