༢༠༡༤ ཟླ་ ༤ ཚེས་ ༡༦ རེས་གཟའ་ལྷག་པ།
༄༅། །ཕྱི་ལོ་ ༢༠༡༤ ཟླ་ ༤ ཚེས་ ༡༦ ཉིན་དཔལ་ལྡན་སྲིད་སྐྱོང་མཆོག་གིས་བཀའ་ཤག་གི་ཚོགས་ཁང་ནང་བོད་མིའི་སྒྲིག་འཛུགས་ཀྱི་བོད་ཀྱི་སྲིད་བྱུས་ཉམས་ཞིབ་ཁང་གི་དྲྭ་རྒྱ་དང་། ད་ལྟའི་བོད་ནང་གི་དབང་འཛིན་པ། ཁུལ་དང་གྲོང་ཁྱེར་ནས་ལྗོངས་དང་ཞིང་ཆེན་རིམ་པ་བར་གྱི་དཔོན་རིགས་ངོ་སྤྲོད་ཅེས་པའི་དཔེ་དེབ་དབུ་འབྱེད་གནང་བ་དང་སྦྲགས་གསུང་བཤད་གནང་དོན།
སྔ་མོ་ངོས་རང་རྒྱ་རིགས་མང་དག་གཅིག་དང་ཐུག་ནས་བགྲོ་གླེང་བྱས་པའི་ཉམས་མྱོང་ཡོད་སྟབས་དེའི་སྐོར་ཞུས་ན་བསམ་བྱུང་།རྒྱ་རིགས་མང་པོ་ཞིག་ལ་བོད་དོན་སྐོར་ལམ་སེང་འགྲེལ་བརྗོད་བྱེད་རྒྱུ་ཁག་པོ་ཡོད། གང་ཡིན་བརྗོད་ན་ཁོང་རྣམས་རྒྱ་ནག་ནང་བཞུགས་ནས་མི་ཚེ་ཧྲིལ་པོའི་རིང་བོད་དོན་སྐོར་གནས་ཚུལ་གང་གོ་མྱོང་ཡོད་པ་རྣམས་རྒྱ་ནག་གཞུང་གིས་འཁྱོག་བཤད་བྱས་པ་དེ་དག་ཆགས་ཡོད། དེར་བརྟེན་ཁོང་ཚོས་རྒྱ་མིའི་གསར་འགྱུར་བརྒྱུད་ལམ་ནང་གང་བཀོད་པ་དེ་མ་གཏོགས་གཞན་མཁྱེན་གྱི་མེད་སྟབས། ཁོང་རྣམས་དང་བགྲོ་གླེང་བྱེད་སྐབས་ཁོང་ཚོས་རྒྱ་ནག་གཞུང་གིས་འགྲེལ་བརྗོད་གང་བྱས་པ་དེ་བདེན་པ་ཡིན་ཤག་བྱས་ཏེ་ཏོག་ཙམ་ཁག་པོ་ཡོད། ང་ཚོ་བོད་མི་ཚོས་གནས་ཚུལ་གང་བཤད་པ་དེ་དག་བདེན་པ་ཡིན་པ་བརྗོད་མ་དགོས་ཀྱང་ཁོང་ཚོའི་བློ་ངོར་རྒྱ་ནག་གཞུང་གིས་འཁྱོག་བཤད་གང་བྱས་པ་དེ་དག་བདེན་པར་འཛིན་ཡོད་སྟབས་བདེན་པ་གཉིས་དབར་འགལ་བ་ཕྱིན་ནས་བདེན་པ་དེ་གཉིས་ཀྱི་དབུས་ལ་གནས་ནས་ལྟ་ཐུབ་མི་སྲིད་པ་ལྟ་བུ་ཆགས་ཡོད། རྒྱ་ནག་གཞུང་གིས་བོད་ལ་ཡར་རྒྱས་ཧ་ཅང་བཏང་ཡོད་སྐོར་དང་བོད་མི་རྣམས་བདེ་སྐྱིད་ལྡན་པའི་ངང་གནས་ཡོད་སྐོར་འཁྱོག་བཤད་བྱེད་བཞིན་ཡོད། འོན་ཀྱང་ང་ཚོས་བོད་ནང་རྒྱ་ནག་གཞུང་གིས་བཙན་བཟུང་འོག་བོད་མི་རྣམས་དཀའ་སྡུག་ཧ་ཅང་མྱོང་བཞིན་ཡོད་པ་སོགས་བརྗོད་བཞིན་ཡོད།
དེར་བརྟེན་རིམ་བཞིན་རྒྱ་མིའི་བསམ་བློ་གཏོང་ཕྱོགས་དང་བསམ་བློ་འཁྱེར་ཕྱོགས་གཞི་གང་འདྲ་ཞིག་ལ་འཁྱེར་ནས་ཡོང་བཞིན་ཡོད་པའི་སྐོར་དཔྱད་པ་བྱས་ནས་ཕན་ཐོགས་ཡོད་པའི་ཉམས་མྱོང་བྱུང་། ཕྱིས་སུ་རྒྱ་མི་ཚོས་བོད་དོན་སྐོར་འགྲེལ་བཤད་བྱེད་སྐབས་ངོས་ཀྱིས་རྒྱ་རིགས་ཚོར་ཁྱེད་ཚོས་བོད་ཀྱི་གནས་ཚུལ་དེ་དག་གཞི་གང་ལ་བཅོལ་ནས་བརྗོད་ཀྱི་ཡོད་ཅེས་དྲི་བ་གཏོང་གི་ཡོད། སྐབས་དེར་ཁོང་ཚོས་རྒྱ་ནག་གཞུང་གི་གསར་འགྱུར་བརྒྱུད་ལམ་ནང་ནས་ཤེས་རྟོགས་བྱུང་སྐོར་བརྗོད་ཀྱི་འདུག་པ་དེར་ངོས་ཀྱིས་དེ་འདྲ་ཡིན་ན། དུས་རྒྱུན་དུ་ཁྱེད་ཚོས་རྒྱ་མིའི་གསར་འགྱུར་བརྒྱུད་ལམ་ཁག་ནས་རྒྱལ་སྤྱིའི་སྐོར་གྱི་གནས་ཚུལ་ཐོན་པ་རྣམས་ཡིད་ཆེས་ཇི་ཙམ་བྱེད་ཀྱི་ཡོད་སྐོར་འདྲི་སྐབས་ཁོང་ཚོས་བརྒྱ་ཆ་ལྔ་བཅུ་ལྔ་བཅུ་ཡིན་ཞེས་བརྗོད་ཀྱི་རེད། དེ་བཞིན་ཁོང་ཚོས་རྒྱ་ནག་གཞུང་གིས་རྒྱལ་ནང་གི་གནས་ཚུལ་དྲིལ་བསྒྲགས་བྱས་པ་རྣམས་ལ་ཡིད་ཆེས་བརྒྱ་ཆ་ལྔ་བཅུ་ལྔ་བཅུ་བྱེད་ཀྱི་ཡོད་པ་བརྗོད་ཀྱི་འདུག དེར་བརྟེན་ངོས་ཀྱིས་ཁོང་ཚོར་དེ་འདྲ་ཡིན་ན་བོད་སྐོར་རྒྱ་ནག་གི་གསར་འགྱུར་བརྒྱུད་ལམ་ཁག་ནང་ཐོན་པ་རྣམས་ནས་བདེན་པ་བརྒྱ་ཆ་ལྔ་བཅུ་གང་ཡིན་དང་རྫུན་མ་བརྒྱ་ཆ་ལྔ་བཅུ་གང་ཡིན་ཞེས་འདྲི་སྐབས་ཁོང་ཚོས་དེའི་སྐོར་བསམ་བློ་གང་ཡང་འཁོར་མ་བྱུང་། ངའི་བསམ་པར་བོད་སྐོར་རྒྱ་ནག་གཞུང་གིས་གང་བཤད་པ་དེ་དག་ཧ་ལམ་བརྒྱ་ཆ་བརྒྱ་བདེན་པར་བརྩི་བཞིན་ཡོད་ཅེས་བརྗོད་ཀྱི་རེད། ཁོང་ཚོས་བོད་སྐོར་རྒྱ་ནག་གཞུང་གིས་འཁྱོག་བཤད་བྱས་པ་དེ་དག་ལ་གཞི་བཅོལ་ནས་བོད་སྐོར་བརྗོད་སྐབས་བོད་རང་སྐྱོང་ལྗོངས་ལ་མཚོན་ན་དབང་ཆ་ཚང་མ་བོད་རིགས་ལ་ཡོད་པ་བརྗོད་ཀྱི་རེད།
འོན་ཀྱང་དོན་དངོས་ཐོག་བོད་རང་སྐྱོང་ལྗོངས་ལ་མཚོན་ན་རྒྱ་ནག་གུང་ཁྲན་ཏང་མི་འགོ་ཁྲིད་མཐོ་ཤོས་ཡིན་པ་མི་གྲངས་ ༡༥ ཡོད་ཁོངས་ནས་བོད་རིགས་དྲུག་དང་རྒྱ་རིགས་དགུ་ཡོད། གཞི་རྩའི་རྒྱ་ནག་གི་རྩ་ཁྲིམས་དགོངས་དོན་ལྟར་ན་བོད་རང་སྐྱོང་ལྗོངས་ནང་དུ་རང་སྐྱོང་གི་གནས་བབ་ལག་བསྟར་བྱེད་ཀྱི་མེད་སྐོར་ང་ཚོས་བསྒྲགས་བཞིན་ཡོད། ད་བར་བོད་རང་སྐྱོང་ལྗོངས་ཀྱི་འགོ་ཁྲིད་མཐོ་ཤོས་ཀྱི་ཏང་མི་དེ་བོད་རིགས་ནམ་ཡང་ཆགས་མྱོང་མེད་པ་དེས་རྩ་ཁྲིམས་དགོངས་དོན་ལག་བསྟར་བྱེད་ཀྱི་མེད་པའི་ཁུངས་ལྡན་ར་སྤྲོད་གསལ་པོ་ཆགས་ཡོད་པ་དེ་ང་ཚོས་རྒྱ་རིགས་ཚོར་ཞུ་བཞིན་ཡོད། ལྷག་པར་དུ་བོད་རང་སྐྱོང་ལྗོང་ཁུལ་དུ་ཏང་གི་ལས་བྱེད་ ༡༥ ཡོད་པའི་ནང་ནས་དགུ་རྒྱ་རིགས་དང་དྲུག་བོད་རིགས་ཡིན་སྟབས་གྲངས་མང་ཉུང་གི་ཆ་ནས་བོད་རིགས་ཚོར་དབང་ཆ་མེད་པ་ཧ་ཅང་གསལ་པོ་རེད། ལོ་ངོ་བདུན་ཙམ་ཕྱིན་པའི་གནས་ཚུལ་ཞིག་ཞུ་རྒྱུ་ཡོད། བོད་རང་སྐྱོང་ལྗོངས་ཀྱི་དབང་འཛིན་པ་བོད་རིགས་དྲུག་ཡོད་པ་ཁོང་རྣམས་ལ་ཉམས་ཞིབ་ཡག་པོ་ཞིག་གནང་ཚེ་གཅིག་བྱས་ན་ཁོང་རྣམས་ཀྱི་ཕ་མ་གཅིག་རྒྱ་རིགས་ཡིན་པའམ། ཡང་ན་རྒྱ་རིགས་དང་གཉེན་སྒྲིག་བྱས་པ་དེ་འདྲའི་གནས་ཚུལ་ཡང་ཐོན་རྒྱུ་འདུག དེར་བརྟེན་ཏང་གི་སྒྲིག་འཛུགས་མཐོ་ཤོས་ནང་གོ་གནས་མཐོ་ཤོས་འདི་བོད་རིགས་མིན་པ་མ་ཟད། སྒྲིག་འཛུགས་འདིའི་ནང་ནས་མང་པ་རྒྱ་རིགས་དང་ཉུང་བ་བོད་རིགས། དེ་ཡང་བོད་རིགས་དང་རྒྱ་རིགས་འདྲེས་མ་དེ་འདྲ་ཡིན་ནའང་བོད་རིགས་ཚོར་དབང་ཆ་གང་འདྲ་ཞིག་ཡོད་ཅེས་ང་ཚོས་རྒྱ་རིགས་ཚོར་པར་དང་བཅས་ནས་འགྲེལ་བརྗོད་བྱེད་སྐབས། ཁོང་ཚོས་གཞི་ནས་གནས་ཚུལ་དེ་རིགས་ང་ཚོས་ཤེས་ཀྱི་མེད། ཅེས་ངོས་ལེན་བྱེད་ཀྱི་རེད།
དེ་བཞིན་རྒྱ་མི་ཚོས་བོད་རང་སྐྱོང་ལྗོངས་ཀྱི་ས་གནས་གྲོས་ཚོགས་ཟེར་ནའང་འདྲ་ས་གནས་འཐུས་ཚོགས་ནང་ལ་མཚོན་ནའང་འགན་འཛིན་དང་ཚོགས་གཙོ་(Governor & Chairman) བོད་རིགས་ཡིན་ཤག་བརྗོད་ཀྱི་རེད། དེ་འདྲ་བརྗོད་རྒྱུར་ཁོང་ཚོ་དགའ་པོ་ཡོད། འོན་ཀྱང་དོན་དངོས་ཐོག་དེའི་ནང་བོད་རིགས་ས་འཐུས་དྲུག་དང་རྒྱ་རིགས་བདུན་ཆགས་ཡོད། གང་ཡིན་བརྗོད་ན་གནས་ཚུལ་དེ་རིགས་རྒྱ་རིགས་ཚོར་ཁུངས་སྐྱེལ་ར་སྤྲོད་བྱ་རྒྱུར་ཕན་ཐོགས་ཧ་ཅང་ཡོད། རྒྱ་ནག་གཞུང་གིས་དུས་རྟག་ཏུ་གང་ཤོད་ཀྱི་ཡོད་ཅེས་ནས་བོད་སྤྱི་ཡོངས་ནང་བརྒྱ་ཆ་དགུ་བཅུ་གོ་གཉིས་བོད་རིགས་ཡིན་པ་དང་བརྒྱ་ཆ་བརྒྱད་རྒྱ་རིགས་ཡིན་པ་ཤོད་ཀྱི་རེད། དེ་འདྲ་ཡིན་ན་ཏང་གི་སྒྲིག་འཛུགས་མཐོ་ཤོས་ནང་རྒྱ་རིགས་བརྒྱ་ཆ་བརྒྱད་ཀྱིས་བོད་རིགས་བརྒྱ་ཆ་དྲུག་བཅུ་རེ་ལྔ་ཧ་ལམ་བདུན་བཅུ་མ་ཟིན་ཙམ་ལ་དབང་བསྒྱུར་བྱེད་བཞིན་ཡོད་ན་རང་སྐྱོང་ལྗོངས་ནང་བོད་མི་ཚོར་དབང་ཆ་ག་པར་ཡོད། མི་འབོར་གཞིར་བཟུང་ནས་ལྟ་དགོས་པ་ཞིག་ཆགས་ཡོད། དེར་བརྟེན་ཐེངས་འདིར་བོད་ཀྱི་སྲིད་བྱུས་ཉམས་ཞིབ་ཁང་གིས་གསར་བསྐྲུན་གནང་བའི་དཔེ་དེབ་ཡིག་ཆ་འདིས་ཕན་ཐོགས་ཏན་ཏན་ཡོང་རྒྱུ་རེད། འདི་གའི་ཉམས་ཞིབ་པ་ཚོས་ཉམས་ཞིབ་གནང་ཡུལ་གཙོ་བོ་རྒྱ་ནག་རང་ནས་ཐོན་པའི་རྒྱ་མིའི་གསར་ཤོག་སོགས་ནས་ཡིན་སྟབས། རྒྱ་རིགས་དང་ལྷན་བགྲོ་གླེང་གནང་སྐབས་ཁུངས་སྐྱེལ་ར་སྤྲོད་བྱ་རྒྱུར་ཕན་ཐོགས་ཏན་ཏན་ཡོང་རྒྱུ་རེད།
ཕྱོགས་མཚུངས་གསར་འགོད་པ་ཚོར་མཚོན་ནའང་དཔེ་དེབ་འདིས་ཕན་ཐོགས་ཡོང་ངེས་ཡིན། བཙན་བྱོལ་ནང་གི་གསར་འགོད་པ་ཚོས་དཔེ་དེབ་འདི་ཡག་པོ་ཀླགས་ནས་གནས་ཚུལ་དྲིལབསྒྲགས་གནང་ཚེ་རྒྱ་རིགས་ཤིག་གིས་མཐོང་སྐབས་ཕྱི་སྡོད་བོད་མི་གསར་འགོད་པ་ཚོས་བོད་དང་རྒྱ་ནག་ནང་གི་གནས་ཚུལ་ཤེས་རྟོགས་འདུག་བསམ་པ་དྲན་གྱི་རེད། དེར་བརྟེན་གནས་ཚུལ་གང་བཏོན་པ་རྣམས་ལ་ཆ་འཇོག་དང་གདེང་འཇོག་རག་རྒྱུར་ཕན་ཐོགས་ཡོད། དེར་བརྟེན་དེ་རིང་བོད་ཀྱི་སྲིད་བྱུས་ཉམས་ཞིབ་ཁང་གི་དཔེ་དེབ་འདི་འདྲ་ཞིག་བཏོན་ཡོད། ཁ་སྔོན་སྲིད་བྱུས་ཉམས་ཞིབ་ཁང་གི་བཏོན་པའི་དཔེ་དེབ་དེ་ནི་རྒྱ་ནག་རྒྱལ་ཡོངས་ཀྱི་འགོ་ཁྲིད་ནང་བོད་རིགས་ག་ཚོད་ཡོད་མེད་སྐོར་ཡིན་པ་དང་། ཐེངས་འདིར་བོད་ཀྱི་ས་ཆ་སྤྱི་ཡོངས་ནང་གི་གནས་སྟངས་སྐོར་ཞིག་ཆགས་ཡོད། དེར་བརྟེན་ངོས་ཀྱིས་གོང་བརྗོད་ལྟར་སླར་ཡང་བོད་ཀྱི་སྲིད་བྱུས་ཉམས་ཞིབ་ཁང་གི་འབྲེལ་ཡོད་ལས་བྱེད་ཚང་མར་ཐུགས་རྗེ་ཆེ་ཞུ་རྒྱུ་ཡིན། ཞེས་གསུངས་བཤད་གནང་ཡོད།།
