༢༠༡༠ ཟླ་ ༨ ཚེས་ ༢༣ རེས་གཟའ་ཟླ་བ།
༄༅། །ཕྱི་ལོ་ ༢༠༡༠ ཟླ་ ༨ ཚེས་ ༢༣ ཉིན་གྱི་སྔ་དྲོ་ཆུ་ཚོད་ ༩།༣༠ ཙམ་གྱི་ཐོག་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་བྱང་ཕྱོགས་ཧི་མཱ་ཅལ་མངའ་སྡེའི་ས་ཁུལ་ཇི་སི་པ་དང་སྐྱི་ལོང། མ་ནཱ་ལི། ཀུ་ལུ། ཀའི་སེ། མཎ་ཌི་བཅས་ཀྱི་ནང་ཆོས་ཕྱོགས་ཀྱི་མཛད་འཕྲིན་ཁག་ལེགས་པར་གྲུབ་སྟེ་བཞུགས་སྒར་དུ་༸ཞབས་སོར་བདེ་བར་འཁོད་ཡོད། དེ་ཡང་༸གོང་ས་༸སྐྱབས་མགོན་ཆེན་པོ་མཆོག་གིས་ཟླ་ ༨ ཚེས་ ༡༨ ནས་ཚེས་ ༢༢ བར་གོང་བརྗོད་ས་ཁུལ་དེ་དག་ནང་གསུང་ཆོས་དང་མང་ཚོགས་བཀའ་སློབ། གསར་འགོད་ལྷན་ཚོགས། དགོན་སྡེ་འདྲ་མིན་ཁག་གཅིག་ལ་ཆིབས་སྒྱུར་བསྐྱངས་ཡོད་པ་མ་ཟད། ཧི་མཱ་ལའི་མི་རིགས་དང་བོད་རིགས་གཙོ་བོར་གྱུར་བའི་དད་ལྡན་མང་པོ་ཞིག་ལ་མཇལ་ཁ་དང་གསུང་ཆོས་བཀའ་དྲིན་ཆེ་བ་སྩལ་ཡོད།།
