༢༠༠༩ ཕྱི་ཟླ་ ༡༠ ཚེས་ ༦ རེས་གཟའ་མིག་དམར།

༄༅། །ཨ་རི་ཝ་ཤིང་ཀྲོན་དུ་བཅའ་བཞུགས་བོད་དོན་དམིགས་བསལ་སྐུ་ཚབ་སྐུ་ལྕམ་མ་རི་ཡ་ཨོ་ཊེ་རོ་མཆོག་ལ།

ཆེད་ཞུ།

སྐུ་ཉིད་དེ་སྔ་རྡ་རམ་ས་ལར་བོད་དོན་དམིགས་བསལ་སྐུ་ཚབ་མིང་བཏགས་ཤིག་གི་ཚུལ་དུ་ཕེབས་པར་དགའ་ཚོར་ཆེན་པོ་བྱུང་ལ། དེ་ནས་ད་ལྟ་སྐུ་ཚབ་རང་དུ་དངོས་སུ་བསྐོ་བཞག་བྱུང་བར་དགའ་ཚོར་དེ་ལས་མང་བ་བྱུང་།

ང་ཚོའི་གོ་རྟོགས་ལ་སྐུ་ཉིད་དམིགས་བསལ་སྐུ་ཚབ་ཏུ་རྒྱ་ནག་དམར་པོའི་གཞུང་དབུ་བརྙེས་ནས་ལོ་ ༦༠ འཁོར་བའི་དུ་ཆེན་སྲུང་བརྩི་ཞུ་བའི་ཉིན་དེར་བསྐོ་བཞག་བྱས་པས་སྐུ་ཞབས་ཨོ་སྦ་མའི་གཞུང་གིས་བོད་དོན་ཐོག་གལ་འགངས་ཇི་ཙམ་སྤྲོད་པའི་ཆབ་སྲིད་ཀྱི་བརྡ་ལན་ཛ་དྲག་ཅིག་གཏོང་བཞིན་ཡོད་རེད།

ངེད་ཅག་གིས་ཕན་ཚུན་ལྷན་དུ་ལས་དོན་གྲུབ་འབྲས་ལྡན་པ་ཞིག་འབྱུང་རྒྱུའི་འདུན་པ་དང་། སྐུ་ཉིད་ཀྱིས་ལངས་ཕྱོགས་ཇི་བཟུང་གིས་བོད་མི་དང་། རྒྱ་ནག་མི་མང་རྣམས་ཀྱི་ཕུགས་རྒྱང་རིང་པོའི་ཁེ་ཕན་ཆེད་བོད་དོན་དཀའ་རྙོག་སེལ་བར་རོགས་ཕན་ཡོང་བའི་རེ་བ་བྱེད་ཀྱི་ཡོད།  འཚམས་འདྲི་དང་། གུས་འདུད་བཅས། བོད་མི་མང་སྤྱི་འཐུས་ཚོགས་གཙོ་ནས་ཕྱི་ལོ་ ༢༠༠༩ ཟླ་ ༩ ཚེས་ ༥ ཉིན་ཕུལ།