༢༠༠༩ ཕྱི་ཟླ་ ༩ ཚེས་ ༢༨ རེས་གཟའ་ཟླ་བ།
༄༅། །ཕྱི་ལོ་ ༢༠༠༩ ཟླ་ ༩ ཚེས་ ༢༨ ཉིན་བཙན་བྱོལ་བོད་གཞུང་ཤེས་རིག་ལས་ཁུངས་ནས་གོ་སྒྲིག་འོག་གཏན་ཉིན་སློབ་གྲྭ་ཁག་གི་ཤེས་ཡོན་སྲིད་བྱུས་དང་མཐུན་པའི་གཞི་རིམ་བར་མའི་བསླབ་གཞིའི་རྩ་འཛིན་ཚོགས་ཆུང་གི་ཚོགས་འདུ་དང་པོ་དེ་གངས་སྐྱིད་གསོལ་ཐབ་ཚོགས་ཁང་དུ་དབུ་འཛུགས་ཀྱི་ཐོག་མར་ཤེས་རིག་ཟུང་དྲུང་བཀྲ་ཤིས་དོན་གྲུབ་ལགས་ནས་ཚོགས་འདུ་ངོ་སྤྲོད་གནང་བ་དང་དེ་རྗེས་སྐུ་མགྲོན་གཙོ་བོ་ཤེས་རིག་བཀའ་བློན་ཐུབ་
བསྟན་ལུང་རིག་མཆོག་གིས་དབུ་འབྱེད་གསུང་བཤད་གནང་གསལ། སློབ་གཞི་རྩ་འཛིན་བཟོ་རྒྱུའི་ཚོགས་ཆུང་གི་ནང་ནས་ལམ་སྟོན་ཚོགས་ཆུང་གི་གྲུབ་ཆ་ཆགས་ཡོད། ཁྱེད་རྣམས་ད་རེས་ཤེས་རིག་ལས་ཁུངས་ནས་འབོད་སྐུལ་གནང་བ་ལྟར་ཕེབས་པར་ཐུགས་རྗེ་ཆེ་ཞུ་རྒྱུ་ཡིན། དེ་བཞིན་གཞི་རིམ་བར་མའི་སློབ་གཞི་ལས་དོན་དེ་ཤེས་རིག་ལས་ཁུངས་ཀྱི་ལས་དོན་གྱི་གོ་རིམ་ནང་ནས་གལ་ཆེན་ཡིན་པ་དང་མ་འོངས་པའི་མི་རབས། འབྱུང་འགྱུར་གྱི་རྒྱལ་ཁབ། མི་རིགས་བཅས་ལ་ཐུག་པའི་ཕུགས་རྒྱང་རིང་བའི་ལས་འགན་ཞིག་ཡིན། སློབ་སྦྱོང་དང་ཤེས་ཡོན་སྤྲོད་རྒྱུ་དེ་ནི་མི་ཞིག་གི་འཚོ་བའི་མདུན་ལམ་བཟོ་རྒྱུ་ཙམ་གྱི་འཆར་སྣང་དེ་ཤུགས་ཆེ་ཙམ་ཡོང་གི་ཡོད་ནའང་དེ་ལྟ་བུའི་ལས་འགན་ནི་གཉིས་པ་ཡིན་ཞིང་། དང་པོ་དེ་ནི་༸གོང་ས་༸སྐྱབས་མགོན་ཆེན་པོ་མཆོག་གི་ཆོས་སྤྱོད་ཞི་བའི་ས་བོན་བོད་ཞི་བའི་བསྟི་གནས་སུ་འགྱུར་རྒྱུའི་ཐུགས་རེ་གནང་བ་དང། བཙན་བྱོལ་ནང་ཇི་ཙམ་གནས་དགོས་བྱུང་ཡང་བོད་མི་རིགས་ཀྱི་ངོ་བོ་མ་བརླག་པའི་ཐོག་ཁྱེད་རྣམས་ཀྱི་ཉམས་མྱོང་སྤངས་པའི་ཐོག་སློབ་ཚན་འཆར་གཞི་ལྟར་བསྒྲིག་རྒྱུའི་དགོངས་པ་བཞེས་རོགས་གནང་སོགས་ཀྱི་གསུང་བཤད་གྲུབ་མཚམས་ཚོགས་འདུ་དངོས་གཞི་དབུ་འཛུགས་གནང་ཡོད།
ད་ཐེངས་ཚོགས་འདུར་ཤེས་རིག་ལས་ཁུངས་ཀྱི་སྲོལ་རྒྱུན་ཚན་པའི་འགན་འཛིན་དང། སམ་བྷོ་ཊའི་སྤྱི་ཁྱབ་འགན་འཛིན། བོད་ཁྱིམ་སྤྱི་ཁྱབ་ཤེས་ཡོན་ངེས་སྟོན་པ། དེ་བཞིན་ཤེས་རིག་ཤེས་ཡོན་འགན་འཛིན་དང་སློབ་གྲྭ་ཁག་གི་སྐུ་ཚབ་བཅས་མཉམ་ཞུགས་ཀྱིས་ཉིན་གསུམ་རིང་འཚོགས་རྒྱུ་ཡིན་པའི་གནས་བསྡུས་སུ།།
