༢༠༠༩ ཕྱི་ཟླ་ ༡༠ ཚེས་ ༥ རེས་གཟའ་ཟླ་བ།

ཞོ་བེད་བསོད་སྟོབས།

༄༅། །འདི་གར་ཁུངས་ལྡན་གྱི་གནས་ཚུལ་འབྱོར་གསལ་ལྟར་ན། འདི་ལོའི་ཟླ་ ༦ ཚེས་ ༧ ཉིན་ས་ག་ཟླ་བའི་བོད་ཚེས་ ༡༥ དང་སྟབས་བསྟུན་བོད་ཀྱི་རྒྱལ་ས་ལྷ་སར་བོད་མི་ཚོས་བསངས་གསོལ་བྱས་པ་དང་ཀི་བསྭོ་ལྷ་རྒྱལ་སྒྲོག་པ་སོགས་ལ་བྱེད་སྐབས་ས་གནས་ཉེན་རྟོག་པས་བོད་མི་ཁག་གཅིག་ཉེས་མེད་འཛིན་བཟུང་བྱས་སྐོར་དེ་སྔ་ནས་གནས་ཚུལ་ཐོན་པ་ལྟར་ད་ལྟའི་ཆར་མང་ཆེ་བ་རིམ་པས་གློད་བཀྲོལ་བཏང་ཡོད་ཀྱང་། ཕ་ཡུལ་སྡེ་དགེ་འཇོ་མདའ་མཁར་སྒང་ཤང་ཁོངས་ནས་ཡིན་པའི་ཞོ་བེད་བསོད་སྟོབས་ཞུ་བ་རང་ལོ་ ༥༠ སོན་པ་ཞིག་སྐབས་དེར་ལྷ་ས་ནས་འཛིན་བཟུང་བྱས་པ་ནས་བཟུང་ད་བར་ནང་མི་ཉེ་འབྲེལ་སུ་ལའང་ཐུག་འཕྲད་བྱུང་མེད་པར་ས་གནས་གང་ཞིག་ཏུ་བཀག་ཉར་བྱས་ཡོད་མེད་དང་། བཀག་ཉར་བྱས་ཏེ་ཉེས་འཛུགས་གང་ཞིག་བྱེད་ཀྱི་ཡོད་མེད་སོགས་གནས་ཚུལ་གང་ཡང་ཤེས་རྟོགས་མེད་པར་གྱུར་ཏེ་ནང་མི་སྤུན་མཆེད་ཚོར་སེམས་འཚབ་ཆེན་པོ་ཡོད་པའི་གནས་ཚུལ་ཐོན་འདུག ཁོང་ནི་རྒྱུན་གཏན་ནས་ལྷ་སར་ཁྲོམ་གཟིགས་ཁང་ཁུལ་དུ་ཚོང་ལས་གཉེར་མཁན་ཞིག་ཡིན་འདུག