༢༠༡༤ ཟླ་ ༤ ཚེས་ ༡༠ རེས་གཟའ་ཕུར་བུ།
༄༅། །ཕྱི་ལོ་ ༢༠༡༤ ཟླ་ ༤ ཚེས་ ༡༠ ཉིན་གྱི་ཕྱེད་ཡོལ་ཆུ་ཚོད་ ༣ ནས་ ༦ བར་བཀའ་ཤག་གི་ཚོགས་ཁང་དུ་ད་ལྟ་བཞུགས་སྒར་དུ་ཕེབས་ཡོད་པའི་སུད་སི་ནས་ཡིན་པ་འཛིན་སྐྱོང་རིག་པའི་མཁས་དབང་སྐུ་ཞབས་ཀོ་ལོ་སི་གྷེ་ལར་(Klaus Galler) ལགས་དང་ལྕམ་སྐུ་གྷེབ་རེ་ལི་ཧ་རར་(Gabriele Harrer)ལགས་རྣམ་གཉིས་ཀྱིས་བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་དྲུང་གཞོན་དང་དྲུང་གཞོན་ལས་རོགས་རྣམས་ལ་འཛིན་སྐྱོང་རིག་པའི་ཐོག་དམིགས་བསལ་ཟབ་ཁྲིད་གསུང་བཤད་དང་བགྲོ་གླེང་གནང་ཡོད། དེ་ཡང་སྐབས་དེར་ཐོག་མར་སྲིད་སྐྱོང་མཆོག་གིས་ངོ་སྤྲོད་ཀྱི་གསུང་བཤད་གནང་དོན། དེ་རིང་འདིར་སུད་སི་ནས་ཕེབས་པའི་འཛིན་སྐྱོང་རིག་པའི་ཐོག་མཁས་དབང་སྐུ་ཞབས་ཀོ་ལོ་སི་གྷེ་ལར་ལགས་འདིར་ཕེབས་པ་དང་བསྟུན། སྲི་ཞུའི་ལས་བྱེད་རྣམས་ལ་འཛིན་སྐྱོང་རིག་པའི་ཐོག་གསུང་བཤད་གནང་རྒྱུ་རེད། ད་རིང་སྔ་དྲོ་ཁོང་དང་ལྷན་ང་ཚོ་བཀའ་བློན་རྣམ་པ་བགྲོ་གླེང་བྱུང་། སྐབས་དེར་ཁོང་གི་ཉམས་མྱོང་དང་མཁས་པའི་རྣམ་དཔྱོད་ལ་གཞིགས་སྐབས་ཁོང་དང་བགྲོ་གླེང་བྱུང་བ་དེས་ཕན་ཐོགས་ཡོད་པ་ར་སྤྲོད་གསལ་པོ་བྱུང་། གཞི་རྩའི་ཁོང་འདིར་ཕེབས་དགོས་པའི་རྒྱུ་མཚན་གཙོ་བོ་ནི་ཁོང་དང་ལྷན་སློབ་སྟོན་པ་མི་སྣ་དྲུག་གིས་ཟླ་ ༤ ཚེས་ ༧ ནས་ཚེས་ ༡༡ བར་བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་ཟུང་དྲུང་དང་དྲུང་འཕར། དྲུང་ཆེ་རྣམས་ལ་ཟབ་ཁྲིད་གནང་ཆེད་ཡིན། དེར་བརྟེན་གོ་སྐབས་དང་བསྟུན་ནས་དེ་རིང་བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་དྲུང་གཞོན་དང་དྲུང་གཞོན་ལས་རོགས་རྣམས་ལ་ཆུ་ཚོད་གཉིས་རིང་འཛིན་སྐྱོང་རིག་པའི་ཐོག་གསུང་བཤད་གནང་གི་རེད། ཅེས་ངོ་སྤྲོད་གྲུབ་མཚམས་སྐུ་ཞབས་ཀོ་ལོ་སི་གྷེ་ལར་ལགས་ཀྱིས་སློབ་ཁྲིད་དབུ་འཛུགས་གནང་ཡོད། ཆུ་ཚོད་ ༥ ནས་ལྕམ་སྐུ་གྷེབ་རེ་ལི་ཧ་རར་ལགས་ཀྱིས་མུ་མཐུད་ཟབ་ཁྲིད་གནང་ཡོད།
