༢༠༡༤ ཟླ་ ༥ ཚེས་ ༡༢ རེས་གཟའ་ཟླ་བ།
༄༅། །ཕྱི་ལོ་ ༢༠༡༤ ཟླ་ ༥ ཚེས་ ༩ རེས་གཟའ་པ་སངས་ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ནོར་ཝེའི་རྒྱལ་ས་ཨོ་སི་ལོའི་ནང་རྟེན་གཞི་བྱས་པའི་གྲོས་ཚོགས་ཀྱི་ཚོགས་ཁང་དུ་ཆིབས་སྒྱུར་བསྐྱངས་སྟེ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་ཀྱིས་ཕེབས་བསུ་གཟབ་རྒྱས་ཞུས་ཡོད། སྐབས་དེར་གྲོས་ཚོགས་འཐུས་མི་སྐུ་ཞབས་ཀེ་ཏིལ་ཀེ་ཇེན་སེ་ཏི་ Ketil Kjenseth མཆོག་དང་། ལིབ་སིག་ནེ་ན་ཝར་སེ་ཏི་ Liv Signe Navarsete མཆོག་གིས་གཙོས་གྲོས་ཚོགས་འཐུས་མི་རྣམས་དང་། ནོར་ཝེའི་གཞོན་སྐྱེས་ཚོགས་པའི་སྐུ་ཚབ་འཐུས་མི་སོགས་ཀྱིས་ངོ་སྤྲོད་ཞུས་གྲུབ་བསྟུན། ༸གོང་ས་མཆོག་གིས་བཀའ་སློབ་སྩལ་དོན།
གཅེན་གཅུང་རྣམ་པས་ངོས་ལ་མགྲོན་འབོད་གནང་བ་བར་ཆེ་མཐོང་ཆེན་པོ་ཐོབ་པ་ཞིག་བྱུང་། ངོས་རང་མང་གཙོའི་རིང་ལུགས་ལ་རྒྱབ་སྐྱོར་ཤུགས་ཆེན་པོ་བྱེད་མཁན་ཞིག་ཡིན། འཛམ་གླིང་འདི་འཛམ་གླིང་མི་མང་ལ་དག་ཡོད། འཛམ་གླིང་འདིའི་བདག་པོ་ནི་འཛམ་གླིང་འདིའི་ནང་འཚོ་བཞིན་པའི་མི་མང་རྣམས་ཡིན། རྒྱལ་ཁབ་སོ་སོའི་བདག་པོ་དེ་རྒྱལ་ཁབ་དེའི་ནང་ཡོད་པའི་མི་མང་ཚོ་ཡིན། དེར་བརྟེན་མི་མང་གིས་འདམས་པའི་སྲིད་གཞུང་དེས་མི་མང་གི་འགན་འཁྱེར་དགོས། ཕྱི་ལོ་ ༢༠༡༡ ལོ་ནས་བཟུང་ངོས་ཀྱིས་བོད་མིའི་ཆབ་སྲིད་ཀྱི་འགོ་ཁྲིད་ནས་རྒན་ཡོལ་ཆ་ཚང་ཞུས་པ་མ་ཟད། ཏཱ་ལའི་བླ་མས་བོད་མིའི་ཆབ་སྲིད་ཀྱི་འགོ་ཁྲིད་བྱེད་རྒྱུའི་ལམ་སྲོལ་དེ་ཡང་མཇུག་སྒྲིལ་བྱས་ཡོད། དུས་རབས་ ༧།༨ སྐབས་ནས་བོད་དུ་རྒྱ་གར་ན་ལེནྜ་ནས་ནང་པ་སངས་རྒྱས་པའི་ཆོས་དར་འཕེལ་བྱུང་བ་ནས་བཟུང་བོད་མི་རྣམས་ཀྱི་མི་ཚེའི་རྣམ་པ་ཆ་ཚང་འགྱུར་བ་ཕྱིན་ཡོད། བོད་དུ་ནང་ཆོས་དར་སྤེལ་བྱུང་བ་ནས་བཟུང་བོད་མི་རྣམས་ཞི་དུལ་བག་ཡོད་དང་བྱམས་བརྩེའི་རང་བཞིན་ལྡན་པ་ཞིག་ཆགས་ཡོད། ལོ་རྒྱུས་ཐོག་ནས་རྒྱ་ནག་ཡང་ནང་པའི་རྒྱལ་ཁབ་གཅིག་ཡིན། རིག་གནས་གསར་བརྗེའི་སྐབས་ནང་ཆོས་རྩ་མེད་གཏོང་ཐབས་བྱས་ཡོད་ཀྱང་དེང་སྐབས་རྒྱ་ནག་ནང་དུ་རྒྱ་རིགས་ནང་པ་ས་ཡ་བཞི་བརྒྱ་ཙམ་ཡོད་སྐོར་བརྗོད་བཞིན་ཡོད། ཁོར་ཡུག་གནས་སྟངས་ཐོག་ནས་བརྗོད་ན་རྒྱ་རིགས་ཁོར་ཡུག་ཉམས་ཞིབ་པ་ཚོས་མཐོ་སྒང་བོད་ཀྱི་ཁོར་ཡུག་ནི་འཛམ་གླིང་ལྷོ་སྣེ་དང་བྱང་སྣེའི་གནས་སྟངས་ཧ་ཅང་གལ་ཆེ་ཡིན་པ་དང་གཅིག་མཚུངས་ཆགས་ཡོད་སྐོར་བརྗོད་ཡོད།
གྲོས་ཚོགས་འཐུས་མི་བོད་དོན་རྒྱབ་སྐྱོར་བ།
དེར་བརྟེན་བོད་ལ་འཛམ་གླིང་གི་སྣེ་གསུམ་པ་ཞེས་འབོད་བཞིན་ཡོད། ཨེ་ཤི་ཡའི་རྒྱུག་ཆུ་ཆེ་ཁག་དང་ཆུ་ཆེན་ཁག་གི་འབྱུང་ཁུངས་བོད་ཆགས་ཡོད། དེར་བརྟེན་བོད་ཀྱི་རྒྱུག་ཆུ་དང་ཆུ་ཆེན་ཁག་ལ་རྟེན་ནས་འཚོ་གནས་བྱེད་མཁན་མི་འབོར་ཐེར་འབུམ་གཅིག་ཡོད་སྐོར་བརྗོད་བཞིན་ཡོད། རྒྱ་ནག་གི་སྲིད་བློན་གཅིག་གིས་རྒྱ་ནག་ནང་དུ་དེ་སྔ་བྱུང་མྱོང་མེད་པའི་ཆུ་ལོག་གི་གནོད་འཚེ་ཧ་ཅང་ཤུགས་ཆེ་བྱུང་བ་དེའི་རྒྱུ་རྐྱེན་གཙོ་བོ་བོད་དུ་ཤིང་ནགས་གཅོད་དྲེག་ཤུགས་ཆེ་བྱས་པ་དེས་ཡིན་སྐོར་བརྗོད་ཡོད། ངོས་རང་ནང་པའི་དགེ་སློང་ཞིག་ཡིན་པར་བརྟེན་འགྲོ་བ་མིའི་གཞི་རྩའི་བཟང་པོའི་རིན་ཐང་དང་ཆོས་ལུགས་མཐུན་སྒྲིལ། དེ་བཞིན་བོད་ཀྱི་ཆོས་དང་རིག་གཞུང་། ཁོར་ཡུག་སྲུང་སྐྱོབ་བྱ་རྒྱུ་ངོས་ཀྱི་ལས་འགན་ཞིག་ཡིན་པར་ངོས་འཛིན་བྱེད་བཞིན་ཡོད། ཅེས་བཀའ་སློབ་སྩལ་རྗེས། གྲོས་ཚོགས་འཐུས་མི་སྐུ་ཞབས་ཀེ་ཏིལ་ཀེ་ཇེན་སེ་ཏི་མཆོག་གིས་ཆོས་ལུགས་ཕན་ཚུན་དབར་རྙོག་གླེང་མང་དག་གཅིག་ཡོད་པའི་སྐོར་གྱི་དྲི་བ་ཞུས་པར་བཀའ་ལན་སྩལ་དོན།
རྙོག་གླེང་དེ་དག་ཕལ་ཆེ་བ་ཆོས་ལུགས་ལ་མིང་བཏགས་པ་ཙམ་མ་གཏོགས་དོན་དངོས་ཆབ་སྲིད་དང་དཔལ་འབྱོར་གྱི་གནད་དོན་ཆགས་རྒྱུ་ལས་ཆོས་ཀྱི་གནད་དོན་ཞིག་ཆགས་རྒྱུ་མིན། མི་སྒེར་ལ་མཚོན་ན་ཆོས་ལུགས་གཅིག་དང་བདེན་པ་གཅིག་བྱས་ན་འགྲིག་ཀྱང་། དེང་སྐབས་འཛམ་གླིང་གི་གནས་སྟངས་ལ་གཞི་བཅོལ་སྐབས་ཆོས་ལུགས་འདྲ་མིན་དང་བདེན་པ་མང་པོ་བྱས་ན་རན་པ་ཡོད། ཅེས་བཀའ་ལན་སྩལ།
དེ་རྗེས་ནོར་ཝེའི་ལྟ་བུ་རྒྱལ་ཁབ་ཀྱིས་འགྲོ་བ་མིའི་ཐོབ་ཐང་སྲུང་སྐྱོབ་ཐོག་ནུས་པ་ལྡན་པའི་ལས་འགུལ་ཇི་འདྲ་སྤེལ་ཐུབ་མིན་སྐོར་གྱི་དྲི་བ་ཞུས་པར་བཀའ་ལན་སྩལ་དོན། ནོར་ཝེའི་ལྟ་བུ་རྒྱལ་ཁབ་ཆུང་ཆུང་ལ་རྒྱལ་ཁབ་གཞན་གྱིས་ཉེན་ཁར་བརྩི་དགོས་པའི་གནས་སྟངས་དེ་ཙམ་མེད་པར་བརྟེན་རྒྱལ་ཁབ་གཞན་དང་ལྷན་འབྲེལ་བའི་ཐོག་ནས་ཕན་ཚུན་ཡིད་ཆེས་བསླེབས་ནས་གནད་དོན་དེ་དག་ཐོག་གྲོས་མོལ་བྱེད་ཐུབ། དེ་ལྟར་ཡོང་ཐུབ་རྒྱུའི་ཆ་རྐྱེན་གཙོ་བོ་ནི་ཕན་ཚུན་ཡིད་ཆེས་དང་གུས་བརྩི་ཞུ་རྒྱུ་དེ་ཡིན། འཚེ་མེད་ཞི་བ་དང་མཚུངས་པར་འགྲོ་བ་མིའི་ཐོབ་ཐང་དེ་ཡང་ཀུན་སློང་ཡག་པོ་ཞིག་འཁྱེར་ནས་བསྡད་པ་ཙམ་གྱིས་མི་ཕན། ངོ་ཐོག་ལག་ལེན་ཐོག་ནས་འགྲོ་དགོས། ངོས་རང་སྐབས་ཤིག་ཉི་ཧོང་གི་གྲོང་ཁྱེར་ཧི་རོ་ཤི་མའི་ལྷན་ཚོགས་སྐབས་ཤིག་ལ་དེ་ལྟར་བརྗོད་རྒྱུ་བྱུང་ཞེས་བཀའ་ལན་སྩལ།
དེ་རྗེས་ཚོགས་བཅར་བ་ཞིག་གིས་༸གོང་ས་མཆོག་གིས་མ་འོངས་བོད་ཀྱི་གནས་སྟངས་རང་སྲིད་རང་སྐྱོང་ཇི་འདྲ་ཞིག་གཟིགས་བཞིན་ཡོད་སྐོར་གྱི་དྲི་བ་ཞུས་པར་བཀའ་ལན་སྩལ་དོན། ཕྱི་ལོ་ ༡༩༧༤ ལོ་འགོ་ཙམ་ནས་སྔ་ཕྱི་མ་གཏོགས་ང་ཚོས་རྒྱ་ནག་དང་སྐད་ཆ་ཤོད་རྒྱུའི་གོ་སྐབས་ཤིག་འཆར་རྒྱུ་ཡིན་པ་དང་།
སློབ་གྲྭ་ཆེ་བའི་སློབ་ཕྲུག་དང་ལྷན།
སྐབས་དེར་ང་ཚོས་རང་བཙན་བཤད་ན་རྒྱ་ནག་ཕྱོགས་ནས་ངོས་ལེན་རྩ་བ་ནས་བྱ་རྒྱུ་མིན་པ་ངོས་འཛིན་བྱས་ཡོད། ལོ་རྒྱུས་ཐོག་ནས་བརྗོད་ན་བོད་འདི་རྒྱ་ནག་དང་ཁ་བྲལ་གྱི་རང་བཙན་གཙང་མའི་རྒྱལ་ཁབ་གཅིག་ཆགས་ཡོད། འོན་ཀྱང་འདས་པ་ནི་འདས་ཟིན། ངོས་ཀྱི་ཡུ་རོབ་སྤྱི་མཐུན་ཚོགས་པའི་སྒྲིག་འཛུགས་ལ་ཡིད་སྨོན་ཧ་ཅང་སྐྱེད་བཞིན་འདུག རྒྱལ་ཁབ་སོ་སོའི་ཁེ་ཕན་བློས་གཏོང་བྱས་ནས་སྤྱི་པའི་སྒྲིག་འཛུགས་རྒྱ་ཆེ་ས་དེར་མོས་མཐུན་རྒྱབ་སྐྱོར་བྱས་ཡོད། བོད་མི་ཚོས་རྒྱ་ནག་གི་རྩ་ཁྲིམས་ནང་གསལ་བའི་བོད་རིགས་གནས་སྡོད་ཀྱི་ས་ཁུལ་ཁག་ལ་ཐོབ་ཐང་གསལ་ཡོད་པ་དེ་དག་ལག་བསྟར་གནང་རོགས་ཞེས་རྒྱ་ནག་གཞུང་ལ་འབོད་སྐུལ་བྱེད་བཞིན་ཡོད། ཐོབ་ཐང་དེ་དག་ནང་དུ་འགྲོ་བ་མིའི་ཐོབ་ཐང་དང་ཁོར་ཡུག་གནད་དོན་སོགས་འཁོད་ཡོད། ཁོར་ཡུག་ལ་མཚོན་ན་བོད་ཀྱི་ས་གནས་ཁག་ཏུ་ས་གནས་བོད་རིགས་མང་ཚོགས་ཀྱི་འདོད་བློར་མ་འཚམ་པའི་ཐོག་ནས་གཏེར་ཁ་གང་བྱུང་སྔོགས་འདོན་བྱས་དང་བྱེད་མུས་ཡིན་པ་མ་ཟད། རྒྱ་ནག་གཞུང་གིས་བོད་ཀྱི་སྐད་ཡིག་དང་རིག་གཞུང་ལ་མཐོང་ཆུང་ཁྱད་གསོད་བྱས་པ་དེ་ནི་འགྲོ་བ་མིའི་ཐོབ་ཐང་བརྡལ་བཤིག་བཏང་བ་དང་གཅིག་མཚུངས་ཆགས་ཡོད། ངོས་ཀྱིས་རྒྱ་རིགས་གྲོགས་པོ་ཚོར་འདི་ལྟར་བརྗོད་བཞིན་ཡོད། རྒྱ་གར་ནང་སྐད་ཡིག་འདྲ་མིན་ཧ་ཅང་མང་པོ་ཡོད་པ་དེས་རྒྱ་གར་ཁ་བྲལ་འགྲོ་རྒྱུའི་ཉེན་ཁ་གང་ཡང་བཟོ་གི་མེད། བོད་མི་ཚོས་ཆོས་དད་རང་དབང་དང་རང་གི་ཐུན་མིན་རིག་གཞུང་དང་སྐད་ཡིག་སྲུང་སྐྱོབ་བྱ་རྒྱུའི་ཐོབ་ཐང་རྩོད་བཞིན་ཡོད། འདས་པའི་དུས་སྐབས་སུ་རྒྱ་དཀར་ནག་གཉིས་དབར་བོད་ཀྱི་བར་ཞུགས་བྱས་ནས་ཞི་བདེའི་ངང་གནས་ཐུབ་པ་བྱུང་ཡོད་། འོན་ཀྱང་དེང་སྐབས་རྒྱ་ནག་གི་རྒྱ་གར་དང་ས་མཚམས་ཁེལ་བའི་བོད་ཀྱི་ས་ཁུལ་དུ་དམག་མི་ཧ་ཅང་ཕོན་ཆེ་འགྲེམས་འཇོག་བྱས་པར་བརྟེན་ནས་རྒྱ་གར་གཞུང་གིས་དོགས་ཟོན་བྱེད་དགོས་པའི་གནས་སྟངས་ཆགས་ཡོད། གལ་ཏེ་བོད་ཀྱི་གནད་དོན་ཞི་འཇམ་ངང་སེལ་ཐུབ་ཚེ་ས་མཚམས་སུ་དམག་མི་འབོར་ཆེན་བཞག་པ་དེ་དག་ཉུང་དུ་གཏོང་ཐུབ། ཅེས་བཀའ་ལན་སྩལ།
བོད་རིགས་རྣམས་ལ་བཀའ་སློབ་སྩོལ་བཞིན་པ།
དེ་རྗེས་ཚོགས་བཅར་བ་གཞན་ཞིག་གིས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་དེང་སྐབས་འཛམ་གླིང་ཁྱོན་ཡོངས་ལ་ཆེས་སྡུག་ཤོས་སུ་ངོས་འཛིན་བྱས་ཡོད་སྐོར་གྱི་བསམ་ཚུལ་ཞུས་པར་བཀའ་ལན་སྩལ་དོན། ལོ་ངོ་བཅོ་ལྔ་ཙམ་གྱི་གོང་ལ་རྒྱ་ནག་དམར་ཤོག་ཚོགས་པའི་འགོ་ཁྲིད་གཅིག་གིས་ལྷན་ཚོགས་ཤིག་ལ་བོད་འདི་རྒྱ་ནག་དང་ཁ་བྲལ་འགྲོ་རྒྱུའི་ཉེན་ཁ་ཆེ་ཤོས་འདི་བོད་བརྒྱུད་ནང་ཆོས་འདི་ཡིན་པར་བརྟེན་དེར་དམ་བསྒྲགས་བྱེད་དགོས་པ་བརྗོད་ཡོད། ནོར་ཝེའི་མི་མང་ཚོས་རང་གི་ཐུན་མིན་རིག་གཞུང་ལ་གཅེས་འཛིན་བྱས་པ་ལྟར་བོད་མི་ཚོས་སོ་སོའི་ཆོས་དང་རིག་གཞུང་། སྐད་ཡིག་སོགས་ལ་གཅེས་འཛིན་བྱེད་སྐབས་རྒྱ་ནག་གཞུང་ཁོང་ཁྲོ་ལང་བཞིན་ཡོད། ལྷ་སའི་མཆོད་ཁང་དང་སང་ལམ་སོགས་གང་ས་གང་ལ་རྒྱ་མིས་གསང་བའི་པར་ཆས་བཙུགས་ནས་རྟག་ཏུ་འཇིགས་སྣང་དང་དོགས་པ་བྱས་ནས་སྡོད་དགོས་པའི་ཁོར་ཡུག་གཅིག་ཆགས་ཡོད། འོན་ཀྱང་ངོས་ཀྱིས་གྲོགས་པོ་མང་པོས་ད་ལྟའི་རྒྱ་ནག་གི་སྲིད་འཛིན་ཞི་ཅིང་ཕིང་གི་བསམ་བློ་གཏོང་སྟངས་དེ་དངོས་ཡོད་གནས་ཚུལ་ལ་གཞིགས་ནས་འགྲོ་མཁན་ཞིག་ཡིན་པར་ངོས་འཛིན་བྱེད་བཞིན་ཡོད། སྲིད་འཛིན་ཞི་ཡིས་དེང་སྐབས་རྒྱ་ནག་ནང་དུ་ལྐོག་ཟའི་དཀའ་ངལ་ལ་གདོང་ལེན་ཤུགས་ཆེ་བྱེད་བཞིན་ཡོད། ཉེ་ལམ་ཁོང་ཕ་རན་སིའི་རྒྱལ་ས་པེ་རི་སིར་གཞུང་འབྲེལ་ཕྱོགས་ཕེབས་སྐབས་ཤིག་ལ་ནང་ཆོས་དེས་དེང་རྒྱ་ནག་གི་རིག་གཞུང་ཉམས་པ་སླར་གསོ་ཡོང་རྒྱུར་དམིགས་བསལ་གྱི་ཕན་ཐོག་ཡོང་རྒྱུ་ཡིན་པའི་བསྔགས་བརྗོད་གནང་ཡོད། ལོ་ངོ་བདུན་བཅུ་ཙམ་ཕྱིན་རྗེས་དེང་སྐབས་གཅིག་བསྡུས་དབང་འཛིན་གྱི་དུས་སྐབས་ཡོལ་ཟིན།
དེང་སྐབས་རྒྱ་རིགས་ཤེས་ལྡན་མི་སྣ་མང་པོས་རང་དབང་གི་འབོད་སྒྲ་བསྒྲགས་བཞིན་ཡོད་པ་དེར་ཡུ་རོབ་སྤྱི་མཐུན་ཚོགས་པས་རྒྱབ་སྐྱོར་བྱེད་དགོས་པ་མ་ཟད། སྲིད་འཛིན་ཞི་ཅིང་ཕིང་ལའང་རྒྱབ་སྐྱོར་བྱེད་དགོས། འཛམ་གླིང་གཞུང་མང་གཉིས་ཀྱིས་རྒྱ་ནག་ལ་བཟང་སྤྱོད་ཀྱི་རྒྱབ་སྐྱོར་བྱས་ན་ཕན་ཐོག་ཡོང་རྒྱུ་ཡིན། དེང་སྐབས་རྒྱ་ནག་གཞུང་གིས་རྒྱལ་ཁབ་ཀྱི་མཐའ་མཚམས་བདེ་འཇགས་ལས་རྒྱལ་ནང་གི་བདེ་འཇགས་ལ་འགྲོ་སོང་ཆེ་བ་གཏོང་བཞིན་ཡོད་པ་དེ་འདྲ་རྒྱལ་ཁབ་གཞན་སུ་གཅིག་གིས་བྱེད་ཀྱི་མེད། རྒྱ་ནག་གི་སྲིད་བློན་ཟུར་པ་ཝུན་ཅ་པོས་ Wen Jiabao རྒྱ་ནག་ནང་ཨ་རིའི་མང་གཙོའི་འགྲོ་ལུགས་ལྟར་ཆབ་སྲིད་ཀྱི་འགྱུར་བགྲོས་ངེས་པར་དུ་གཏོང་དགོས་པ་གསུངས་ཡོད། ཅེས་བཀའ་ལན་སྩལ། དེ་རྗེས་ཚོགས་བཅར་བ་ཞིག་གིས་བོད་ནང་རང་ལུས་མེར་སྲེག་སྐོར་གྱི་དྲི་བ་ཞུས་པར་བཀའ་ལན་སྩལ་དོན། གནད་དོན་འདི་ནི་ཆབ་སྲིད་དང་འབྲེལ་བ་ཧ་ཅང་ཡོད། རྒྱ་ནག་འགོ་ཁྲིད་མཁྲེགས་འཛིན་པ་ཚོས་ངོས་ཀྱི་སྐད་ཆར་འཁྱོགས་བཤད་བྱ་ངེས་ཡིན་པར་བརྟེན་དེ་ལས་ཁ་ཁུ་སིམ་མེར་བསྡད་ན་བཟང་།
ཞེས་བཀའ་ལན་སྩལ་ནས་ལྷན་ཚོགས་མཇུག་སྒྲིལ་རྗེས་༸གོང་ས་མཆོག་ཁུལ་དེ་ནས་ནོར་ཝེའི་ཞི་བདེའི་བསྟི་གནས་ཁང་ Nobel Peace Centre དུ་ཆིབས་སྒྱུར་བསྐྱངས། སྐབས་དེར་བསྟི་གནས་ཁང་གི་འགན་འཛིན་ལྕམ་སྐུ་བྷེན་ཏི་ཨེ་རེག་ཤན་ Bente Erichsen ལགས་ཀྱིས་༸གོང་ས་མཆོག་ལ་ཕེབས་བསུའི་སྣེ་ལེན་གྱི་ཕེབས་བསུ་གཟབ་རྒྱས་ཞུས་རྗེས་བསྟི་གནས་ཁང་དེར་འཚམས་གཟིགས་མཛད་པ་མ་ཟད། སློབ་གྲྭ་ཆེ་བའི་སློབ་ཕྲུག་རྣམས་ལ་སེམས་ཀྱི་ཞེ་བདེ་དང་བྱམས་བརྩེའི་སྐོར་བརྙན་འཕྲིན་བརྒྱུད་བཀའ་སློབ་སྩལ། གཞན་ཡང་སྐབས་དེར་རྒྱལ་ས་ཨོ་སི་ལོའི་གྲོང་སྡེའི་སྤྱི་ཁྱབ་པ་ The Mayor སྐུ་ཞབས་ཕེ་བྷི་ཡན་སི་ཊང་ Fabian Stang མཆོག་གིས་༸གོང་ས་མཆོག་མཇལ་ཁ་ཞུས་ཡོད་པ་བཅས།།
