༢༠༡༤ ཟླ་ ༤ ཚེས་ ༢༨ རེས་གཟའ་ཟླ་བ།
༄༅། །ཕྱི་ལོ་ ༢༠༡༤ ཟླ་ ༤ ཚེས་ ༢༦ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་གི་གསུང་ཆོས་རྭ་བར་ཕྱི་རྒྱལ་ཡུལ་གྲུ་འདྲ་མིན་ཁག་ནས་ཕེབས་པའི་ཕྱི་རྒྱལ་བ་ཁྱོན་མི་གྲངས་ ༡༦༠༠ བརྒལ་བ་དང་རྒྱ་གར་བ་ ༤༠༠ ཙམ་ལ་དམིགས་བསལ་མཇལ་ཁ་དང་བཀའ་སློབ་སྩལ་འདུག
བརྙན་འཕྲིན་གཟིགས་ཆེད་འདིར་གནོན།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩ ཐོག་༸གོང་ས་མཆོག་གིས་དེར་འདུས་ཕྱི་རྒྱལ་བ་རྣམ་པར་བཀའ་སློབ་སྩལ་དོན། དེ་རིང་ངོས་རང་ཁྱེད་རང་ཚོ་དང་ཁྱུག་ཙམ་ཞིག་ཐུག་རྒྱུ་བྱུང་བར་ཧ་ཅང་དགའ་པོ་བྱུང་། ཚང་མར་འཚམས་འདྲི་ཡོད། སྤྱིར་བཏང་དེང་སང་གི་དུས་ཚོད་འདིར་ཡ་རབས་བཟང་སྤྱོད་ཀྱི་མ་འདང་བ་དང་། ཆོས་ལུགས་ཀྱི་མིང་ཐོག་ནས་རྙོག་གྲ་མང་དག་གཅིག་ཡོང་བཞིན་ཡོད། ངོས་ཀྱིས་དུས་རྟག་ཏུ་ཆོས་ལུགས་དང་མ་འབྲེལ་བའི་ཐོག་ནས་ཡ་རབས་བཟང་སྤྱོད་གོང་སྤེལ་གཏོང་རྒྱུར་དམིགས་བསལ་གྱི་ཤུགས་སྣོན་རྒྱག་བཞིན་ཡོད། དེ་རིང་ངོས་ཀྱིས་ཁྱེད་རང་ཚོར་གཏམ་བཤད་བྱས་པ་རྣམས་སོ་སོའི་གཉེན་སྤུན་དང་གྲོགས་པོ། གྲོགས་མོ་རྣམས་ལ་སྤེལ་ཐུབ་ན་ཡག་པོ་ཡོད། དེ་བཞིན་ཆོས་ལུགས་ཚང་མས་བྱམས་སྙིང་རྗེ་དང་བརྩེ་བ་གལ་ཆེན་ཡིན་སྐོར་གཅིག་གྱུར་ཐོག་གསུང་གི་ཡོད་སྟབས། དེའི་ཐོག་ཞབས་འདེགས་བསྒྲུབ་རྒྱུར་ང་ཚོ་ཚང་མར་འགན་འཁྲི་ཡོད། ལྷག་པར་རྒྱ་གར་ནང་སྔ་མོ་ནས་ཆོས་ཁས་ལེན་མཁན་དང་མི་ལེན་མཁན་ཚང་མར་གུས་ཞབས་བྱེད་རྒྱུའི་ལུགས་སྲོལ་ཡོད།
དཔེར་ན། རྒྱང་འཕེན་པ་ལྟ་བུ་ཡིན་ན། རྩ་བའི་ཆ་ནས་ཆོས་ལུགས་གཞན་ཁག་གིས་དགག་པ་རྒྱག་གི་ཡོད་ཀྱང་། ཉམས་ལེན་བྱེད་མཁན་ཚོར་དྲང་སྲོང་ལྟ་བུའི་ཐ་སྙད་བཞག་སྟེ་གུས་བཀུར་ཞུ་སྲོལ་རྒྱ་གར་ལ་ལོ་ངོ་སྟོང་ཕྲག་མང་པོའི་གོང་ནས་ཡོད། འདི་ལྟ་བུའི་རིང་ལུགས་དེ་དེང་སྐབས་ཀྱི་འཛམ་གླིང་ནང་དམིགས་བསལ་གྱི་དགོས་མཁོ་ཆེན་པོ་དང་རན་པོ་ཆགས་ཡོད། འཛམ་གླིང་འདིའི་སྟེང་གི་དཀའ་རྙོག་མང་ཆེ་བ་ང་ཚོ་འགྲོ་བ་མིས་བཟོས་པ་ཤ་སྟག་ཆགས་ཡོད། ལྷག་པར་ང་ཚོ་ཚང་མ་འགྲོ་བ་མི་གཅིག་མཚུངས་ཡིན་པའི་དངོས་ཡོད་གནས་ཚུལ་གཙིགས་ཆེར་མ་འཛིན་པར། ང་ཚོ་དང་ཁྱེད་ཚོ་ཞེས་པའི་དབྱེ་འབྱེད་ཀྱི་བསམ་ཚུལ་བཟུང་བ་ལས་བྱུང་བ་ཞིག་ཆགས་ཡོད། དཀའ་རྙོག་རྣམས་དཀོན་མཆོག་ལ་གསོལ་བ་བཏབ་པ་ཙམ་གྱིས་སེལ་ཐབས་མེད། དེར་བརྟེན་ང་ཚོས་བྱམས་སྙིང་རྗེ་དང་གཞན་ཕན་གྱི་བསམ་བློ་བཏང་ཐོག་ཡ་རབས་སྤྱོད་བཟང་གོང་སྤེལ་བཏང་བ་བརྒྱུད་ནས་དཀའ་ངལ་སེལ་ཐབས་བྱེད་དགོས་རྒྱུ་ཧ་ཅང་གལ་ཆེན་པོ་ཆགས་ཡོད་སྐོར་སོགས་ཀྱི་བཀའ་སློབ་སྩལ་ཡོད། དེ་རྗེས་ལུང་ཚན་སོ་སོར་ཆ་བགོས་ཀྱི་༸གོང་ས་མཆོག་དང་ལྷན་སྐུ་པར་ལྷན་སྒྲོན་གནང་འདུག་པ་བཅས།།
