༢༠༠༩ ཕྱི་ཟླ་ ༩ ཚེས་ ༢༨ རེས་གཟའ་ཟླ་བ།
༄༅། །བོད་གཞུང་ཆོས་རིག་ལས་ཁུངས་ནས་ཕྱི་ལོ་ ༢༠༠༩ ཟླ་ ༩ ཚེས་ ༢༨ ཉིན་བཏང་གནས་ནང་འཁོད་དོན། སྡེ་ར་ལྡུན་གླིང་ཚང་གཞིས་ཁོངས་བཙུན་མའི་བཤད་གྲྭ་བརྩེ་ཆེན་བཤད་སྒྲུབ་བསམ་གཏན་ཕུན་ཚོགས་གླིང་གི་དབུ་འབྱེད་མཛད་སྒོའི་དམིགས་བསལ་སྐུ་མགྲོན་དུ་གདན་ཞུས་ལྟར། ཆོས་རིག་བཀའ་བློན་ཚེ་རིང་ཕུན་ཚོགས་མཆོག་དང་ཕྱག་རོགས་དྲུང་གཞོན་ཐུབ་བསྟན་ཚེ་རིང་བཅས་ཚེས་ ༢༥ ཞོགས་པ་སྣུམ་འཁོར་བརྒྱུད་ཕེབས་ཐོན་གྱིས་ཕྱི་དྲོ་ཆུ་ཚོད་ ༧།༣༠ ཙམ་ལ་རཇཔུར་ས་སྐྱ་ཆོས་སྒར་དུ་འབྱོར་རྗེས་འཁོན་རིགས་བསྟན་པའི་མངའ་བདག་དཔལ་ས་སྐྱ་བདག་ཁྲི་རིན་པོ་ཆེ་མཆོག་ལ་མཇལ་བཅར་ཞུས།
ཚེས་ ༢༦ ཞོགས་པ་ཆུ་ཚོད་ ༨།༠༠ ཐོག་ཕོ་བྲང་མགྲོན་ཁང་ནས་གླིང་ཚང་གཞིས་ཆགས་ཕྱོགས་སུ་ཕེབས་ཐོན་གྱིས་བཙུན་མའི་བཤད་གྲྭ་བརྩེ་ཆེན་བཤད་སྒྲུབ་བསམ་གཏན་ཕུན་ཚོགས་གླིང་དུ་འབྱོར་བ་དང་། བཤད་གྲྭའི་འགན་འཛིན་མཁན་པོ་བསོད་ནམས་རྒྱ་མཚོ་མཆོག་ནས་སྣེ་ལེན་གནང་རྗེས་ངོར་ཀླུ་ལྡིང་མཁན་ཆེན་མདུན་བཅར་ཞུས། དེ་འཕྲོས་ཕྱི་ནང་སྐུ་མགྲོན་ཡོངས་ནས་འཁོན་རིགས་བསྟན་པའི་མངའ་བདག་དཔལ་ས་སྐྱ་བདག་ཁྲི་རིན་པོ་ཆེ་མཆོག་ལ་ཕེབས་བསུ་ཞུས་རྗེས་མགོན་པོ་གང་ཉིད་ནས་བཙུན་མའི་བཤད་གྲྭ་དབུ་འབྱེད་ཤིས་སྨོན་དང་བཅས་དར་མཚོན་གཅོད་འབྲེག་གིས་ཚོགས་ཁང་དུ་ཞབས་འཁོད་དང་བསྟུན། མཛད་རིམ་དབུ་འཛུགས་ཀྱི་ཞལ་འདོན་སྐབས་བཙན་བྱོལ་བོད་གཞུང་ཆོས་རིག་ལས་ཁུངས་དང་བཙུན་མའི་ལས་འཆར་དགོན་སྡེ་ཁག་བཅས་ནས་སྙེན་བཀུར་མང་ཇ་དང་སྐུ་འགྱེད་ཕུལ།
དེ་རྗེས་བཤད་གྲྭའི་འབྲེལ་ཡོད་ནས་མཛད་རིམ་ངོ་སྤྲོད་གནང་དོན་ལྟར། བཙུན་དགོན་མཁན་པོས་ཕེབས་བསུའི་གསུང་བཤད་དང་། ས་སྐྱ་མཐོ་སློབ་ཀྱི་མཁན་པོ་བསོད་ནམས་རྒྱ་མཚོ་མཆོག་ནས་བཙུན་དགོན་གྱི་ངོ་སྤྲོད་གནང་། དེ་ནས་རིམ་བཞིན་ས་སྐྱ་སྤྱི་འཐུས། བཙུན་མའི་ལས་འཆར་གྱི་ངེས་སྟོན་པ་བཀའ་ཟུར་རིན་ཆེན་མཁའ་འགྲོ་དང་། དཔལ་ལྡན་ཆོས་རིག་བཀའ་བློན་མཆོག་བཅས་ནས་གསུང་བཤད་་གསུང་གྲུབ་རྗེས། དཔལ་ས་སྐྱ་གོང་མ་བདག་ཁྲི་རིན་པོ་མཆོག་ནས་འདི་ཕྱིའི་ལམ་སྟོན་བཀའ་སློབ་ཟབ་མོ་བཀྲིན་ཆེ་གསུངས་རྗེས་མཛད་སྒོ་ཉིན་དང་པོ་ལེགས་པར་གྲུབ་སྟེ། ཚེས་ ༢༧ ཞོགས་པ་ཆུ་ཚོད་ ༧།༠༠ ཐོག་བཙུན་མའི་བཤད་གྲྭ་ནས་ཕེབས་ཐོན་གྱིས་ཕྱི་དྲོའི་ཆུ་ཚོད་ ༦།༠༠ ཙམ་ལ་རྡ་སར་ཕྱིར་ཕེབས་གནང་བའི་གནས་བསྡུས་སུ།
