༢༠༡༤ ཟླ་ ༤ ཚེས་ ༢༣ རེས་གཟའ་ལྷག་པ།
༄༅། །ཕྱི་ལོ་ ༢༠༡༤ ཟླ་ ༤ ཚེས་ ༢༣ ནས་ ༢༨ བར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་རྒྱ་གར་ལྷོ་ཕྱོགས་སྦེལ་ཀོབ་བོད་མིའི་གཞིས་ཆགས་སུ་ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་ཆེན་པོ་མཆོག་དགུང་གྲངས་ཉེར་ལྔ་བཞེས་པའི་གཞུང་འབྲེལ་སྐུའི་འཁྲུངས་སྐར་མཛད་སྒོར་ཕེབས་ཞུགས་གནང་རྒྱུ་དང་། ཧོན་སུར་རབ་རྒྱས་གླིང་དུ་བོད་རིགས་མང་ཚོགས་ལ་གསུང་བཤད། དེ་བཞིན་སྦེང་ལོར་རྟེན་གཞི་བྱས་པའི་༸ཏཱ་ལའི་བླ་མ་མཐོ་རིམ་སློབ་གཉེར་ཁང་དང་། མེ་སོར་ཁུལ་གནས་སྡོད་བོད་རིགས་སློབ་ཕྲུག་རྣམས་ལ་གསུང་བཤད་གནང་རྒྱུ་མ་ཟད། ལྡི་ལིར་དབུ་མའི་ལམ་གྱི་མི་མང་ལས་འགུལ་ཁང་ནས་གོ་སྒྲིག་ཞུས་པའི་བགྲོ་གླེང་གི་ལས་རིམ་བཅས་སུ་གསུང་བཤད་ཆེད་གཞུང་འབྲེལ་ཕྱོགས་ཕེབས་གནང་རྒྱུ་ཡིན་འདུག དེ་ཡང་ཕྱི་ཚེས་ ༢༣ ཉིན་སྲིད་སྐྱོང་མཆོག་གྷ་གལ་ནས་མཁའ་ལམ་བརྒྱུད་ལྡི་ལིར་དང། དེ་ནས་འཁའ་ལམ་བརྒྱུད་སྦེང་ལོར་དུ་ཕེབས་ཐོན་གནང་རྒྱུ་དང་། ཕྱི་ཚེས་ ༢༤ ཉིན་གྱི་སྔ་དྲོ་སྦེང་ལོར་ཁུལ་གྱི་ལས་རིམ་གྲུབ་མཚམས་ཉིན་རྒྱབ་སྦེང་ལོར་ནས་སྦེལ་ཀོབ་ཏུ་ཕེབས་ཐོན་གནང་རྒྱུ། ཕྱི་ཚེས་ ༢༥ ནས་ ༢༦ བར་སྦེལ་ཀོབ་བོད་མིའི་གཞིས་ཆགས་སུ་ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་ཆེན་པོ་མཆོག་དགུང་གྲངས་ཉེར་ལྔ་བཞེས་པའི་གཞུང་འབྲེལ་སྐུའི་འཁྲུངས་སྐར་མཛད་སྒོའི་སྐུ་མགྲོན་དུ་ཕེབས་ཞུགས་གནང་རྒྱུ་མ་ཟད། ཧོན་སུར་རབ་རྒྱས་གླིང་དུ་བོད་རིགས་མང་ཚོགས་ལ་གསུང་བཤད་གནང་རྒྱུ་ཡིན་འདུག དེ་རྗེས་སྦེང་ལོར་ནས་མཁའ་ལམ་བརྒྱུད་ལྡི་ལིར་ཕེབས་ཐོན་གྱིས་ཕྱི་ཚེས་ ༢༧ ཉིན་དབུ་མའི་ལམ་གྱི་མི་མང་ལས་འགུལ་ཁང་གི་བགྲོ་གླེང་གོ་རྟོགས་སྤེལ་རྒྱུའི་ལས་རིམ་ཐོག་གསུང་བཤད་གནང་རྗེས་མཁའ་ལམ་བརྒྱུད་ཨམ་རིཏ་སཱར་ཕེབས་འབྱོར་ཐོག་ཨམ་རིཏ་སཱར་ནས་རླངས་འཁོར་བརྒྱུད་ཅོན་ཏ་རར་ཕེབས་ཐོན་གནང་རྒྱུ། ཕྱི་ཚེས་ ༢༨ ཉིན་ཅོན་ཏ་རར་སྔ་འགྱུར་ཟབ་གསང་ཆོས་འཁོར་གླིང་རྟེན་དང་བརྟེན་པར་བཅས་པ་གསར་བཞེངས་ལེགས་གྲུབ་ཀྱི་དབུ་འབྱེད་མཛད་སྒོར་མཉམ་ཞུགས་གྲུབ་མཚམས་རྡ་སར་ཕེབས་འབྱོར་གནང་རྒྱུ་ཡིན་འདུག་པ་བཅས།།
