༢༠༠༩ ཕྱི་ཟླ་ ༩ ཚེས་ ༡༦ རེས་གཟའ་ལྷག་པ།

༄༅། །ཕྱི་ལོ་ ༢༠༠༠༩ ཟླ་ ༩ ཚེས་ ༡༥ ཉིན་གྱི་སྔ་དྲོའི་ཆུ་ཚོད་ ༩།༣༠ ཐོག་ཀོ་རི་ཡའི་དད་ལྡན་ཆོས་ཞུ་བ་གཙོ་བོ་མཁན་པོ་ཇེན་ཨོ་ཀ་ Jin Ok མཆོག་གིས་གཙོས་གདན་ཞུ་བ་རྣམས་ཀྱི་ཕོ་བྲང་གི་གཟིམ་ཆུང་ནས་དྲི་བཟང་སྤོས་སྣེས་སྔོན་བསུས་ཏེ་ཐེག་ཆེན་ཆོས་གླིང་གཙུག་ལག་ཁང་དུ་གདན་ཞུ་དང་སྦྲགས་བཞུགས་ཁྲི་རིན་པོ་ཆེར་༸ཞབས་སོར་འཁོད་རྗེས་༸གོང་ས་མཆོག་ནས་སྔོན་འགྲོའི་ཆོས་འབྲེལ་སྐབས་བཀའ་སློབ་ཕེབས་དོན། ཀོ་རི་ཡའི་ཆོས་གྲོགས་ཚོ་དེ་རིང་ང་ཚོ་ཡང་བསྐྱར་ཐུག་པར་འཚམས་འདྲི་ཡོད། ང་ཚོ་ཚང་མ་བཅོམ་ལྡན་འདས་ཀྱི་རྗེས་འབྲང་དགེ་ཕྲུག་གཅིག་པ་ཆགས་ཡོད། ལྷག་པར་དུ་དཔལ་ན་ལེཎྡྲའི་ཆོས་བརྒྱུད་འཛིན་མཁན་གཅིག་པ་ཆགས་ཡོད།

ཁྱེད་རང་ཚོ་ཀོ་རི་ཡར་ནང་ཆོས་འདི་རྒྱ་ནག་བརྒྱུད་ནས་ཕལ་ཆེར་དར་བ་རེད། རྒྱ་ནག་གི་ནང་ཆོས་བྱེད་མཁན་ཚོ་བཅོམ་ལྡན་འདས་ཀྱི་དགེ་ཕྲུག་རྒན་པ་ལྟ་བུ་རེད། ང་ཚོ་བོད་པ་དགེ་ཕྲུག་གཞོན་པ་ཆགས་ཡོད། དེར་བརྟེན་ནམ་རྒྱུན་འཆར་ཅན་ངོས་ནས་དགེ་ཕྲུག་རྒན་པ་ཚོར་གུས་འདུད་བྱེད་ཀྱི་ཡོད། ཁྱེད་རང་ཚོར་གུས་འདུད་ཡོད། ཅེས་བཀའ་སྩལ་རྗེས་ཀོ་རི་ཡའི་སྐད་ཀྱི་ཐོག་ནས་ཤེས་རབ་སྙིང་པོ་གསུངས། དེ་རྗེས་༸གོང་ས་མཆོག་ནས་ཁོང་ཚོར་བཀའ་ཕེབས་དོན། ད་རེས་འདིར་ཁྱེད་ཚོའི་ནང་དེ་སྔ་ཡོང་མ་མྱོང་བ་མང་པོ་འདུག་ཡག་པོ་རེད། ཤེས་རབ་སྙིང་པོ་འདི་བཅོམ་ལྡན་འདས་ཀྱིས་བྱ་རྒོད་ཕུང་པོའི་རི་ལ་ཤེར་ཕྱིན་མདོ་སྡེ་གསུངས་ཡོད། ཤེར་ཕྱིན་གྱི་མདོ་སྡེ་འདི་ཐེག་ཆེན་གྱི་མདོ་སྡེ་ཆགས་ཡོད། དེར་བརྟེན་ཤེས་རབ་སྙིང་པོ་འདོན་མཁན་དེ་དག་ཐེག་ཆེན་གྱི་ཆོས་བརྒྱུད་ཆགས་ཡོད། ཤེར་ཕྱིན་གྱི་གཞུང་ནང་ཆོས་ཐམས་ཅད་ངོ་བོ་ཉིད་ཀྱི་གྲུབ་པའི་སྟོང་པ་ཡིན་ཞེས་སོགས་ཀྱི་སྐོར་དང་གཞི་ལམ་གཉིས་ཀྱི་རྣམ་གཞག་བཅས་བཀའ་སྩལ་ཡོད།

དེ་བཞིན་ཆོས་ཉན་བཤད་བྱེད་པ་ལ། འཆད་པ་པོ་དང་ཉན་པ་པོ་གཉིས་ཀའི་ངོས་ནས་སེམས་རྣམ་དག་དགོས་པ་སོགས་སྔོན་འགྲོའི་གསུང་ཆོས་བཀའ་དྲིན་ཆེ་བའི་ཆོས་འབྲེལ་སྔ་དྲོ་ཐུན་གཅིག་དང་ཕྱི་དྲོ་ཐུན་གཅིག་བཀའ་དྲིན་སྩལ་ཡོད། ད་ཐེངས་ཀྱི་གསུང་ཆོས་དེ་དཔལ་མགོན་ཀླུ་སྒྲུབ་ཀྱིས་མཛད་པའི་བྱང་ཆུབ་སེམས་འགྲེལ་ཡིན་པ་དང་། དད་ལྡན་ཀོ་རི་ཡའི་ཆོས་ཞུ་བ་གྲངས་ ༢༠༠ ལྷག་དབུས་ཕྱི་རྒྱལ་ཡུལ་གྲུ་ཁག ༥༥ ནས་མི་གྲངས་གང་ཙམ་དང་རང་རིགས་བོད་མི་བཅས་ཁྱོན་མི་གྲངས་ ༥༠༠༠ བརྒལ་བ་བཅར་ཡོད་པའི་གནས་བསྡུས་སུ།