༢༠༠༩ ཕྱི་ཟླ་ ༡༠ ཚེས་ ༡ རེས་གཟའ་ཕུར་བུ།
༄༅། །ཕྱི་ལོ་ ༢༠༠༩ ཟླ་ ༩ ཚེས་ ༢༩ ཉིན་ཁེ་ཎ་ཌའི་གྲོང་ཁྱེར་ཝཎ་ཁུ་བའི་བརྙན་འཕྲིན་བརྒྱུད་ལམ་པས་༸གོང་ས་མཆོག་དང་ཁལ་ལི་ཕོ་ནི་ཡའི་མངའ་སྡེའི་སྲིད་སྐྱོང་ལྕམ་སྐུ་མ་རི་ཡ་ཤྲི་ར་མཆོག་རྣམ་གཉིས་ལྷན་ཞུགས་སྐབས། ༸གོང་ས་མཆོག་གིས་ཞི་བདེ་བསྐྲུན་རྒྱུར་བུད་མེད་ཚོས་གལ་གནད་ཆེན་པོའི་ཐོག་ལས་ཀ་བྱེད་བཞིན་ཡོད་ནའང་སྣང་ཆུང་ཡོང་གི་ཡོད་བུད་མེད་ནི་མེད་དུ་མི་རུང་བ་ཞིག་རེད། ཅེས་བཀའ་སྩལ་བ་དང་། ཡང་༸གོང་ས་མཆོག་གིས་བཀའ་ཕེབས་དོན། ངོས་རང་ལྷའི་རྒྱལ་པོ་དང་སངས་རྒྱས་རེད་ཅེས་བརྗོད་ནའང་འདྲ། ཡང་ན་བདུད་རེད་ཅེས་གང་བརྗོད་ཀྱང་ངོས་ལ་ཁྱད་པར་གང་ཡང་མེད། འོན་ཀྱང་ངོས་ནས་འཛམ་གླིང་འདིའི་ནང་བུད་མེད་རྣམས་ལ་དམིགས་བསལ་འགན་ཁུར་དགོས་སྐོར་ནན་བརྗོད་བྱེད་ཀྱི་ཡོད་པར་བརྟེན། ངོས་ལ་བུད་མེད་ཐོབ་ཐང་རྩོད་ལེན་པ་ཞེས་མིང་འདོགས་བཞིན་ཡོད། བུད་མེད་ཚོར་སྤྱི་ཚོགས་ནང་འགན་ཁུར་ཆེ་བ་ཞིག་སྤྲད་པ་ཡིན་ན་བུད་མེད་རང་ཉིད་ལ་ཡིད་ཆེས་སྐྱེས་ཐུབ་པ་ཞིག་ཡོང་གི་རེད། ང་ཚོས་བྱམས་བརྩེའི་དོན་དུ་འབད་བརྩོན་དམིགས་བསལ་བྱས་པའི་ཐོག་བུད་མེད་རྣམས་ལ་འགན་ཁུར་མང་བ་ཡོད་མཁན་ཞིག་ཆགས་ཐུབ་པ་དགོས། དེང་དུས་མང་གཙོའི་སྲིད་བྱུས་འོག་བུད་མེད་སྲིད་དོན་པ་རྣམས་བྱམས་བརྩེའི་བག་ཆགས་ཐོག་ལམ་ལྷོང་ཡོང་རྒྱུར་ལས་སླ་བ་ཡོད། མང་གཙོའི་རིང་ལུགས་ཀྱི་ཁྱད་ཆོས་གཅིག་ནི་རང་ནུས་འཇོན་ཐང་གང་ཡོད་པ་དེ་འདོན་ཐུབ་པ་དང་། མི་མང་ནས་ཀྱང་སྲིད་དོན་པའི་ལྷག་བསམ་དང་དྲང་བདེན། དེ་བཞིན་འོས་མིའི་ལྷག་བསམ་གཞིར་བཞག་ཐོག་འོས་འདེམས་བྱེད་ཐུབ་ཀྱི་ཡོད་པ་དེས་བུད་མེད་ཚོར་ཡག་པོ་བྱུང་ཡོད། ཅེས་བཀའ་སྩལ་ཡོད། ལྕམ་སྐུ་མ་རི་ཡ་ཤྲི་ར་ལགས་ཀྱིས་སྐབས་དེར་གསུང་དོན། ༸གོང་ས་མཆོག་གི་བུད་མེད་ནི་བྱམས་སྐྱོང་དང་། སློབ་སྟོན་བྱེད་མཁན། དེ་བཞིན་མ་འོངས་པའི་སྤྱི་ཚོགས་ནང་མི་སེར་ཡག་པོ་ཞིག་ཡིན་པ་ཡིད་ཆེས་གནང་བར་ཁོང་མོར་རང་ཉིད་ལ་སེམས་འགུལ་ཆེན་པོ་ཐེབས་ཡོད་སྐོར་བརྗོད་པ་དང་། ཁོང་མོ་ Orpheum འཁྲབ་སྟོན་ཁང་གི་འགོ་ཁྲིད་ཅིག་ཡིན་པའི་ཆ་ནས་འགྲོ་བ་མིའི་བདེ་སྡུག་དང་ཞི་བདེའི་ཐོག་ནང་ཁུལ་བགྲོ་གླེང་སོགས་ལ་འགན་ཁུར་གང་མང་ཞུ་རྒྱུ་ཡིན་སྐོར་གསུང་འདུག་ལ་ཕྱི་ལོ་ ༢༠༠༦ ལོར་རྒྱ་གར་དུ་ཕེབས་ནས་༸གོང་ས་མཆོག་ལ་ཨ་རིའི་བུད་མེད་ཚོགས་ཆེན་ཐོག་གདན་ཞུའི་མགྲོན་འབོད་ཞུ་མཁན་དེ་ཡིན་པ་བཅས་ཀྱི་གནས་བསྡུས་སུ།
