༢༠༡༤ ཟླ་ ༣ ཚེས་ ༡༠ རེས་གཟའ་ཟླ་བ།
༄༅། །ཕྱི་ལོ་ ༢༠༡༤ ཟླ་ ༣ ཚཻས་ ༡༠ ཉིན་རྡ་ས་ཐེག་ཆེན་ཆོས་གླིང་གཙུག་ལག་ཁང་གི་གསུང་ཆོས་རྭ་བའི་ནང་དབུས་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་དབུ་བཞུགས་ཐོག་གསུམ་བཅུའི་དུས་དྲན་ཐེངས་ ༥༥ སྲུང་བརྩི་ཞུས་ཡོད། སྐབས་དེར་ཡུ་རོབ་སྤྱི་མཐུན་ཚོགས་པའི་དཔལ་འབྱོར་དང་སྤྱི་ཚོགས་ཡར་རྒྱས་ལྷན་ཁང་གི་འགན་འཛིན་སྐུ་ཞབས་ཧེན་རི་མི་ལོ་སི་མཆོག་ཆེད་ཕེབས་གནང་སྟེ་གསུང་བཤད་གནང་དོན། བོད་མིའི་ཆབ་སྲིད་ཀྱི་དབུ་ཁྲིད་བཀུར་འོས་སྲིད་སྐྱོང་བློ་བཟང་སེང་གེ་མཆོག་དང་དཔལ་ལྡན་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག དེ་བཞིན་བོད་རིགས་ཆོས་གྲོགས་རྣམས་ལ་ཐོག་མར་ང་རང་རྒྱ་ནག་གཞུང་གིས་བོད་ནང་བཙན་འཛུལ་བྱས་པ་དེར་བོད་མི་ཚོས་ཞི་བའི་ངོ་རྒོལ་རྔམ་སྟོན་བྱས་ནས་ད་བར་མི་ལོ་ ༥༥ འཁོར་བའི་བོད་མིའི་གསུམ་བཅུའི་དུས་དྲན་ཐེངས་ ༥༥ ཐོག་ཡོ་རོབ་སྤྱི་མཐུན་ཚོགས་པའི་ཚབ་ཞུས་ནས་སྐད་ཆ་ཚིག་ཁ་ཤས་ཞུ་རྒྱུའི་གོ་སྐབས་ཐོབ་པར་ཧ་ཅང་དགའ་སྤོབ་ཆེན་པོ་བྱུང་།
ཐོག་མར་ངས་བཙན་བྱོལ་བོད་མིའི་སྤྱི་ཚོགས་ལ་ཡི་རངས་བསྔགས་བརྗོད་ཞུ་འདོད་བྱུང་། གང་ཡིན་བརྗོད་ན་བཙན་བྱོལ་བོད་མིའི་སྤྱི་ཚོགས་འདི་ནི་འཛམ་གླིང་ནང་རང་ཡུལ་བྲལ་ནས་གནས་སྡོད་བྱེད་མཁན་གྱི་བཙན་བྱོལ་བ་རང་དབང་མེད་མཁན་གཞན་རྣམས་ལ་མིག་དཔེ་འོས་པའི་སྤྱི་ཚོགས་ཤིག་ཆགས་ཡོད། བཙན་བྱོལ་བོད་མིའི་སྤྱི་ཚོགས་འདི་ནི་སྒྲིག་འཛུགས་ཀྱི་རྣམ་པ་དང་། མང་གཙོའི་ངོ་བོ། དེ་བཞིན་སྤྱི་ཚོགས་ཀྱི་རྣམ་པ་སོགས་གང་གི་ཆ་ནས་མིག་དཔེ་འོས་པའི་བཙན་བྱོལ་གྱི་སྒྲིག་འཛུགས་ཤིག་ཆགས་ཡོད། ཕྱོགས་མཚུངས་གཞིས་ལུས་བོད་མི་ཚོས་མི་ལོ་ལྔ་བཅུ་ལྷག་ཙམ་རིང་རང་དབང་གི་དོན་དུ་འཐབ་རྩོད་གནང་བཞིན་པ་རྣམས་ལ་ངས་གདུང་སེམས་མཉམ་སྐྱེ་ཞུ་རྒྱུ་མ་ཟད། དཀའ་སྡུག་འོག་སྡུག་སྦྱོང་མནར་བཅོས་མྱོང་བཞིན་པའི་བོད་མི་རྣམས་ཀྱིས་གཙོས་རྒྱ་ནག་ནང་གི་རྒྱ་མི་རིགས་རང་དབང་བྲལ་བ་རྣམས་དང་དེ་བཞིན་འཛམ་གླིང་ས་ཕྱོགས་གང་སར་རང་དབང་དང་བྲལ་ནས་དཀའ་སྡུག་མྱོང་བཞིན་པ་རྣམས་ལའང་སེམས་གསོ་དང་སྦྲགས་རྒྱབ་སྐྱོར་ཞུ་རྒྱུ་ཡིན། བོད་ཀྱི་གནད་དོན་ནི་རྒྱལ་སྤྱིའི་གནད་དོན་ཞིག་ཡིན་པར་བརྟེན་ང་ཚོ་དེ་རིང་འདིར་བཅར་བ་ཡིན། ཡོ་རོབ་སྤྱི་མཐུན་ཚོགས་པ་འདི་རང་དབང་དང་མང་གཙོ། ཆིག་སྒྲིལ་སོགས་རིན་ཐང་དེ་དག་ལ་གཞི་བཅོལ་ནས་གསར་འཛུགས་གནང་བ་ཞིག་ཡིན། ང་ཚོ་ཡོ་རོབ་སྤྱི་མཐུན་ཚོགས་པ་ནི་ལོ་ངོ་བརྒྱ་ཕྲག་རིང་ཕན་ཚུན་འཁྲུག་རྩོད་ལན་མང་བྱས་མཐར་ཚང་མ་འཆམ་མཐུན་ངང་འཚོ་གནས་བྱ་རྒྱུའི་མཐུན་སྒྲིལ་བྱུང་བའི་ཚོགས་པ་ཞིག་ཆགས་ཡོད། ཡོ་རོབ་སྤྱི་མཐུན་རྒྱལ་ཁབ་འདི་ནི་རྒྱལ་པོའི་རྒྱལ་སྲིད་ཀྱི་མངའ་ཐང་ཞིག་མིན་པ་མ་ཟད། དེ་འདྲ་ཡིན་པའི་རྣམ་འགྱུར་ཡང་སྟོན་གྱི་མེད། ང་ཚོས་དེ་སྔ་རྒྱལ་པོའི་ལམ་ལུགས་རྗེས་སུ་འབྲང་ནས་རང་གི་རྒྱལ་སྲིད་མངའ་ཐང་འཕེལ་རྒྱས་གཏོང་རྒྱུའི་ལམ་ལུགས་ཐོག་ཕྱིར་ལོག་བྱ་རྒྱུ་མེད།
དེང་སྐབས་རྒྱ་ནག་དང་ཨུ་རུ་སུ་གཙོ་བོར་གྱུར་བའི་རྒྱལ་ཁབ་ཁག་གཅིག་གིས་རྣམ་འགྱུར་དེ་འདྲ་སྟོན་བཞིན་ཡོད། དེར་བརྟེན་ཁོང་ཚོས་སྟོབས་ཤུགས་ཆེན་པོ་བཟོ་རྒྱུ་གཙོ་བོར་འཛིན་བཞིན་ཡོད། ང་ཚོས་ལངས་ཕྱོགས་མི་འདྲ་བ་ཞིག་འཛིན་བཞིན་ཡོད། ལངས་ཕྱོགས་དེ་བརྒྱུད་ནས་ང་ཚོས་བོད་མི་ཚོར་རང་དབང་སྤྲོད་དགོས་པ་དེར་རྒྱབ་སྐྱོར་ཞུ་བཞིན་ཡོད། དེར་བརྟེན་ང་ཚོས་སྲིད་སྐྱོང་མཆོག་དང་སྤྱི་འཐུས་ཚོགས་གཙོ་རྣམ་གཉིས་ཀྱིས་འབད་བརྩོན་གནང་བཞིན་པའི་དབུ་མའི་ལམ་གྱི་སྲིད་བྱུས་ལ་མཐའ་གཅིག་ཏུ་རྒྱབ་སྐྱོར་ཞུ་ཐོག་བོད་ཀྱི་གནད་དོན་དེ་འཚེ་བ་མེད་པ་གྲོས་མོལ་གྱི་ལམ་ནས་སེལ་རྒྱུར་རྒྱབ་སྐྱོར་མུ་མཐུད་ཞུ་རྒྱུ་ཡིན། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་ཆོས་ལུགས་ཀྱི་ས་མཚམས་ལས་བརྒལ་བའི་བཟང་སྤྱོད་སྐོར་བཀའ་སློབ་སྩོལ་བཞིན་ཡོད་པར་བརྟེན་ད་ཆ་ང་ཚོས་ངོས་ནས་ཀྱང་རང་གི་རྒྱལ་ཁབ་ཀྱི་རྒྱལ་སྲིད་མངའ་ཐང་རྒྱ་སྐྱེས་གཏོང་རྒྱུ་ཁོ་ནའི་ཐོག་བསམ་བློ་གཏོང་རྒྱུ་མེད། དེ་ལས་བརྒལ་བའི་བསམ་བློ་གཏོང་ཐུབ་དགོས། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་དུས་རབས་ ༢༡ འདི་འཚེ་མེད་ཞི་བ་དང་གྲོས་མོལ་གྱི་དུས་རབས་ཤིག་བཟོ་དགོས་པ་བཀའ་སློབ་སྩལ་ཡོད་དེར་བརྟེན་ང་ཚོས་དུས་ ༢༡ འདི་འཚེ་མེད་ཞི་བ་དང་གྲོས་མོལ་གྱི་དུས་རབས་ཤིག་ཡོང་རྒྱུར་འབད་བརྩོན་བྱེད་དགོས། ཞེས་གསུངས།
