༢༠༠༩ ཕྱི་ཟླ་ ༩ ཚེས་ ༤ རེས་གཟའ་ཕུར་བུ།

༄༅། ། ཕྱི་ལོ་ ༢༠༠༩ ཟླ་ ༩ ཚེས་ ༤ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཐེ་ཝན་དུ་ཉིན་ལྔའི་མཛད་འཕྲིན་སྐབས་དྲག་ཆར་རླུང་འཚུབ་ཀྱི་གོད་ཆག་ཕམ་ཉེས་བྱུང་བའི་ཡུལ་མི་རྣམས་ལ་གདུང་སེམས་མཉམ་སྐྱེ་དང་སེམས་གསོ་དེ་བཞིན་སྨོན་ལམ་གསོལ་འདེབས་ཀྱི་མཛད་རིམ་ཁག་ལེགས་གྲུབ་ཐོག་ཕྱི་ཚེས་ ༤ སྔ་དྲོ་ཐེ་ཝན་ནས་ལྡི་ལིར་ཆིབས་སྒྱུར་བསྐྱངས་ཡོད། དེ་ཡང་མགོན་པོ་གང་ཉིད་ནས་ད་རེས་ཐེ་ཝན་དུ་ཕེབས་པའི་རྩ་བའི་དམིགས་ཡུལ་དེ་ལེགས་པར་གྲུབ་པར་ཐུགས་བློ་ཁེངས་པོ་བྱུང་ཡོད་སྐོར་བཀའ་གནང་ཡོད། ཐེ་ཝན་དང་བོད་ཀྱི་སློབ་མ་བརྒྱ་ཕྲག་མང་པོས་ཐེ་པེ་ནང་ཧ་ཝཊ་པ་ལ་ཛ་ (Howard Plaza hotel) མགྲོན་ཁང་དུ་ཕེབས་སྐྱེལ་ཞུ་བར་བཅར་ཡོད་པ་མ་ཟད་ད་དུང་མི་ཚོགས་བརྒྱ་ཕྲག་མང་པོ་ཞིག་ཐེ་ཝན་གྱི་ཏའོ་ཡུན་རྒྱལ་སྤྱིའི་གནམ་ཐང་དུ་༸གོང་ས་མཆོག་ཕེབས་སྒུག་ཞུས་ཡོད་པ་ཌི་པི་ཨེ་གསར་ལས་ཁང་ནས་བརྗོད་འདུག

དེ་ཡང་༸གོང་ས་མཆོག་སྐུ་སྲུང་བས་ཞབས་ཞུ་དང་སྦྲགས་གནམ་ཐང་དུ་ཆིབས་སྒྱུར་སྐབས་གསར་འགོད་པ་ཞིག་ནས་བཀའ་འདྲི་ཞུས་དོན། སྐུ་ཉིད་བོད་དུ་ཕྱིར་ལོག་ཕེབས་ཐུབ་པའི་བསམ་པ་ཡོད་དམ་ཞེས་ཞུས་པར་༸གོང་ས་མཆོག་ནས་བཀའ་ལན་དུ། ང་ཚོ་ག་དུས་ཡིན་ནའང་བོད་དུ་ལོག་རྒྱུའི་གྲ་སྒྲིག་ཡོད་གང་ཡིན་ཟེར་ན་ང་ཚོ་བོད་མི་ཞིག་ཡིན་པའི་ཆ་ནས་བརྗོད་མ་དགོས་པ་ཡིན། ངོས་རང་ཡང་བོད་མི་ཞིག་ཡིན་ཞེས་བཀའ་སྩལ། ༸གོང་ས་མཆོག་ཐེ་ཝན་དུ་༸ཞབས་སོར་འཁོད་ནས་ཉིན་གསུམ་པ་དེར་ཐེ་ཝན་ལྷོ་ཕྱོགས་ས་ཁུལ་ནས་རྒྱལ་ས་ཐེ་པེ་མེ་འཁོར་ལྕགས་ལམ་བརྒྱུད་ཆིབས་སྒྱུར་སྐབས་གསར་འགོད་ལྷན་ཚོགས་ Associated Press ཞེས་པའི་གསར་འགོད་པ་རྣམས་ནས་སྐར་མ་ ༩༠ ཙམ་རིང་༸གོང་ས་མཆོག་ལ་བཀའ་འདྲི་ལྷུག་པོ་ཞུས་ཡོད་པར་མགོན་པོ་གང་ཉིད་ཀྱིས་བཀའ་ལན་ཕེབས་པའི་ནང་། ཟླ་བ་སྔོན་མའི་ནང་ཤའོ་ལིན་གྲོང་ཚོའི་ནང་དྲག་ཆར་རླུང་འཚུབ་ཀྱིས་ཆར་ཞོད་ཆེན་པོ་བབས་པར་བརྟེན་ས་ཉིལ་ནས་མི་བརྒྱ་ཕྲག་མང་པོ་རྐྱེན་འདས་སུ་གྱུར་བ་དང་མང་པོ་ཞིག་ལ་གོད་ཆག་ཕོག་ཡོད་པའི་རྗེས་ཤུལ་ཡུལ་མི་རྣམས་དང་མཇལ་འཕྲད་གནང་སྐབས་ཁ་ཤས་ཀྱི་ངུ་འབོད་བྱེད་བཞིན་པ་དེ་དག་གཟིགས་རྗེས་ཐུགས་བློ་ཕམ་པོ་དང་ཐུགས་འགུལ་ཆེན་པོ་བྱུང་སྐོར་བཀའ་སྩལ་པ་དང་། ཡུལ་ལྗོངས་ཀྱི་རྣམ་པ་དེ་སྐྱོ་སྣང་དོད་པོ་ཞེ་དྲག་འདུག་ཅེས་དང་འོན་ཀྱང་གང་བྱུང་བ་རྣམས་དོན་དངོས་ཐོག་བྱུང་ཚར་བའི་གནས་ཚུལ་ཞིག་རེད་ཅེས་གསུངས་གནང་འདུག ཡང་༸གོང་ས་མཆོག་ནས་ངོས་རང་འདིར་ཡོང་བའི་དགོས་དོན་གཙོ་བོ་དེ་བསྒྲུབསཐུབ་སོང་བས་ཧ་ཅང་གི་འདོད་བློ་ཁེངས་པོ་བྱུང་ཞེས་བཀའ་སྩལ་གནང་ཡོད་པའི་གནས་བསྡུས་སུ།