༢༠༠༩ ཕྱི་ཟླ་ ༩ ཚེས་ ༡༡ རེས་གཟའ་པ་སངས།
༄༅། །ཕྱི་ལོ་༢༠༠༩ ཟླ་ ༩ ཚེས་ ༨ ཉིན་རྒྱ་གར་གྱི་རྒྱལ་ས་ལྡི་ལི་ལྷོ་ཕྱོགས་ཁུལ་དུ་ཡོད་པའི་ཀམ་ལཱ་ནེ་རུ་བུད་མེད་ཀྱི་མཐོ་སློབ་ནས་གདན་ཞུའི་གསོལ་འདེབས་ཞུས་པ་ལྟར་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་ནས་བཀའ་བཞེས་བཟང་པོ་སྨིན་སྩལ་དང་སྦྲགས་མཐོ་སློབ་དེར་ཆིབས་སྒྱུར་བསྐྱངས་ཡོད།
༸གོང་ས་མཆོག་གིས་མཐོ་སློབ་དེའི་དགེ་ལས་སློབ་ཕྲུག་མི་གྲངས་ ༡༠༠༠ བརྒལ་བར། འཚེ་བའི་དུས་སྐབས་ཀྱི་ནང་འཚེ་བ་མེད་པའི་ནུས་ཤུགས་ཞེས་པའི་བརྗོད་གཞིའི་ཐོག་ལམ་སྟོན་བཀའ་སློབ་ཟབ་མོ་ཕེབས་ཡོད་པའི་ནང་། སྐྱེ་དངོས་ཀྱི་ཚན་རིག་ནས་འགྲེལ་བརྗོད་བྱེད་བཞིན་པའི་རྒྱུ་མཚན་ལུང་འདྲེན་དང་སྦྲགས་སྤྱིར་བཏང་བུད་མེད་ཚོའི་སྤྱོད་པ་དེ་སྐྱེས་པ་ལས་ཞི་བདེ་ལྷིང་འཇགས་མང་བ་ཞིག་ཏུ་ངོས་འཛིན་ཡོད་པ་ལྟར་དེང་དུས་ཤེས་ཡོན་དེ་གཞི་རྩ་དེའི་ཐོག་ཏུ་ལག་ཆ་ལྟ་བུར་བེད་སྤྱོད་བྱས་ཏེ་སྤྱི་ཚོགས་ནང་ཞི་བདེ་འཕེལ་རྒྱས་གཏོང་དགོས་སྐོར་བཀའ་སྩལ་བ་དང་སྦྲགས། དཀའ་ངལ་གྱི་གཞི་རྩ་ཚང་མ་ང་དང་ཁྱོད་བསམ་པའི་འདུ་ཤེས་ཀྱི་ཐོག་ནས་ཡོང་གི་ཡོད་བཀའ་སྩལ་ཡོད། དེ་བཞིན་༸གོང་ས་མཆོག་ནས་ངོས་རང་དམིགས་བསལ་བ་ཞིག་གང་ཡང་མིན། བསམ་བློ་དང་འདུ་ཤེས། གཟུགས་པོའི་ཁམས་གང་གི་ཆ་ནས་ཀྱང་ང་ཚོ་ཚང་མ་འཛམ་གླིང་འདིའི་ནང་མི་འབོར་ས་ཡ་དྲུག་སྟོང་ལྷག་ཡོད་པའི་འགྲོ་བ་མིའི་ཆ་ཤས་ཡིན་པ་གཅིག་མཚུངས་ཆགས་ཡོད། དེ་འདྲ་ཡིན་དུས་གཞི་རྩ་དང་པོ་དེ་ང་ཚོ་ཚང་མ་གཅིག་པ་ཆགས་ཡོད། དེ་ནས་ང་བོད་མི་ཞིག་ཡིན་པ་དང་ནང་པའི་དགེ་འདུན་པ་ཞིག་ཡིན་བསམ་པ་དེ་གཞི་རིམ་གཉིས་པ་དེ་རེད། ང་ཚོ་རྒྱུན་དུ་བསམ་བློ་གཏོང་སྐབས་སོ་སོ་མི་ཞིག་ཡིན་པའི་གཞི་རིམ་དང་པོ་དེར་བསམ་བློ་བཏང་སྟེ་ལས་ཀ་བྱེད་རྒྱུ་ལས། ངའི་ལུང་པ་དང་། ངའི་ཆོས་ལུགས། ངའི་ཐོབ་ཐང་སོགས་གཞི་རྩ་གཉིས་པ་དེར་བསམ་བློ་བཏང་སྟེ་ལས་ཀ་བྱས་བསྡད་པ་ཡིན་ན་དཀའ་ངལ་ཚང་མའི་གཞི་རྩ་དེ་དེ་ལ་ཐུག་ཡོད་པ་རེད། ང་ཚོས་གཞི་རྩ་གཉིས་པ་དེར་བསམ་བློ་ཤུགས་ཆེན་བཏང་དྲག་པའི་རྐྱེན་གྱིས་སྤྱི་ཚོགས་ནང་དཀའ་ངལ་འཕྲད་ཀྱི་ཡོད་པ་དང་དཀའ་ངལ་དེ་ཚོ་ཚང་མ་ང་ཚོ་རང་ཉིད་ཀྱིས་བཟོས་པ་ཤ་སྟག་ཆགས་ཡོད།
ད་ཆ་ང་ཚོ་ཚང་མ་འགྲོ་བ་མི་གཅིག་པ་ཡིན་པའི་འདུ་ཤེས་འཛིན་རྒྱུའི་དུས་ལ་སླེབས་ཡོད། ང་དང་ཁྱོད་ཟེར་རྒྱུ་དེ་ཕར་བཞག་ནས་ང་ཚོ་ཚང་མ་མི་གཅིག་པ་ཡིན་པའི་གཞི་རྩ་དང་པོ་དེར་བསམ་བློ་བཏང་ནས་ལས་ཀ་བྱེད་རྒྱུ་ཧ་ཅང་གི་གལ་ཆེན་པོ་རེད། ཅེས་བཀའ་སྩལ་བ་དང་། དེ་བཞིན་༸གོང་ས་མཆོག་ནས་བྱམས་སྙིང་རྗེ་ཞེས་པ་སྤྱི་ཚོགས་ཙམ་མིན་པར་སོ་སོ་རང་ཉིད་ཀྱི་མི་ཚེའི་ནང་དུའང་ཕན་ཐོགས་ཆེན་པོ་ཡོད་པ་དང་ལྷག་པར་དུ་ལོ་ངོ་སྟོང་ཕྲག་ལོ་རྒྱུས་ལྡན་པའི་རྒྱ་གར་འཕགས་པའི་ཡུལ་གྱི་མི་མང་ཚོར་སྤྱི་ཚོགས་ནང་ཞི་བདེ་ཁྱབ་སྤེལ་བྱེད་རྒྱུའི་དམིགས་བསལ་གྱི་ལས་འགན་ཞིག་ཡོད། དེ་ཡང་རྒྱ་གར་གཞོན་སྐྱེས་ཚོས་ངོས་ནས་དཀའ་ངལ་ལ་གདོང་ལེན་བྱས་ཏེ་མདུན་བསྐྱོད་བྱེད་རྒྱུ་ཧ་ཅང་གལ་ཆེན་པོ་ཆགས་ཡོད། ངོས་རང་དུས་རབས་ཉི་ཤུའི་མི་ཞིག་ཆགས་བསྡད་ཡོད། ཕལ་ཆེར་སློབ་སྤྱི་མཆོག་ཀྱང་དུས་རབས་དེའི་མི་ཡིན་གྱི་རེད། དུས་རབས་ཉི་ཤུ་པ་དེ་ཕྱིན་ཚར་བ་རེད། ང་ཚོས་ད་ཆ་ག་ལེར་བཞུགས་ཟེར་རྒྱུའི་དུས་ཚོད་ལ་སླེབས་ཡོད།
དེ་འདྲ་ཡིན་དུས་ཁྱེད་རང་ཚོ་སློབ་ཕྲུག་ན་གཞོན་ཚོ་དུས་རབས་ཉེར་གཅིག་པའི་བཟོ་ལྟ་གསར་པ་བཟོ་མཁན་དེ་རེད། མ་འོངས་པར་མིའི་སྤྱི་ཚོགས་འདིའི་ནང་དཀའ་ངལ་མི་ཡོང་བའི་ཡིད་ཆེས་དང་གདེང་སྤོབས་གང་ཡང་མེད་པ་ཡིན་དུས་དཀའ་ངལ་ལ་གདོང་ལེན་བྱ་རྒྱུའི་གོ་སྐབས་དེ་དང་དུ་བླང་ནས་ནུས་པ་འདོན་རྒྱུ་དེ་གལ་ཆེན་པོ་རེད། དེ་འདྲ་སོང་ཙང་སློབ་ཕྲུག་ན་གཞོན་ཚོས་དཀའ་ངལ་དེ་དག་ལ་བསམ་བློ་བཏང་སྟེ་ཤེས་ཡོན་དང་། རྣམ་དཔྱོད། ཡིད་ཆེས་ཀྱི་ཐོག་ནས་གདོང་ལེན་བྱེད་ཐུབ་པའི་གྲ་སྒྲིག་དང་། ལྷག་པར་དུ་བྱམས་བརྩེ་ཟེར་རྒྱུ་དེ་ཧ་ཅང་གི་གལ་ཆེན་པོ་ཆགས་ཡོད། གལ་སྲིད་བྱམས་རྩེ་ཡོད་པ་ཡིན་ན་རང་ཉིད་ཀྱི་ཡིད་ཆེས་དང་སྤོབས་པ་ལྡན་པའི་ཐོག་ནས་འཇིགས་སྣང་མེད་པར་དྲང་བདེན་གྱི་ལས་ཀ་བྱེད་ཐུབ་ཀྱི་རེད། གལ་ལྟེ་བདག་འཛིན་དང་ཁོང་ཁྲོ་བཅས་ཀྱི་ཐོག་ནས་ལས་ཀ་བྱས་པ་ཡིན་ན་དྲང་བདེན་མི་ཡོང་བ་དང་། དེའི་ཐོག་ནས་འཇིགས་སྣང་དང་དེ་ནས་ཕན་ཚུན་ཡིད་ཆེས་མེད་པ་བཅས་ཀྱིས་དྲང་བདེན་ཐོག་ནས་ལས་ཀ་བྱེད་ཐུབ་ཀྱི་མ་རེད། དེ་འདྲ་ཡིན་དུས་ཁྱེད་རང་ཚོའི་སྔོན་མའི་རྒྱ་གར་རང་བཙན་འཐབ་རྩོད་པ་མེས་པོ་དམ་པ་གྷན་ལྷི་ལྟ་བུའི་བྱས་རྗེས་ལ་གཟིགས་ནས་ཁྱེད་ཚོ་བུད་མེད་ཀྱི་སློབ་ཕྲུག་ཚོར་དམིགས་བསལ་གྱི་ལས་འགན་ཞིག་ཡོད་ཅེས་སོགས་ཀྱི་བཀའ་སྩལ་ཡོད།
༸གོང་ས་མཆོག་གི་བཀའ་སློབ་ལམ་སྟོན་ཁག་གྲུབ་མཚམས་སློབ་ཕྲུག་རྣམས་ནས་འཚེ་མེད་ཞི་བ་དང་། བྱམས་སྙིང་རྗེ་སོགས་ཀྱི་བརྗོད་གཞི་དང་འབྲེལ་བའི་དྲི་བ་ཁག་གཅིག་ལ་མགོན་པོ་གང་ཉིད་ནས་ཐུགས་དགྱེས་ཚོར་ཆེན་པོས་བཀའ་ལན་སྩལ་ཡོད། སློབ་གྲྭ་དེའི་སློབ་སྤྱི་དང་སློབ་ཕྲུག་ཡོངས་ནས་༸གོང་ས་མཆོག་ལ་གསོལ་འདེབས་ཞུས་པ་ལྟར་མཐོ་སློབ་དེར་ཆིབས་སྒྱུར་གྱིས་ཞལ་བཞེས་དབུགས་དབྱུང་སྩལ་ཏེ་ལམ་སྟོན་བཀའ་སློབ་གནང་བར་སྙིང་ཐག་པ་ནས་ཐུགས་རྗེ་ཆེ་སོགས་ཞུས་ཡོད་པ་རེད།
