༢༠༡༤ ཟླ་ ༥ ཚེས་ ༣ རེས་གཟའ་སྤེན་པ།
༄༅། །ཕྱི་ལོ་ ༢༠༡༤ ཟླ་ ༤ ཚེས་ ༣༠ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་ཕོ་བྲང་གི་ཚོམས་ཆེན་ནང་ཝི་ཏི་ནམ་ནས་སླེབས་པའི་དད་ལྡན་ནང་ཆོས་དོན་གཉེར་བ་གྲངས་ ༡༤༥ དང་། རྒྱ་ནག་སྐམ་ས་ཆེན་པོ་ནས་སླེབས་པའི་རྒྱ་རིགས་ ༣༥ གློ་བུར་དུ་ལྷགས་པའི་ཕྱི་རྒྱལ་བ་ ༧ བཅས་པར་སྔ་དྲོའི་ཆུ་ཚོད་ ༩ ནས་ ༡༢ བར་ནང་ཆོས་ངོ་སྤྲོད་དང་འབྲེལ་ཡ་རབས་བཟང་སྤྱོད་སྐོར་ལ་ལམ་སྟོན་བཀའ་སློབ་དང་། ཆོས་ཞུ་བ་རང་རང་སོ་སོའི་ངོས་ནས་བློ་དོགས་མ་ཆོད་པའི་རིགས་ལ་དྲི་བའི་ལམ་ནས་དགོངས་སྐོར་ཞུས་རིགས་ལ་བློ་དོགས་ཆོད་པའི་བཀའ་ལན་སྩལ།
ཕྱི་ཟླ་ ༥ ཚེས་ ༡ ཉིན་ཆོས་ཞུ་བ་ཡོངས་ལ་དགེ་བསྙེན་གྱི་སྡོམ་པ་འབོགས་ཆོག་དང་། ལམ་གཙོ་རྣམ་གསུམ་གྱི་བཤད་ལུང་བཅས་བཀའ་དྲིན་བསྐྱངས། གོང་གསལ་ཉིན་གཉིས་རིང་ལ་ཕྱེད་ཡོལ་རྣམ་གྲྭ་མཁན་པོ་ཁྲོམ་ཐོག་རིན་པོ་ཆེ་མཆོག་གིས་ཝི་ཏི་ནམ་དང་། ཡང་སྟེང་རིན་པོ་ཆེ་མཆོག་དང་ངག་དབང་སྙན་གྲགས་ལགས་གཉིས་ཀྱིས་རྒྱ་རིགས་རྣམས་ལ་སྔ་དྲོའི་ཆོས་འབྲེལ་བསྐྱར་བཤད་གནང་འདུག
