༢༠༡༤ ཟླ་ ༤ ཚེས་ ༢༨ རེས་གཟའ་ཟླ་བ།
༄༅། །འདི་གར་བཞུགས་སྒར་ཀིརྟིའི་
བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་ལགས་དང་ཀ་ཉག་ཚེ་རིང་ལགས་གཉིས་ཀྱིས་བཏང་གནས་ནང་འཁོད་དོན། ཕྱི་ལོ་ ༢༠༡༤ ཟླ་ ༤ ཚེས་ ༢༦ ཉིན་གྱི་བོད་ནང་གི་ཆུ་ཚོད་ ༢།༣༠ ཙམ་ལ་རང་ལོ་༡༩ ལ་སོན་པའི་རྔ་བ་ཀིརྟི་དགོན་པའི་གྲྭ་བློ་བཟང་བསྟན་པ་ལགས་ཀྱིས་མགོ་ལ་བོད་ཀྱི་རྒྱལ་དར་བྲིས་མ་ཞིག་དཀྲིས་ཤིང་ལག་ཏུ་༸གོང་ས་མཆོག་གི་སྐུ་པར་ཆེན་པོ་ཞིག་བཟུང་ནས་རྔ་བ་རྫོང་མཁར་གྱི་གཞུང་ལམ་དུ་ཐོན་ཏེ་རྒྱ་གཞུང་གིས་བོད་ཐོག་བཟུང་བའི་གཏིང་གནག་པའི་སྲིད་བྱུས་ལ་ངོ་རྒོལ་སྐད་འབོད་ཀྱིས་གོམ་འགྲོས་གནང་འདུག་ཅིང་། སྐར་མ་ཁ་ཤས་ལས་མ་འགོར་བར་སྔ་ས་ནས་གྲ་སྒྲིག་བྱས་ནས་ཡོད་པའི་ཉེན་རྟོག་དམག་མི་རྣམས་བསླེབས་ཏེ་ཁོང་བཙན་ཁྲིད་བྱས་རྗེས་ཁོང་གི་གནས་ཚུལ་དང་། སྐད་འབོད་ཀྱི་ནང་དོན་སོགས་ད་བར་ཤེས་རྟོགས་བྱུང་མེད།
ཁོང་ནི་བོད་མདོ་སྨད་རྔ་བ་རང་སྐྱོང་ཁུལ་རྔ་བ་རྫོང་རྨེའུ་རུ་མའི་རུ་ཆེན་གཉིས་པ་ནས་ཡིན་ཞིང་།
ཕ་ངག་ཆུང་དང་མ་སྒྲོལ་མ་ཆོས་ཁོ་གཉིས་ཀྱི་བུ་ཆུང་བ་ཡིན་པ་དང་། ཆུང་ཆུང་སྐབས་ནས་རྔ་བ་ཀིརྟི་དགོན་པར་གྲྭ་པ་བྱས་ནས་དེང་སྐབས་རྔ་བ་ཀིརྟི་དགོན་པའི་ནང་བསྟན་སྔོན་འགྲོའི་སློབ་གྲྭའི་འཛིན་གྲྭ་དགུ་པ་ཡིན་འདུག ཁོང་ལ་མ་གཅིག་གི་སྤུན་རྒན་པ་གྲྭ་པ་གཉིས་ཡོད་པའི་གཅིག་དེང་སྐབས་རྒྱ་གར་ལྷོ་ཕྱོགས་འབྲས་སྤུངས་སུ་སློབ་གཉེར་གནང་བཞིན་ཡོད་ལ། གཅིག་རྔ་བ་ཀིརྟི་དགོན་པའི་ནང་དུ་ཡོད་འདུག དེང་སྐབས་ཀྱི་རྔ་བ་ནི་སྔར་བཞིན་དྲག་ཆས་ཉེན་རྟོག་པ་དང་དམིགས་བསལ་ཉེན་རྟོག་པ་བརྒྱ་ཕྲག་མང་པོས་གོམ་པ་གང་གི་རྒྱབ་ལོགས་ན་དྲག་གནོན་བྱེད་ཆོག་ཆོག་གི་གྲ་སྒྲིག་བྱས་ནས་ཡོད་པའི་དམ་བསྒྲགས་འོག་ལ་ཡོད་ཅིང་། ནམ་རྒྱུན་ཞི་བའི་མི་མང་ལ་མེ་མདའ་ཁ་གཏད་ནས་ཡོད་པའི་ཉེན་རྟོག་དམག་དཔུང་གི་སྐོར་སྲུང་དང་། བརྙན་ལེན་འཕྲུལ་ཆས་ཧ་ཅང་མང་པོས་ཕྱོགས་གང་སར་ཁེངས་པའི་གནས་སྟངས་ཧ་ཅང་སྡུག་པོ་ཞིག་གི་འོག་ལ་ཡོད་འདུག
