༢༠༡༤ ཟླ་ ༣ ཚེས་ ༡༨ རེས་གཟའ་ལྷག་པ།
༄༅། །འདི་གར་ཁུངས་ལྡན་གནས་ཚུལ་འབྱོར་གསལ་ལྟར་ན། ཕྱི་ལོ་ ༢༠༡༤ ཟླ་ ༣ ཚེས་ ༦ ཉིན་སོག་རྫོང་། ཁྲི་རྡོ་ཡུལ་ཚོའི་དྲིལ་མདའ་དགོན་པའི་གྲྭ་སྐལ་བཟང་ཚུལ་ཁྲིམས་ལགས་དང་། ཐུབ་བསྟན་དཔལ་ལྡན་ལགས། རྡོ་བ་གྲོང་ཚོའི་ནོར་འབུག་ཚང་གི་བུ་ནོར་བུ་དོན་གྲུབ་ལགས། རྟ་མགྲིན་ཚང་གི་བུ་སྨོན་ལམ་རྒྱ་མཚོ་ལགས། དགེ་ལི་ཚང་གི་བུ་ཚེ་རིང་ཐར་པ་ལགས་བཅས་རྒྱ་གཞུང་གིས་འཛིན་བཟུང་བྱས་འདུག
ཁོང་རྣམས་འཛིན་བཟུང་བྱེད་དགོས་དོན་ནི་ཁ་པར་བརྒྱུད་བོད་དོན་དང་འབྲེལ་བ་ཡོད་པའི་པར་རིས་དང་འཕྲིན་ཐུང་གཏོང་རེས་བྱས་རྐྱེན་གྱིས་ཡིན་པ་དང་། ད་ལྟའི་ཆར་ཁོང་ཚོ་གང་དུ་བཀག་ཉར་བྱས་མིན་ནང་མི་ཚོས་ཀྱང་ཤེས་རྟོགས་ཐུབ་ཀྱི་མེད་པ་རེད། དེ་བཞིན་ཕྱི་ལོ་ ༢༠༡༢ ཟླ་ ༥ ནང་དྲིལ་མདའ་དགོན་པའི་གྲྭ་སྐལ་བཟང་ཚུལ་ཁྲིམས་ལགས་ནི་རྒྱ་ནག་གཞུང་གིས་འཛིན་བཟུང་གིས་ལོ་གཅིག་གི་དུས་བཀག་ཁྲིམས་ཐག་བཅད་དེ། ལྷ་སའི་སྟོད་ལུང་བཙོན་ཁང་དུ་ལོ་གཅིག་བཙོན་འཇུག་བྱས་རྗེས་གློད་བཀྲོལ་ཐོབ་ཡོད་འདུག་ཀྱང། ད་ལྟ་བསྐྱར་དུ་འཛིན་བཟུང་བྱས་ཡོད་འདུག
ཕྱི་ལོ་ ༢༠༡༤ ཟླ་ ༢ ཚེས་ ༣ ཉིན་སོག་རྫོང་ཁྲི་རྡོ་ཡུལ་ཚོའི་གྲོང་ཚོ་གསུམ་པའི་ན་གཞོན་དྲུག་རྒྱ་གཞུང་གིས་བཀག་ཉར་བྱས་པའི་ནང་ནས་སྲིད་གསུམ་རྡོ་རྗེ་ལགས་དང་། ལྷག་པ་ལགས། འཇམ་དབྱངས་རྒྱ་མཚོ་ལགས། རྡོ་རྗེ་ལགས་བཅས་བཞི་གློད་བཀྲོལ་བཏང་ནས་ཁྲི་རྡོ་ཡུལ་ཚོའི་སྲིད་གཞུང་ནང་ཉིན་ལྟར་ཐོ་འགོད་བྱེད་དགོས་པ་བཟོས་འདུག
ན་གཞོན་དྲུག་དེའི་ནང་ནས་ནོར་འཕེལ་ཚང་གི་བུ་ཨ་བཟང་ལགས། འུག་གུ་མའི་བུ་མར་སྒོང་གཉིས་ད་ལྟའི་ཆར་གང་དུ་བཙོན་འཇུག་བྱས་ཡོད་མེད་ནང་མི་དང་གྲོང་མི་དག་གི་རྩད་བཅོད་ཐུབ་ཀྱི་མེད་པ་དང་། དེ་བཞིན་ཕྱི་ལོ་ ༢༠༡༤ ཟླ་ ༢ ཚེས་ ༤ ཉིན་རྒྱ་གཞུང་གིས་རྡོ་བ་གཤར་ཚ་དགོན་པའི་དགེ་འདུན་པ་བཞི་འཛིན་བཟུང་བྱས་པ་དེ་ཡང་ད་ལྟའི་ཆར་གང་དུ་བཙོན་འཇུག་བྱས་མིན་ཤེས་རྟོགས་གང་ཡང་མི་འདུག
སོག་རྫོང་ཁྲི་རྡོ་ཡུལ་ཚོའི་ལྕགས་ཟམ་ཟམ་ཁ་རུ་རྡོ་ཕ་བོང་ཆེན་པོའི་ཐོག་ལྕགས་རྩི་དམར་པོས་བོད་རང་བཙན་ཡིན་ཞེས་པའི་ཡིག་འབྲུ་ཆེན་པོ་བྲིས་ཡོད་འདུག ཕྱི་ཟླ་ ༣ ཚེས་ ༡༠ ཉིན་རྒྱ་གཞུང་གི་དམག་མི་མོ་ཊ་ ༢༠ ཙམ་དང་ཉེན་རྟོག་པ་གྲངས་༨༠ ལྷག་སླེབས་ནས་ཡར་མར་འགྲོ་མཁན་ཚང་མར་ཞིབ་བཤེར་བྱེད་བཞིན་པ་མ་ཟད། ཕན་ཚུན་འགྲོ་འོང་བཀག་བསྡོམས་བྱས་ནས་སུན་གཙེར་དང་དྲག་གནོན་ཚད་ལས་བརྒལ་བ་བྱེད་བཞིན་འདུག་པ་བཅས།།
