༢༠༡༤ ཟླ་ ༥ ཚེས་ ༢ རེས་གཟའ་པ་སངས།
༄༅། །བརྒྱུད་ལམ་ཁག་ནང་གནས་ཚུལ་སྤེལ་གསལ་ལྟར་ན། སྡེ་དགེ་རྫོང་རྫ་ཁོག་རྫ་སྟོད་དགོན་གསར་དགོན་པའི་དགེ་འདུན་པ་བློ་བཟང་དོན་ཡོད་ལགས་རྒྱ་ནག་གིས་བཙོན་བཀྲོལ་བཏང་འདུག
ཕྱི་ལོ་ ༢༠༠༨ ལོར་རྒྱ་ནག་གཞུང་གིས་འཛིན་བཟུང་བཙོན་འཇུག་བྱས་པའི་སྡེ་དགེ་རྫོང་རྫ་ཁོག་རྫ་སྟོད་དགོན་གསར་དགོན་པའི་དགེ་འདུན་པ་བློ་བཟང་དོན་ཡོད་ལགས་དུས་བཀག་བཙོན་འཇུག་ལོ་དྲུག་གི་ལོ་དུས་གཙང་ནས་འདི་ལོའི་ཕྱི་ཟླ་ ༤ ཚེས་ ༢༧ ཉིན་རྒྱ་ནག་གི་བཙོན་ཁང་ནས་གློད་བཀྲོལ་བཏང་འདུག བློ་བཟང་དོན་ཡོད་ལགས་གློད་བཀྲོལ་བྱུང་ནས་རང་གི་གྲོང་ཚོར་ཕེབས་སྐབས་དགོན་གསར་དགོན་པའི་དགེ་འདུན་པས་གཙོས་ས་གནས་དེའི་ནང་ཡོད་པའི་དགེ་བཙུན་དང་། ཆབ་སྲིད་བཙོན་ཟུར་སོགས་ཀྱིས་དགའ་བསུ་གཟབ་རྒྱས་ཞུས་འདུག
དེ་ཡང་སྐུ་ཞབས་བློ་བཟང་དོན་ཡོད་ལགས་ཀྱིས་ཕྱི་ལོ་ ༢༠༠༨ ལོར་བོད་ས་ཁྱོན་ཡོངས་སུ་བོད་མི་ཚོས་རྒྱ་ནག་གཞུང་གི་དམ་བསྒྲགས་ཅན་གྱི་སྲིད་བྱུས་ལ་ཞི་རྒོལ་གནང་སྐབས་དགོན་གསར་དགོན་པའི་དགེ་འདུན་པ་ཚོ་དང་ལྷན་ངོ་རྒོལ་ལས་འགུལ་ནང་ཞུགས་པར་སྙད་དེ་རྒྱ་ནག་གཞུང་གིས་ཁོང་འཛིན་བཟུང་བྱས་ནས་མཐར་དཀར་མཛེས་འབྲིང་རིམ་ཁྲིམས་ཁང་གིས་སྐུ་ཞབས་བློ་བཟང་དོན་ཡོད་ལགས་སུ་བོད་རང་བཙན་གྱི་སྦྱར་ཡིག་འགྲེམས་སྤེལ་བྱས་པ་དང་། བོད་ཀྱི་རྒྱལ་དར་བསྒྲེངས་པ་སོགས་ཀྱི་ཉེས་འཛུགས་འོག་ལོ་དྲུག་བརྩོན་འཇུག་གི་ཁྲིམས་ཐག་བཅད་འདུག་པ་ཉེ་ལམ་བརྩོན་བཀྲོལ་བཏང་བའི་གནས་ཚུའ་ཐོན་འདུག
