༢༠༠༩ ཕྱི་ཟླ་ ༩ ཚེས་ ༣༠ རེས་གཟའ་ལྷག་པ།
༄༅། །ཕྱི་ལོ་ ༢༠༠༩ ཟླ་ ༩ ཚེས་ ༢༦ ཉིན་རྒྱབ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨ་རིའི་གྲོང་ཁྱེར་ཁལ་ལི་ཕོ་ནི་ཡའི་ཁུལ་གྱི་མཛད་འཕྲིན་ཁག་ལེགས་པར་གྲུབ་རྗེས་ཁེ་ཎ་ཌའི་གྲོང་ཁྱེར་ན་ཁུ་ར་ཆིབས་སྒྱུར་གྱི་གནམ་ཐང་དུ་༸ཞབས་སོར་འཁོད་སྐབས་ཏཱ་ལའི་བླ་མའི་ཞི་བདེ་དང་ཤེས་ཡོན་བསྟིེ་གནས་ཁང་གི་འགན་འཛིན་བིག་ཊོར་ཅེན་གྱི་གཙོས་གནད་ཡོད་མི་སྣ་ཁག་དང་། བོད་དོན་རྒྱབ་སྐྱོར་བ་དེ་བཞིན་ས་གནས་བོད་མི་རྣམས་ནས་ཕེབས་བསུ་གཟབ་རྒྱས་ཞུས་ཡོད་པ་རེད། ཕྱི་ཚེས་ ༢༧ ཉིན་༸གོང་ས་མཆོག་ན་ཁུ་ར་ནང་རྟེན་གཞི་བྱས་པའི་ཏཱ་ལའི་བླ་མའི་ཞི་བདེ་དང་ཤེས་ཡོན་བསྟི་གནས་ཁང་གིས་གོ་སྒྲིག་གནང་བའི། ཕྱི་ལོ་ ༢༠༠༩ ན་ཁུ་ར་ཞི་བདེའི་ཚོགས་འདུ། ཞེས་པ་དེར་ཆིབས་སྒྱུར་བསྐྱངས་ཡོད། ཞི་བདེའི་ཚོགས་འདུ་དེ་ཕྱི་ཚེས་ ༢༧ ནས་ ༢༩ བར་ཉིན་གྲངས་གསུམ་རིང་འཚོགས་རྒྱུ་ཡིན་པ་དང་། གྲོང་ཁྱེར་ན་ཁུ་ར་ནང་ཕྱི་ལོ་ ༡༩༥༤ ལོར་བཙུགས་པའི་ཕི་ཛར་སྒྲིག་འཛུགས་ Fetzer Institute ཞེས་པའི་ཚོགས་པ་དེས་འཛམ་གླིང་ནང་འགྲོ་བ་མིའི་རྒྱུད་ལ་བྱམས་བརྩེ་དང་།
བཟོད་བསྲན་སོགས་ཀྱི་ནུས་པ་དང་རིན་ཐང་ཇི་ཡོད་ཤེས་རྟོགས་དང་གོ་རྟོགས་སྤེལ་རྒྱུའི་ཐོག་ལས་དོན་སྤེལ་བཞིན་ཡོད། ཕྱི་ལོ་ ༢༠༠༩ ན་ཁུ་ར་ཞི་བདེའི་ཚོགས་འདུ་དེ་དབུ་འཛུགས་མ་གནང་གོང་། ཕི་ཛར་སྒྲིག་འཛུགས་ནས་༸གོང་ས་མཆོག་དང་དེ་སྔོན་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་ལྷོ་ཨ་ཕི་རི་ཀའི་ཡེ་ཤུའི་བླ་ཆེན་ཊ་ཊ་རྣམ་གཉིས་ལ་བྱམས་བརྩེ་དང་བཟོད་བསྲན་ཞེས་པའི་བྱ་དགའ་ཞིག་འབུལ་བཞེས་དང་སྦྲགས། ཨ་སྒོར་འབུམ་གཅིག ༡༠༠༠༠༠ རེ་ཕུལ་ཡོད། དེ་ནི་གཙོ་བོ་ཞི་བདེའི་དེད་དཔོན་རྣམ་གཉིས་ཀྱི་མཛད་རྗེས་ལ་རྒྱབ་སྐྱོར་ཆེད་དམིགས་པ་ཞིག་རེད་འདུག འོན་ཀྱང་སྐུ་ཞབས་ཊ་ཊ་མཆོག་ཅུང་སྐུ་ཁམས་དྭངས་མིན་ལ་བརྟེན་ཕེབས་ཐུབ་མེད་ཀྱང་ཁོང་གི་སྲས་མོ་ Mpho Tutu མོ་ཕོ་ཊ་ཊ་ནས་སྐུ་ཚབ་ཞུས་ཡོད་པ་རེད།
ཚོགས་འདུ་ཉིན་དང་པོའི་སྐབས་ཀྱི་བརྗོད་གཞི་ནི། མི་སྒེར་གྱི་ཞི་བདེ་བརྒྱུད་ནས་འཛམ་གླིང་ནང་ཞི་བདེ་ཡོང་བ་ཞེས་པ་དེ་ཡིན། ད་རེས་ཚོགས་འདུར་མི་གྲངས་ ༡༢༠༠༠ ཙམ་འདུ་འཛོམས་བྱུང་ཡོད་པ་དེར་༸གོང་ས་མཆོག་ནས་བཀའ་སློབ་ཕེབས་དོན། འཛམ་གླིང་ནང་ཞི་བདེ་ཡོང་བར་ཐོག་མ་མི་སྒེར་གྱི་ཞི་བདེའི་ཐོག་ནས་འགོ་འཛུགས་དགོས་པ་དང་། དེ་ནས་ནང་མི། དེ་ནས་སྤྱི་ཚོགས་བརྒྱུད་ནས་ཞི་བདེ་ཡོང་རྒྱུ་ཡིན་སྐོར་དང་། ད་དུང་བཀའ་གནང་དོན། ང་ཚོས་འཛམ་གླིང་ཁྱོན་ཡོངས་ལ། ང་ཚོ། ཞེས་གཅིག་པ་ཡིན་པའི་ལྟ་ཚུལ་འཛིན་ཐུབ་པ་བྱེད་དགོས། དེ་བཞིན་༸གོང་ས་མཆོག་ནས་སྐུ་ཞབས་ཊ་ཊ་མཆོག་གི་སྙུན་གཞི་མགྱོགས་པོ་དྲག་སྐྱེད་ཡོང་བའི་ཐུགས་སྨོན་ཡང་མཛད་ཡོད་པ་པ་རེད། ༸གོང་ས་མཆོག་ནས་བྱ་དགའ་ཨ་སྒོར་འབུམ་གཅིག་དེ་ནས་ཨ་སྒོར་ཁྲི་ལྔ་་ ༥༠༠༠༠ ཨ་རིའི་ཨེ་མོ་རི་མཐོ་སློབ་ཏུ་ཞལ་འདེབས་སུ་གསོལ་སྩལ་མཛད་ཡོད།
