༢༠༡༤ ཟླ་ ༥ ཚེས་ ༥ རེས་གཟའ་ཟླ་བ།
༄༅། །འདི་གར་ཐེ་ཝན་བོད་ཀྱི་སྐུ་ཚབ་དོན་གཅོད་ཁང་ནས་ཕྱི་ལོ་ ༢༠༡༤ ཟླ་ ༥ ཚེས་ ༥ ཉིན་བཏང་གནས་ནང་འཁོད་དོན། ཐེ་ཝན་བོད་ཀྱི་སྐུ་ཚབ་དོན་གཅོད་ཁང་དང་། ཐེ་ཝན་བོད་རྒྱ་མཐུན་ཚོགས། ཐེ་སྡོད་བོད་རིགས་ཚོགས་པ་བཅས་མཉམ་འབྲེལ་ཐོག་བོད་ཕྱི་ནང་གཉིས་ཀྱི་རྒྱལ་གཅེས་པ་རྣམས་ཀྱིས་བོད་བསྟན་པ་ཆབ་སྲིད་དོན་དུ་རང་གི་གཅེས་པའི་ལུས་སྲོག་མེར་སྲེག་གིས་རྒྱ་གཞུང་གི་སྲིད་བྱུས་ལ་ངོ་རྒོལ་གནང་ཡོད་པར། རྒྱ་ནག་གཞུང་ཕྱོགས་ནས་དེར་ལོག་འགྲེལ་ཁྱབ་བསྒྲགས་ཤུགས་ཆེ་བྱེད་ཀྱི་ཡོད་པ་དེ་དག་གསལ་བཤད་བྱ་རྒྱུ་གལ་ཆེར་སོང་ཐེ་ཝན་ནང་ལས་འགུལ་སྣ་མང་སྤེལ་ཡོད།
དེ་ཡང་ཕྱི་ཟླ་ ༥ ཚེས་ ༣ རེས་གཟའ་སྤེན་པ་ཉིན་ཕྱེད་རིང་། ཐེ་ཝན་སློབ་ཆེན་སྤྱི་ཚོགས་ཚན་རིག་ཁང་གི་ཚོགས་ཁང་ནང་༼རྒྱ་ནག་ཁུན་མན་གྲོང་ཁྱེར་གྱི་དོན་རྐྱེན་དང་བོད་མིའི་རང་ལུས་མེར་སྲེག་ལས་རྒྱ་ནག་གི་མི་རིགས་གནད་དོན་སྐོར་༽ཞེས་པའི་བརྗོད་གཞིའི་ཐོག་མཁས་པའི་བགྲོ་གླེང་ཚོགས་འདུ་ཞིག་གོ་སྒྲིག་ཞུས། བགྲོ་གླེང་ཚོགས་འདུར་ཐེ་ཝན་གྱི་དགེ་རྒན་ཆེན་མོ་དང་། གསར་འགྱུར་ལས་རིགས། གྲོས་ཚོགས་འཐུས་མི་ཟུར་པ། དེ་བཞིན་ཁེ་ན་ཌ་དང་། ཧོང་ཀོང་། བཞུགས་སྒར་རྡ་རམ་ས་ལ་བཅས་ནས་ཕེབས་པ་ཁྱོན་མི་གྲངས་བཅུ་ཙམ་གྱིས་དཔྱད་རྩོམ་སྒྲོགས་སྦྱང་དང་བགྲོ་གླེང་ལྷུག་པོ་གནང་བ་མ་ཟད། ཟུར་ཉན་དུ་རྒྱ་ནག་དང་ཐེ་ཝན་གྱི་སློབ་ཕྲུག་སོགས་མི་གྲངས་ལྔ་བཅུ་ཙམ་ཡོད་པ་ནས་མང་པོ་ཞིག་གི་དྲི་བར་ལན་འདེབས་གནང་། ལྷག་པར་ཐེ་ཝན་ནང་སློབ་སྦྱོང་བྱེད་བཞིན་པའི་རྒྱ་ནག་སྐམ་སའི་སློབ་མས་བརྗོད་དོན། དེ་སྔོན་རྒྱ་ནག་ནང་ཡོད་སྐབས་བོད་དེ་ཞིང་བྲན་ལམ་ལུགས་ཙམ་ཡིན་པ་ལས་གཞན་གྱི་གནས་ཚུལ་ཤེས་ཀྱི་མེད། དེ་རིང་བགྲོ་གླེང་གནང་མཁན་རྣམས་ཀྱི་གསུང་མོལ་ལས་གནས་ཚུལ་གསར་པ་མང་པོ་ཤེས་རྟོགས་ཐུབ་བྱུང་ཞེས་སོགས་བརྗོད།
ཕྱི་ཟླ་ ༤ ཚེས་ ༢༦ ནས་ཕྱི་ཟླ་ ༥ ཚེས་ ༡༨ བར། ཐེ་ཝན་ལུང་ཧྲན་དགོན་པ་ས་འོག་རི་ལིའི་བབ་ཚུགས་ནང་༼གངས་རིའི་འོག་གི་མེ་ལྕེ་དང་བྱམས་སྙིང་རྗེ་༽ཞེས་པའི་འགྲེམས་སྟོན་ཞིག་བཤམས་ཡོད་པ་དང་། ནང་དོན་གཙོ་བོ་ད་ལྟ་རྒྱ་ནག་པེ་ཅིང་གྲོང་ཁྱེར་དུ་འཚོ་བཞུགས་གནང་བཞིན་ཡོད་པ་རི་མོ་མཁས་ཅན་སྐུ་ཞབས་ལིའུ་དབྱི་ལགས་ཀྱིས་བྲིས་པའི་བོད་མི་རང་ལུས་མེར་སྲེག་གཏོང་མཁན་རྣམས་ཀྱི་འདྲ་རིས་ཆུང་བ་དང་། མཉམ་འབྲེལ་རྒྱལ་ཚོགས་སོགས་རྒྱལ་སྤྱི་དང་། ད་ལྟ་རྒྱ་ནག་ནང་ཡོད་བཞིན་པའི་རྒྱ་མི་རིགས། དབུས་བོད་མིའི་སྒྲིག་འཛུགས་ཀྱི་གནད་ཡོད་མི་སྣ། ཐེ་ཝན་ནང་གི་གནད་ཡོད་མི་སྣ་སོགས་ཀྱིས་བོད་མིའི་རང་ལུས་མེར་སྲེག་སྐོར་ལ་གཏམ་བཤད་སྤེལ་བའི་ནང་དོན་སྙིང་བསྡུས། བོད་ཀྱི་རྒྱལ་རབས་ལོ་རྒྱུས་བཅས་ཀྱི་དཔར་རིགས་བཤམས་སྟོན་གནང་ཡོད། གཞན་ཡང་ཕྱི་ཟླ་ ༥ ཚེས་ ༣ ནས་ཚེས་ ༢༠ བར་ཐེ་ཝན་རང་དབང་ཐང་ཆེན་མདུན་བོད་ལུགས་ཀྱི་གུར་ཆེ་བ་གསུམ་ནང་༼རྒྱ་ནག་གི་རི་མོ་མཁས་ཅན་ལིའུ་དབྱི་ཡི་བོད་མིའི་རང་ལུས་མེར་སྲེག་གི་དཔར་རིས་འགྲེམས་སྟོན་༽ཞེས་པ་ཞིག་གོ་སྒྲིག་གནང་ཡོད་པ་དང་། ནང་དོན་ནི་རྒྱ་ནག་གི་རི་མོ་མཁས་ཅན་སྐུ་ཞབས་ལིའུ་དབྱི་ལགས་ཀྱིས་བྲིས་པའི་བོད་མི་རང་ལུས་མེར་སྲེག་གཏོང་མཁན་རྣམས་ཀྱི་འདྲ་རིས་ཆེ་བ་བརྒྱ་ལྷག་དང་ངོ་སྤྲོད། དེ་བཞིན་རྒྱལ་སྤྱི་དང་། རྒྱ་ནག་ནང་གི་རྒྱ་མི་རིགས། དབུས་བོད་མིའི་སྒྲིག་འཛུགས་ཀྱི་གནད་ཡོད་མི་སྣ། ཐེ་ཝན་ནང་གི་གནད་ཡོད་མི་སྣ་སོགས་ཀྱིས་བོད་མིའི་རང་ལུས་མེར་སྲེག་སྐོར་ལ་གཏམ་བཤད་སྤེལ་བའི་ནང་དོན་སྙིང་བསྡུས། རང་ལུས་མེར་སྲེག་གནང་མཁན་གྱི་ཞལ་ཆེམས་སོགས་སྒྲིག་གཤོམ་གནང་ཡོད། ཐེ་ཝན་རང་དབང་ཐང་ཆེན་དུ་རྒྱ་ནག་སྐམ་སའི་ཡུལ་སྐོར་སྤྲོ་འཆམ་པ་འགྲོ་སའི་གལ་ཆེའི་ས་ཚིགས་ཤིག་ཡིན་པ་དང་། གོང་གསལ་འགྲེམས་སྟོན་གྱི་ནང་དོན་ཁག་ལས་རྒྱ་ནག་གཞུང་གིས་དུས་རྒྱུན་དུ་ལོག་འགྲེལ་བྱས་པ་ཁག་བདེན་མིན་ར་སྤྲོད་གསལ་པོ་བྱེད་ཐུབ་པ་བྱུང་ཡོད།
