༢༠༡༤ ཟླ་ ༥ ཚེས་ ༧ རེས་གཟའ་ལྷག་པ།
༄༅། །ཕྱི་ལོ་ ༢༠༡༤ ཟླ་ ༥ ཚེས་ ༦ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་ལ་ཏི་ཝི་ཡའི་ (Latvia) ནང་རྟེན་གཞི་བྱས་པའི་ཀིབ་ས་ལ་རྒྱལ་སྤྱིའི་འགྲེམས་སྟོན་བསྟི་གནས་ཁང་ (Kipsala International Exhibition Centre) ཞེས་པའི་ནང་དད་ལྡན་པ་ཁྱོན་མི་གྲངས་ ༣༥༠༠ བརྒལ་བ་རྣམས་ལ་ཉིན་གྲངས་གཉིས་རིང་གི་ཆོས་འབྲེལ་མཇུག་མ་བསྒྲིལ་སྔོན་སྐྱབས་འགྲོའི་སྐོར་ངོ་སྤྲོད་མཛད་དོན། ཆོས་ལུགས་གང་དང་གང་ཞིག་ཡིན་རུང་སོ་སོར་སྐྱབས་གནས་རེ་རེར་ཡོད། དེར་བརྟེན་སངས་རྒྱས་པའི་ཆོས་ནང་སྐྱབས་གནས་དཀོན་མཆོག་གསུམ་གསུངས་ཡོད། དེ་ཡང་སྐྱབས་དངོས་ཆོས་དཀོན་མཆོག་རེད་མ་གཏོགས་སངས་རྒྱས་དང་དགེ་འདུན་མ་རེད། སངས་རྒྱས་དཀོན་མཆོག་སྨན་པ་དང་འདྲ་བ་དང་དགེ་འདུན་དཀོན་མཆོག་ནད་གཡོག་ལྟ་བུ་རེད། ཆོས་དཀོན་མཆོག་སྨན་དང་འདྲ་བ་རེད། དེ་ལྟ་བུ་དཀོན་མཆོག་གསུམ་ལ་སྐྱབས་སུ་འགྲོ་དགོས།
སྤྱིར་བཏང་བོད་དང་ཧི་མ་ལ་ཡའི་རི་རྒྱུད་ཀྱི་སྤྱི་ཚོགས་ནང་ཡུལ་ལྷ་རེད། ཅེས་པ་དེ་འདྲ་མང་པོ་ཡོད། དེ་དག་ལ་ཁ་ཐུག་བསངས་གསོལ་བྱས་ཏེ་འཕྲིན་ལས་བཅོལ་ན་ཁྱད་པར་གང་ཡང་མེད་པ་རེད་མ་གཏོགས་སེམས་གཏིང་ནས་དད་པ་དང་ཡིད་ཆེས་ཐོག་ནས་བྱས་ན་སྐྱབས་འགྲོ་ཉམས་རྒྱུའི་ཉེན་ཁ་ཡོད། གང་ལ་ཞེ་ན། དྲེགས་པ་རྣམས་རང་ཉིད་ལས་ཉོན་གྱི་གཞན་དབང་དུ་བསྡད་ཡོད། དེ་ལྟ་བུའི་འཇིག་རྟེན་པའི་ལྷ་ཞིག་གིས་སྐྱོབ་ཐུབ་ཀྱི་མ་རེད། དཀར་ཕྱོགས་སྐྱོང་བའི་དྲེགས་པ་ཡིན་རུང་དེར་སྐྱབས་གནས་བརྩིས་ན་ཡག་པོ་མེད། དེ་བཞིན་ཤུགས་ལྡན་སྔོན་མ་ངོས་ནས་ཀྱང་བསྟེན་པ་རེད། ཁྲི་བྱང་རིན་པོ་ཆེས་བསྟེན་གནང་གི་ཡོད། སྐྱབས་རྗེ་ཕ་བོང་ཁ་རིན་པོ་ཆེས་གཙོ་བོ་བསྟེན་གནང་ཡོད། སྐྱབས་རྗེ་ཕ་བོང་ཁ་དང་ཁྲི་བྱང་རིན་པོ་ཆེས་དེ་དྲེགས་པར་བརྩིས་པ་མ་གཏོགས་འཇིག་རྟེན་ལས་འདས་པའི་ལྷར་བརྩིས་གནང་གི་མི་འདུག དེར་བརྟེན་དྲེགས་པ་སྐྱབས་གནས་དངོས་ལ་བརྩིས་ནས་བསྟེན་ན་ནོར་འཁྲུལ་ཆགས་ཀྱི་ཡོད། སྐྱབས་རྗེ་ཕ་བོང་ཁའི་རྣམ་ཐར་ཕྱོགས་བསྒྲིགས་གནང་མཁན་ཁོང་གི་དྲུང་ཡིག་བློ་བཟང་རྡོ་རྗེས་བྲིས་པའི་རྣམ་ཐར་བོད་ནས་དཔར་སྐྲུན་བྱས་པའི་ནང་ཧ་ཅང་གསལ་པོ་འདུག སྐུ་མདུན་སྐུ་གོང་མས་ཕ་བོང་ཁ་རིན་པོ་ཆེར་ཤུགས་ལྡན་སྐྱབས་གནས་ལ་བརྩིས་ནས་བསྟེན་ན་སྐྱབས་འགྲོའི་བསླབ་བྱ་དང་འགལ་གྱི་རེད། ཅེས་གསུངས་འདུག དེ་སྔ་ངོས་རང་ཆུང་དུས་སྐབས་བསྟེན་པ་རེད་ཀྱང་རྗེས་ལ་མཚམས་འཇོག་བྱས་ཏེ་གཞན་ལ་དེའི་དགེ་སྐྱོན་སྐོར་འགྲེལ་བཤད་རྒྱག་རྒྱུ་ནི་ངོས་ཀྱིས་ལས་འགན་རེད། ཉན་དང་མི་ཉན་སོ་སོའི་བསམ་བློ་དང་རང་དབང་རེད།
ངོས་ལ་བརྗོད་རྒྱུ་གང་ཡང་མེད། འོན་ཀྱང་རྒྱལ་ཆེན་ཤུགས་ལྡན་བསྟན་ན་ངོས་ཀྱི་སར་ནས་ཆོས་དང་སྡོམ་པ་ཞུ་རྒྱུ་སོགས་མ་བྱེད་རོགས། གང་ཡིན་བརྗོད་ན། དམ་ཚིག་ཉམས་རྒྱུའི་སྐྱོན་ཡོད། ༸གོང་ས་ལྔ་པའི་སྐབས་ནས་དམ་ཚིག་ཉམས་ཡོད། ༸གོང་ས་ལྔ་པས་རྒྱལ་པོ་ཤུགས་ལྡན་འདི་སྨོན་ལམ་ལོག་པའི་དམ་སྲི་འབྱུང་པོ། བསྟན་དང་འགྲོ་བ་ལ་འཚེ་བ་བྱེད་མཁན། ཞེས་གསུངས་ཡོད། དེར་བརྟེན་སྐུ་མདུན་སྐུ་གོང་མས་དམ་བསྒྲགས་གནང་ཡོད། ངོས་ཀྱིས་ཚེ་སྟོད་སྐབས་མ་ཤེས་པར་དོལ་རྒྱལ་བསྟན་པ་རེད། ཚེ་སྨད་ལ་ལོ་རྒྱུས་དེ་དག་མང་པོ་ཞིག་ལ་ཉམས་ཞིབ་བྱས་ཏེ་ལྟ་སྐབས་དེར་མ་འགྲིག་པ་གཅིག་འདུག ཤུགས་ལྡན་སྟེན་མཁན་དེ་ཚོ་ཧ་ཅང་རླུང་ལངས་ནས་ངོས་ལ་ངོ་རྒོལ་ཤུགས་ཆེ་བྱེད་བཞིན་ཡོད། ད་ལྟ་ངོས་ཀྱིས་གོ་ཐོས་བྱས་ན་ནོར་ཝེ་ལ་ཤུགས་ལྡན་ངོ་རྒོལ་བྱེད་མཁན་ཚོ་གྲ་སྒྲིག་ཨང་གསར་བྱས་ཏེ་ངོས་རང་སྒུག་ནས་བསྡད་ཡོད་པ་གོ་ཐོས་བྱུང་། ཁ་སེང་ཨ་རིར་ཤུགས་ལྡན་ངོ་རྒོལ་བྱེད་མཁན་ཚོས་སྐད་ཞེ་དྲག་བརྒྱབ་པ་རེད། ཁོ་ཚོས་དངོས་ཡོད་གནས་ཚུལ་སྐོར་ཤེས་རྟོགས་གང་ཡང་མེད། སྙིང་རྗེ། ངོས་ཀྱིས་ཁོ་ཚོར་ཡ་ང་སྙིང་རྗེ་སྐྱེས་བྱུང་། རྨོངས་པའི་གཞན་དབང་འོག་ཕྱིན་ནས་དངོས་ཡོད་གནས་ཚུལ་གང་ཡིན་མ་ཤེས་པར་བརྟེན་ནས་ཡིན། ཞེས་སོགས་ཀྱི་བཀའ་སློབ་དང་ཆོས་འབྲེལ་མཇུག་སྒྲིལ་མཛད་ཡོད།
གོང་ཚེས་ཉིན་ལ་ཏི་ཝི་ཡའི་ཡུལ་གྱི་གྲོས་ཚོགས་འཐུས་མི་བདུན་དང་ཡུ་རོབ་གྲོས་ཚོགས་ཀྱི་འཐུས་མིའི་འོས་གཞིའི་ནང་ཡོད་པའི་མི་སྣ་གཉིས་བཅས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་མཇལ་ཁ་དང་འཚམས་འདྲི་ཞུས་ཡོད།
