༢༠༠༩ ཕྱི་ཟླ་ ༩ ཚེས་ ༧ རེས་གཟའ་ཟླ་བ།
༄༅། །ཕྱི་ལོ་ ༢༠༠༩ ཟླ་ ༩ ཚེས་ ༣ ནས་དབུ་འཛུགས་ཀྱི་རྡ་སའི་ཉེ་འགྲམ་ས་ར་མཐོ་སློབ་ཏུ་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་གོ་སྒྲིག་འོག་འགྲོ་བ་མིའི་ཐོབ་ཐང་དང་མང་གཙོའི་སྐོར་གྱི་བརྗོད་གཞིའི་ཐོག་ཉིན་ལྔའི་རིང་བཙན་བྱོལ་གཞུང་གི་གནད་ཡོད་མཛད་གཙོ་རྣམས་གདན་ཞུས་ཀྱི་གྲྭ་བཙུན་ལ་ཐེངས་གསུམ་པའི་ཟབ་སྦྱོང་སྐོང་ཚོགས་གནང་བ་ལྟར་རྒྱ་གར་དང་བལ་ཡུལ་ནང་གི་དགོན་སྡེ་ཉི་ཤུ་ལྷག་ཙམ་གྱི་སྐུ་ཚབ་ལྔ་བཅུ་བརྒལ་བ་ཞིག་མཉམ་ཞུགས་གནང་ཡོད། ཚེས་ ༤ ཉིན་སྔ་དྲོ་ས་ར་སློབ་གྲྭའི་ཚོམས་ཆེན་དུ་འགྲོ་བ་མིའི་ཐོབ་ཐང་འགན་འཛིན་ནས་ཟབ་སྦྱོང་ངོ་སྤྲོད་གནང་རྗེས་རང་གཞུང་བཀའ་བློན་ཁྲི་པ་མཁས་དབང་ཟམ་གདོང་རིན་པོ་མཆོག་གིས་འཚེ་མེད་ཞི་བ་དང་། དབུ་མའི་ལམ་གྱི་སྲིད་བྱུས་ཀྱི་བརྗོད་གཞིའི་སྐོར་ལ་གསུང་བཤད་གནང་དོན། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་ཟབ་སྦྱོང་ལ་མཉམ་ཞུགས་གནང་མཁན་གྲྭ་བཙུན་ཚང་མར་བཙན་བྱོལ་བོད་གཞུང་བཀའ་ཤག་དང་ང་རངསྒེར་ངོས་ནས་དགའ་བསུ་དང་འཚམས་འདྲི་ཞུ་གི་ཡོད། དེ་རིང་ཟབ་སྦྱོང་གི་བརྗོད་གཞི་ནི་འཚེ་མེད་ཞི་བ་དང་དབུ་མའི་ལམ་གྱི་སྲིད་བྱུས་གཉིས་ཡིན་པ་རེད་། བརྗོད་གཞི་གཉིས་པོ་དེ་ང་ཚོ་བོད་པའི་སྤྱི་ཚོགས་ནང་སྐད་ཆ་རྙིང་པ་ལྟ་བུ་རེད། གོ་ཐོས་མ་མྱོང་བ་དང་ད་ལྟ་གསར་པ་ཤོད་མི་དགོས་པའི་བཟོ་འདྲ་ཆགས་ཡོད་། ཚང་མ་ནང་པ་སངས་རྒྱས་པའི་རྗེས་འཇུག་ཡིན་དུས་འཚེ་བ་མེད་པ་འདི་ཆོས་ཀྱི་སྙིང་པོ་ཡིན་པ་ང་ཚོ་ཚང་མས་ཤེས་གསལ་རེད་། ནང་པའི་བསྟན་པར་བཞུགས་ནས་དཀོན་མཆོག་གསུམ་ལ་སྐྱབས་གནས་ཡང་དག་བཟུང་ཕྱིན་ཆད་འཚེ་བ་སྤང་པའི་ཉམས་ལེན་བྱེད་དགོས་རྒྱུ་དེ་འཚེ་བ་ཙམ་མ་ཡིན་པར་གཞན་གནོད་བཞི་དང་བཅས་ལྡོག་པའི་ལམ་གྱི་ཚུལ་ཁྲིམས་གཅིག་ཉམས་ལེན་བྱེད་དགོས་རྒྱུ་དེ་ཤོད་མི་དགོས་པ་རེད། ཐར་པ་དང་ཐམས་ཅད་མཁྱེན་པའི་གོ་འཕང་སྒྲུབ་རྒྱུ་ཙམ་དུ་མ་ཟད་པའི་སྐྱེས་བུ་ཆུང་ངུ་སྐྱེ་བ་ཕྱི་མའི་མངོན་མཐོ་དང་ངེས་ལེགས་ཙམ་དོན་དུ་གཉེར་མཁན་ཞིག་ཡིན་ནའང་འཚེ་བ་མེད་པའི་ལམ་ཉམས་སུ་མ་བླང་པར་ཐབས་མེད་ཅིག་ཡིན་དུས་ནང་པའི་རྗེས་འཇུག་ཚོར་འཚེ་བ་མེད་པའི་རྣམ་གཞག་བསྐྱར་དུ་ངོ་སྤྲོད་བྱེད་མི་དགོས་པ་ལྟ་བུ་ཞིག་ཡིན། འཚེ་མེད་ཞི་བའི་སྐད་ཆ་འདི་དེ་རིང་ཁ་སང་ཆབ་སྲིད་དང་འཇིག་རྟེན་གྱི་བྱ་གཞག་ནང་གང་འདྲ་བྱས་ན་ལག་ལེན་བསྟར་རྒྱུའི་བརྗོད་གཞི་གཙོ་བོ་ཡིན་པ་རེད་བསམ་གྱི་ཡོད། ལྷག་པར་ང་ཚོ་བོད་མི་ཚོས་བོད་དོན་བདེན་མཐའ་སེལ་ཐབས་ཀྱི་ལས་འགུལ་འཚེ་བ་མེད་པའི་ལམ་ནས་གང་འདྲ་བྱེད་ཐུབ་བམ། ཞེས་པའི་དྲི་བ་དེ་ད་རེས་ཟབ་སྦྱོང་ནང་བགྲོ་གླེང་གཙོ་བོ་རེད་བསམ་གྱི་འདུག ཡི་གེའི་ངོ་གདོང་ལ་འཚེ་མེད་ཞི་བ་ཞེས་བྲིས་འདུག་ཀྱང་འཚེ་བ་མེད་པ་དང་ཞི་བ་གཉིས་དོན་གཅིག་མིང་གི་རྣམ་གྲངས་ཆགས་ཀྱི་མེད་པ་རེད། ཞེས་དང་སྤྱིར་འཛམ་གླིང་ནང་དམག་འཁྲུག་མེད་པ་ཙམ་ལ་འཚེ་བ་མེད་པ་གོ་གི་ཡོད་ནའང་དེ་ལྟར་མ་ཡིན་པར་སྲོལ་རྒྱུན་དང་ནང་པའི་ལྟ་ཕྱོགས་ནས་བཤད་ན་ལུས་ངག་གི་རྣམ་རིག་གང་རུང་ཞིག་ཐོག་ནས་རང་ལས་རྒྱུད་ཐ་དད་པའི་གཞན་གང་ཟག་ལ་གནོད་པའི་ལས་བྱས་པ་ཞིག་ལ་འཚེ་བ་དང་། དེ་དག་ནི་ནང་སྐུལ་སློང་ལ་རག་ལུས་པ་ཞིག་ཡིན་སྐོར་སོགས་ཀྱི་འགྲེལ་བཤད་ཞིབ་རྒྱས་དང་། དེ་བཞིན་དབུ་མའི་ལམ་གྱི་ཐོག་མའི་ཚིག་གི་བརྡ་ཆད་གྲུབ་སྟངས་དང་ད་ལྟ་དབར་བོད་རྒྱའི་ཆབ་སྲིད་གནས་བབ་བཅས་འགྲེལ་བཤད་མདོར་བསྡུས་ཤིག་གནང་གྲུབ་མཚམས་དྲི་བ་དྲིས་ལན་གནང་ཡོད་པ་བཅས་ཀྱི་གནས་བསྡུས་སུ།
