༢༠༠༩ ཕྱི་ཟླ་ ༩ ཚེས་ ༢ རེས་གཟའ་ལྷག་པ།
༄༅། །ཕྱི་ལོ་ ༢༠༠༩ ཟླ་ ༩ ཚེས་ ༡ ཉིན་ཨེ་ཨེ་ཕ་པི་ནས་སྤེལ་བའིི་གནས་ཚུལ་ལྟར་ན། ཐེ་ཝན་ལྷོ་ཕྱོགས། ཀའོ་ཤུང་གྲོང་ཁྱེར་གྱི་རྩེད་ཐང་ཆེན་མོར་ཉེ་ལམ་ཐེ་ཝན་ལྷོ་ཕྱོགས་ས་ཁུལ་ཁག་གཅིག་ལ་ཆུའི་འཇིག་པས་གོད་ཆག་ཚབས་ཆེ་ཕོག་པ་དེར་དམིགས་ནས་༸གོང་ས་མཆོག་དབུ་བཞུགས་ཐོག་མི་མང་རྣམས་ནས་སྨོན་ལམ་གསོལ་འདེབས་ཆུ་ཚོད་གཉིས་ཙམ་རིང་བཏོན་ཡོད་པ་རེད།
སྐབས་དེར་མི་གྲངས་༡༠༠༠༠ ཙམ་མཉམ་ཞུགས་གནང་འདུག འདུ་འཛོམས་འདིའི་ཐོག་༸གོང་ས་མཆོག་ནས་བཀའ་སློབ་སྩལ་དོན། ད་རེས་ངོས་རང་འདིར་ཡོང་དགོས་པའི་དམིགས་ཡུལ་ནི་གོད་ཆག་བྱུང་བ་རྣམས་ལ་སྨོན་ལམ་རྒྱག་རྒྱུ་དང་། ཁོང་ཚོའི་བར་ཆད་རྣམས་བཟློག་ཐབས་ཆེད་དུ་ཡིན་ཞེས་བཀའ་སྩལ་ཡོད། སྐབས་དེར་ད་རེས༸གོང་ས་མཆོག་དྲག་ཆར་རླུང་འཚུབ་ཀྱིས་གནོད་འཚེ་ཕོག་ཁུལ་གྱི་ཐེ་ཝན་མི་མང་རྣམས་ཀྱི་ཆེད་དུ་དེར་༸ཞབས་སོར་འཁོད་པར་ང་རང་སེམས་འགུལ་ཧ་ཅང་ཤུགས་ཆེན་ཐེབས་བྱུང་ཞེས་དངུལ་ཁང་ལས་བྱེད་པ་བི་ཝན་ཅེན་ནས་བརྗོད་ཡོད་པ་རེད། ཡང་རང་གི་བཟའ་ཟླ་འཁོར་ལོའི་རྐུབ་སྟེགས་སྟེང་འཁྱེར་དགོས་པའི་གྲོང་ཁྱེར་ཀའོ་ཤུང་གི་མི་སེར་ཞིག་ནས་བརྗོད་དོན་ང་ཚོ་སྨོན་ལམ་འདུ་འཛོམས་འདིར་ཡོང་དགོས་དོན་གཙོ་བོ་ངའི་བཟའ་ཟླ་སྐྲན་ནད་ཀྱི་གཤག་བཅོས་མ་བྱས་སྔོན་དུ་བྱིན་རླབས་ཤིག་ཐོབ་རེའི་ཆེད་དུ་བཅར་བ་ཡིན་ཞེས་བརྗོད་ཡོད། ཡང་ཏ་ཡི་ནན་གྲོང་ཁྱེར་ནས་རང་གི་གྲོགས་པོ་དང་ལྷན་༸གོང་ས་མཆོག་མཇལ་བཅར་དུ་ཐེངས་དང་པོ་བཅར་མཁན་རང་ལོ་ ༥༡ ཡིན་པ་སྐུ་ཞབས་ལིན་ནས། ང་ཚོ་འདིར་ཡོང་དོན་ནི་༸གོང་ས་མཆོག་ཐེ་ཝན་དུ་དུས་ཚོད་གཉན་འཕྲངཅན་གྱི་སྐབས་འདིར་ཕེབས་པར་བསྔགས་བརྗོད་ཞུ་ཆེད་བཅར་བ་ཡིན་ཚུལ་དང་། ད་དུང་ཁོང་ནས་བརྗོད་གསལ། ང་རང་འདིར་ཡོང་རྒྱུའི་གོ་སྐབས་བྱུང་བར་ཧ་ཅང་དགའ་པོ་བྱུང་ཞེས་བརྗོད་ཡོད།
༸གོང་ས་མཆོག་ནས་ཕྱོགས་འགལ་མང་གཙོ་ཡར་ཐོན་ཚོགས་པའི་དབུ་ཁྲིད་ཚའི་ཡིང་ཝན་དང་། གྲོང་ཁྱེར་སྤྱི་ཁྱབ་པ་ལྕམ་སྐུ་ཆེན་ཇུ་ལྷན་རྒྱས་ལ་སྔ་དྲོ་ཆུ་ཚོད་ཕྱེད་ཙམ་རིང་མཇལ་འཕྲད་དང་གསུང་མོལ་སྐབས་༸གོང་ས་མཆོག་གིས་ད་རེས་ཐེ་ཝན་དུ་ཕེབས་དོན་ཡང་དེ་སྔོན་ཐེ་ཝན་དུ་ཐེངས་གཉིས་ཕེབས་པ་དེ་མཚུངས་འགྲོ་བ་མིའི་བདེ་རྩ་ཆེད་ཁོ་ན་ཡིན་པའི་ཐོག་རང་བྱུང་གི་གོད་ཆག་བྱུང་བ་རྣམས་ལ་སེམས་གསོ་དང་གདུང་སེམས་མཉམ་སྐྱེ་གནང་རྒྱུ་ཡིན་ཞེས་གསུངས་ཡོད་པ་ཌི་པི་པི་མགྲིན་ཚབ་པ་སྐུ་ཞབས་ཅེན་ཝན་ཚང་ནས་བརྗོད་ཡོད་པའི་གནས་བསྡུས་སུ།
