༢༠༠༩ ཕྱི་ཟླ་ ༩ ཚེས་ ༡༠ རེས་གཟའ་ཕུར་བུ།

༄༅། །ཕྱི་ལོ་ ༢༠༠༩ ཟླ་ ༩ ཚེས་ ༩ ཉིན་ Associated Press ནས་སྤེལ་བའི་གནས་ཚུལ་ལྟར་ན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རེས་གཟའ་མིག་དམར་ཉིན་སུ་ལོ་ཝ་ཀི་ཡི་ནང་༸ཞབས་སོར་འཁོད་ཡོད་པ་དང་། རེས་གཟའ་ལྷག་པའི་ཉིན་རྒྱལ་ས་སྦར་ཏི་སི་ལ་ཝའི་ནང་གྲོང་ཁྱེར་སྤྱི་ཁྱབ་པ་མཆོག་ནས་ཕེབས་བསུ་གཟབ་རྒྱས་ཞུས་ཡོད། ད་རེས་༸གོང་ས་མཆོག་ལ་རྒྱལ་སྤྱིའི་འགྲོ་བ་མིའི་གཟེངས་རྟགས་འབུལ་བཞེས་གནང་བ་དེ་ནི་མགོན་པོ་གང་ཉིད་ཀྱིས་འཚེ་མེད་ཞི་བའི་ཐོག་ནས་འགྲོ་བ་མིའི་ཐོབ་ཐང་དང་བོད་ལ་མིང་དོན་མཚུངས་པའི་རང་སྲིད་རང་སྐྱོང་ཡོང་བར་འབད་བརྩོན་གནང་མཁན་གྱི་དབུ་ཁྲིད་ཅིག་ཡིན་པའི་ཆ་ནས་གཟེང་རྟགས་དེ་ཕུལ་ཡོད་པ་དང་། གཟེངས་རྟགས་ཕུུལ་གྲུབ་རྗེས་མགོན་པོ་གང་ཉིད་མཆོག་ནས་བཀའ་སྩལ་དོན། ངོས་ནས་གཟེངས་རྟགས་འདི་ནི་བོད་རྒྱའིི་དཀའ་རྙོག་ཕན་ཚུན་གཉིས་སྨན་ལམ་ནས་སེལ་རྒྱུའི་འབད་བརྩོན་བྱེད་པ་དེར་བློ་སྤོབས་གསར་པ་ཞིག་བྱིན་པར་ངོས་འཛིན་བྱེད་བཞིན་ཡོད་ཅེས་བཀའ་སྩལ།

དེ་སྔོན་གཟེངས་རྟགས་དེ་མང་གཙོ་འཕེལ་རྒྱས་ཆེད་དུ་ཕྱག་ལས་རྒྱ་ཆེ་གནང་མཁན་ཧང་གྷ་རིའི་སྲིད་འཛིན་ཟུར་པ་ཨར་པ་ཌ་མཆོག་ལ་ཕུལ་འདུག ཕྱི་ཚེས་ ༡༠ ཉིན་༸གོང་ས་མཆོག་རྒྱལ་ས་པ་རག་ནང་དུ་ཆིབས་སྒྱུར་གྱི་ཕྱི་ཚེས་ ༡༡ ཉིན་རྒྱལ་ས་དེའི་ནང་རྒྱལ་སྤྱིའི་ཚོགས་འདུ་ཞིག་གི་ནང་༸གོང་ས་མཆོག་ནས་གླིང་ཆེན་ཨེ་ཤི་ཡའི་ནང་འཚེ་མེད་ཞི་བ། མང་གཙོ་།

འགྲོ་བ་མིའི་ཐོབ་ཐང་བཅས་ཀྱི་བརྗོད་གཞིའི་ཐོག་བཀའ་སློབ་བཀའ་དྲིན་སྩལ་རྒྱུ་པ་རེད་འདུག ད་རེས་རྒྱལ་སྤྱིའི་ཚོགས་འདུ་དེའི་ནང་གསུང་བཤད་གནང་མཁན་ཁོངས་སུ་ནོ་བེེལ་གཟེངས་རྟགས་བཞེས་མཁན་གྱི་མི་སྣ་གྲགས་ཅན་དང་། རྒྱལ་སྤྱིའི་མཁས་པ། གྲོས་ཚོགས་སྐུ་ཚབ། གཞན་ཡང་མཁས་དབང་སོགས་ཡོད་འདུག དེ་ཉིན་༸གོང་ས་མཆོག་དང་ཅེག་སྲིད་འཛིན་ཟུར་པ་སྐུ་ཞབས་ V`aclav Havel ལྷན་དུ་མཇལ་འཕྲད་གནང་རྒྱུ་ཡིན་པ་དང་། ཚེས་ ༡༢ སྔ་དྲོ་༸གོང་ས་མཆོག་རྒྱ་གར་རྒྱལ་ས་ལྡི་ལི་གསར་པའི་ནང་ཆིབས་སྒྱུར་བསྐྱང་རྒྱུ་ཡིན་པའི་གནས་བསྡུས་སུ།