༢༠༠༩ ཕྱི་ཟླ་ ༩ ཚེས་ ༡༠ རེས་གཟའ་ཕུར་བུ།

༄༅། །འདི་ལོའི་མང་གཙོའི་དུས་ཆེན་མཛད་སྒོའི་ཉིན་མོ་དང་སྟབས་བསྟུན་བོད་གཞུང་ཤེས་རིག་ལས་ཁུངས་ནས་བོད་གཞུང་དགའ་ལྡན་ཕོ་བྲང་དབུ་བརྙེས་ནས་མི་ལོ་ ༣༦༠ འཁོར་བའི་དུས་ཆེན་སྲུང་བརྩི་ནས་སྲོལ་གཏོད་ཀྱིས་རྒྱ་གར་རྒྱལ་ཡོངས་འཛིན་རིམ་ ༡༢ པའི་ཡིག་རྒྱུགས་ཆེན་མོའི་ནང་། ཚན་རིག་དང་། སྒྱུ་རྩལ་། ཚོང་རིག་བཅས་སློབ་ཚན་སྡེ་ཚན་ཁག་སོ་སོ་ནས་ཤེས་ཡོན་རྩེ་ཕུད་སོན་པའི་སློབ་ཕྲུག་རེར་ལོ་ལྟར་བྱ་དགའ་གནང་གི་ཡོད་པ་བཞིན་འདི་ལོའི་བྱ་དགའ་ཐེངས་བརྒྱད་པ་དེའི་ལེགས་སྐྱེས་སུ་ཕྱག་འཁྱེར་དང་། ཧིན་སྒོར་ ༥༠༠༠ དཔེ་དེབ་ཁག་གཅིག་བཅས་དཔལ་ལྡན་བཀའ་བློན་ཁྲི་པ་མཆོག་ནས་གསོལ་སྕལ་གནང་བའི་སློབ་ཚན་སྡེ་ཚན་སོ་སོའི་སློབ་མ་རྣམས་ནི།

༡༽ཚན་རིག་སྡེ་ཚན་ཁོངས་ནས། རྡ་སྟེང་བོད་ཁྱིམ་གྱི་སློབ་མ། རྡོ་རྗེ་རྒྱལ་མཚན་ལགས། བརྒྱ་ཆ་ ༨༨ ད་ལྟ་ཇ་པལ་པུར་ཨི་ཇི་ནེ་རིང་མཐོ་སློབ་ཁང་དུ་ (Jabalpur Engineering College,Bhopal) སློབ་སྦྱོང་གནང་མུས་དང་།

༢༽སྒྱུ་རྩལ་སྡེ་ཚན་ཁོངས་ནས། ཀ་སྦུག་གཏན་སློབ་ཀྱི་སློབ་མ།  སངས་རྒྱས་ཆོས་སྒྲོན་ལགས། བརྒྱ་ཆ་ ༨༧།༢ ད་ལྟ་ལྡི་ལི་མི་རན་ཌ་མཐོ་སློབ་ཁང་དུ (Miranda House, University of Delhi) སློབ་སྦྱོང་གནང་བཞིན་གནང་མུས་དང་།

༣༽ཚོང་རིག་སྡེ་ཚན་ཁོངས་ནས། སྦེལ་ཀོབ་བོད་ཁྱིམ་གྱི་སློབ་མ། སྐལ་བཟང་བདེ་སྐྱིད་ལགས། བརྒྱ་ཆ་ ༩༢།༨ ད་ལྟ་ཅི་ནེ་ཨེཐི་རཇ་བུད་མེད་མཐོ་སློབ་ཁང་དུ་ (Ethiraj College for Women,Chennai) སློབ་སྦྱོང་གནང་བཞིན་པ་ཡོད་པ་བཅས་ལ་འདི་ལོའི་དགའ་ལྡན་ཕོ་བྲང་སློབ་ཕྲུག་གཟེངས་བསྟོད་ཐོབ་ཡོད་པ་རེད།