༢༠༡༤ ཟླ་ ༢ ཚེས་ ༢༨ རེས་གཟའ་པ་སངས།
༄༅། །ཕྱི་ལོ་ ༢༠༡༤ ཟླ་ ༢ ཚེས་ ༢༦ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལོ་སི་ཨན་ཇི་ལི་སིའི་ (Los Angeles) གྲོང་ཁྱེར་ནང་རྟེན་གཞི་བྱས་པའི་ (Huff Post)གསར་ཁང་གི་གསར་འགོད་པ་ (Willow Bay) ལྕམ་སྐུ་ཝིལ་ལོ་བྷེ་ལགས་ཀྱི་ཆེད་དོན་དྲི་བར་བཀའ་ལན་སྩལ་འདུག
དེ་ཡང་གསར་འགོད་པས་ཨ་རིའི་སྲིད་འཛིན་བྷ་རཀ་ཨོ་བྷ་མ་མཆོག་དང་མཇལ་འཕྲད་སྐོར་གྱི་དྲི་བར་མགོན་པོ་གང་ཉིད་མཆོག་གིས་བཀའ་ལན་ཕེབས་དོན། སྲིད་འཛིན་མཆོག་དང་ངོས་རང་གྲོགས་པོ་རྙིང་པ་ཞིག་ཡིན་པར་བརྟེན། ཐེངས་འདིར་ཁོང་དང་མཇལ་འཕྲད་སྐབས་ངོས་ཀྱིས་རྒྱུན་དུ་འབད་བརྩོན་བྱེད་བཞིན་པའི་གནད་དོན་ཁག་གསུམ་གྱི་སྐོར་ལ་ཞུ་རྒྱུ་བྱུང་བ་རྣམས་འགྲོ་བ་མིའི་རིན་ཐང་གོང་སྤེལ་དང། ཆོས་ལུགས་མཐུན་སྒྲིལ་གོང་མཐོར་གཏོང་རྒྱུ། དེ་བཞིན་བོད་ཀྱི་རིག་གཞུང་སྲུང་སྐྱོབ་བྱེད་རྒྱུ་ཡིན་སྐོར་ཐོག་བཀའ་མོལ་ཞུས་པ་ཡིན།
གསར་འགོད་པས་རྒྱལ་ཁ་ཞེས་པ་གང་འདྲ་ཞིག་ལ་ངོས་འཛིན་མཛད་ཀྱི་ཡོད་མེད་སྐོར་གྱི་དྲི་བར་མགོན་པོ་གང་ཉིད་མཆོག་གིས་བཀའ་ལན་ཕེབས་དོན། སྤྱིར་བཏང་དངུལ་པོ་མང་པོ་བྱུང་བ་དང་དཔལ་འབྱོར་གྱི་གནས་བབ་ཁོ་ནར་རྒྱལ་ཁར་ཚད་འཛིན་བྱས་ན། དེ་ནི་དོན་དངོས་ཀྱི་རྒྱལ་ཁ་ཞིག་ཆགས་ཀྱི་མེད། དེང་སྐབས་དཔལ་འབྱོར་ཧ་ཅང་ཕྱུག་པོ་ཡོད་པའི་མི་སྣ་དེ་དག་གི་ནང་སེམས་ལ་བདེ་སྐྱིད་མེད་པ་མཐོང་ཆོས་སུ་ཡོད། དེར་བརྟེན་རྒྱལ་ཁ་ངོ་མ་ནི་ཆུང་ས་ནས་གང་ཟག་སྒེར་དང་རང་ཉིད་ཀྱི་ནང་མི། དེ་བཞིན་ཆེ་ས་ནས་སྤྱི་ཚོགས་ལ་བདེ་སྐྱིད་བསྐྲུན་ཐུབ་ན་དོན་དངོས་ཀྱི་རྒྱལ་ཁ་ཞིག་ཆགས་ཀྱི་ཡོད། ཅེས་བཀའ་ལན་ཕེབས་འདུག
ཡང་གསར་འགོད་པས་ཆེས་ཡར་ཐོན་ཅན་གྱི་ལག་ཐོགས་ཁ་པར་སོགས་འཕྲུལ་ཆས་རིགས་ལ་དགོངས་ཚུལ་གང་འདྲ་ཡོད་མེད་ཀྱི་དྲི་བར་༸གོང་ས་མཆོག་གིས་བཀའ་ལན་ཕེབས་དོན། ངོས་རང་རྒྱུན་དུ་ནས་ལག་ཐོགས་ཁ་པར་རིགས་བེད་སྤྱོད་བྱེད་ཀྱི་མེད། འོན་ཀྱང་གཞི་རྩའི་འཕྲུལ་ཆས་རིགས་ལ་ངོ་མཚར་སྐྱེ་དགོས་པ་རེད་འདུག འཕྲུལ་ཆས་རིགས་བརྒྱུད་ནས་མིའི་ནུས་པར་ཇེ་ཆེར་གཏོང་གི་ཡོད་པ་མ་ཟད། ལས་དོན་ཁག་གཅིག་ཧ་ཅང་སྟབས་བདེ་པོ་བཟོ་གི་ཡོད། ཡིན་ནའང་འཕྲུལ་ཆས་རིགས་ཀྱིས་བྱམས་བརྩེ་ནམ་ཡང་བསྐྲུན་ཐབས་མེད། གལ་ཏེ་ང་ཚོས་འཕྲུལ་ཆས་རིགས་ལ་དོ་སྣང་ཇེ་ཆེར་ཕྱིན་ནས་འཕྲུལ་རིགས་ཀྱིས་མིར་སྟངས་འཛིན་བྱེད་ཡུལ་གྱི་གནས་སུ་འགྱུར་ན་གནད་དོན་དེ་ཡག་པོ་མ་རེད། ཅེས་བཀའ་ལན་སྩལ།
ལྷག་པར་མགོན་པོ་གང་ཉིད་མཆོག་གིས་གསར་འགོད་པར་བདེ་སྐྱིད་འཚོལ་བྱེད་རྒྱུའི་སྐོར་བཀའ་ལན་ཕེབས་དོན། བདེ་སྐྱིད་འཚོལ་བྱེད་རྒྱུར་ཐབས་ལམ་གཙོ་བོ་གཉིས་ཡོད། དང་པོ་རང་ཉིད་ཀྱི་རྒྱུད་ལ་བྱམས་བརྩེའི་བློ་དགོས་རྒྱུ་ཧ་ཅང་གལ་ཆེན་པོ་ཆགས་ཡོད། བློ་འདི་བརྒྱུད་ནས་རང་ཉིད་ཀྱི་སེམས་ལ་གདེང་སྤོབས་ཀྱིས་ཞེད་སྣང་གི་བློ་རྣམས་མེད་པ་ཆགས་ཀྱི་ཡོད། ཕྱོགས་གཞན་ཞིག་ནས་དཀའ་ངལ་དང་གནད་དོན་གང་ཞིག་འཕྲད་རུང་དོན་དངོས་ཐོག་སྤྱི་ཡོངས་ལ་བསམ་བློ་གཏོང་ཐུབ་པ་བྱེད་དགོས། གལ་ཏེ་བྱམས་བརྩེའི་བློ་དང་སྤྱི་ཡོངས་ཀྱི་གནད་དོན་ལ་དོན་དངོས་ལམ་ནས་གདོང་ལེན་བྱེད་རྒྱུའི་བསམ་བློ་ཟུང་དུ་སྦྲེལ་ཐུབ་ན། རང་ཉིད་ཀྱི་མི་ཚེ་འདི་བཞིན་བདེ་ཐང་དང་ཕན་རླབས་ཆེ་བ་ཞིག་ཡོང་ངེས་རེད། ཅེས་བཀའ་ལན་སྩལ།