༢༠༡༤ ཟླ་ ༤ ཚེས་ ༤ རེས་གཟའ་པ་སངས།
༄༅། །ངག་དབང་ཐར་པ་ལགས་ཀྱིས་གནས་ཚུལ་བརྒྱུད་བསྒྲགས་བྱས་པ་ལྟར་ན། ཕྱི་ལོ་ ༢༠༡༤ ཟླ་ ༣ ཚེས་ ༢༨ ཉིན་ནག་ཆུ་སོག་རྫོང་ཁྲི་རྡོ་ཡུལ་ཚོའི་གྲོང་ཚོ་བཞི་པའི་དཔལ་ལྷ་ཚང་གི་བུ་རིན་ཆེན་དབང་འདུས་དང་། ག་འཇིགས་ཚང་གི་བུ་ཕུར་ཚེ་གཉིས་ཁ་པར་བརྒྱུད་བོད་དོན་དང་འབྲེལ་བའི་གནས་ཚུལ་གཏོང་རེས་བྱས་པའི་ཉེས་མིང་འོག་རྒྱ་ནག་གཞུང་གིས་འཛིན་བཟུང་བཙོན་འཇུག་བྱས་ཡོད་པ་མ་ཟད། ཉིན་དེར་ལྕགས་ཟམ་ཁར་བོད་རང་བཙན་གྱི་ཡི་གེ་འབྲི་མཁན་ཡིན་པའི་དྭོགས་གཞིའི་འོག དྲིལ་མདའ་དགོན་པའི་གྲྭ་ཨ་འདེ་ཞུ་བ་ཞིག་ཀྱང་འཛིན་བཟུང་བྱས་འདུག ད་ལྟའི་ཆར་ཁོང་རྣམས་གང་དུ་ཡོད་མེད་དང་། གནས་ཚུལ་གང་བྱུང་ཡོད་མེད་ཤེས་རྟོགས་མ་ཐུབ་པར་ལུས་ཡོད།
གནས་ཚུལ་མཁོ་སྤྲོད་པས་བརྗོད་དོན་ལྟར་ན། རྒྱ་ནག་གཞུང་གིས་ད་ལྟའི་ཆར་ཡང་སོག་རྫོང་གི་སྐྱ་སེར་གཉིས་ལ་དམ་བསྒྲགས་དང་གང་བྱུང་འཛིན་བཟུང་བྱེད་བཞིན་པ་མ་ཟད། ཕྱི་ཟླ་ ༣ ཚེས་ ༡༩ ཉིན་སོག་རྫོང་དྲིལ་མདའ་དགོན་པའི་གྲྭ་ཚངས་དབྱངས་རྒྱ་མཚོ་དང་ཚེ་དབང་། ཨ་ཚེ། རྒྱལ་མཚན་བཅས་གློད་བཀྲོལ་ཆེད་ཡུལ་མི་ཚོའི་སྲིད་གཞུང་ལ་རེ་འདུན་ཞུ་རུ་ཕྱིན་པའི་བོད་མི་ཁག་གཅིག་འཛིན་བཟུང་བྱས་ཡོད་འདུག ཕྱི་ཚེས་ ༢༠ ཉིན་ཡུལ་མི་ཚོའི་རྒན་རྒོན་དང་བུད་མེད་ཚང་མས་སྲིད་གཞུང་གི་མདུན་དུ་ངུ་འབོད་བྱེད་བཞིན་ཁོང་ཚོ་གློད་བཀྲོལ་གཏོང་དགོས་པའི་རེ་འདུན་ཞུས་མཐར་གྲྭ་པ་རྣམས་གློད་བཀྲོལ་བཏང་ཡོད་ཀྱང་། ས་གནས་ལས་བྱེད་དང་ཉེན་རྟོག་པས་འདྲི་རྩད་གཅར་རྡུང་བཏང་ཡོད་པར་བརྟེན་ཡུལ་མི་ཚོས་རེ་རེ་བཞིན་བསྐྱོར་ནས་རང་ཁྱིམ་སོ་སོར་བསྐྱལ་དགོས་བྱུང་ཡོད་འདུག
ད་ཆར་རྒྱ་གཞུང་གིས་ཁྲི་རྡོ་ཡུལ་ཚོའི་གྲོང་ཚོ་ ༡༠ ནང་ཞིབ་བཤེར་ས་ཚིགས་ ༡ ནས་ ༣ བར་བཙུགས་ཏེ་མི་མང་ལ་ཞིབ་བཤེར་དང་འདྲི་གཅོད་བྱེད་བཞིན་པར་མ་ཟད། ཁྲི་རྡོ་ཡུལ་ཚོ་ནས་དྲིལ་མདའ་དགོན་པའི་བར་ཞིབ་བཤེར་ས་ཚིགས་ ༣ བཙུགས་ནས་ཞིབ་བཤེར་ནན་མོ་བྱེད་བཞིན་ཡོད་འདུག
