༢༠༡༤ ཟླ་ ༢ ཚེས་ ༢༦ རེས་གཟའ་ལྷག་པ།
༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཁལ་ལི་ཕོར་ནི་ཡའི་མངའ་སྡེའི་གྲོང་ཁྱེར་ནང་གནས་པའི་བོད་རིགས་སྤྱི་མཐུན་ཚོགས་པས་གསོལ་འདེབས་ཞུས་དོན་ལྟར་ཕྱི་ལོ་ ༢༠༡༤ ཟླ་ ༢ ཚེས་ ༢༣ 
ཉིན་མགོན་པོ་གང་ཉིད་མཆོག་གིས་བྱང་ཁལ་ལི་ཕོར་ནི་ཡའི་མཚོ་འགྲམ་དུ་ཆགས་པའི་བྷར་ཀི་ལི་ (Berkeley) གྲོང་ཁྱེར་ནང་རྟེན་གཞི་བྱས་པའི་བྷར་ཀི་ལི་མི་དམངས་ཚོགས་ཁང་ཆེན་མོའི་ནང་བོད་མི་དང་ཕྱི་རྒྱལ་བ་བཅས་ཁྱོན་མི་གྲངས་ ༣༣༠༠ བརྒལ་བར་མི་ཚེའི་བདེ་སྐྱིད་འཚོལ་ཐབས་ཞེས་པའི་བརྗོད་གཞིའི་ཐོག་བཀའ་སློབ་སྩལ་དོན། དེ་རིང་ངོས་རང་འདི་གར་ཡོང་སྟེ་ཁྱེད་རང་ཚོ་དང་ཐུག་རྒྱུ་བྱུང་བར་ཧ་ཅང་དགའ་སྤོབས་ཆེན་པོ་བྱུང་། སྤྱིར་བཏང་མིའི་མི་ཚེའི་ནང་བདེ་སྐྱིད་བསྐྲུན་རྒྱུར་དངུལ་གལ་ཆེན་པོ་ཡིན་པར་ངོས་འཛིན་བྱེད་ཀྱི་ཡོད། དོན་དངོས་ཐོག་དངུལ་དང་ཕྱིའི་དངོས་པོ་ལས་བྱུང་བའི་བདེ་སྐྱིད་དེ་ནི་ཕྱིའི་ལུས་ཀྱི་བདེ་སྐྱིད་ཙམ་ལས་དོན་དངོས་ཀྱི་བདེ་སྐྱིད་བསྐྲུན་ཐུབ་ཀྱི་མེད། ངོས་ཀྱི་ངོ་ཤེས་གྲོགས་པོ་ཁག་གཅིག་ལ་རྒྱུ་དཔལ་འབྱོར་སྟོབས་ཆེན་པོ་ཡོད་ཀྱང་སེམས་ནང་སྡུག་བསྔལ་རྫོགས་རྒྱུ་མེད་པ་ཡོད་མཁན་དེ་འདྲ་འདུག དེར་བརྟེན་ཕྱིའི་དངོས་པོ་དང་དཔལ་འབྱོར་གྱི་ཆ་རྐྱེན་ཁོ་ནས་ནང་སེམས་ལ་བདེ་སྐྱིད་བསྐྲུན་ཐུབ་ཀྱི་མེད་པ་ཧ་ཅང་གསལ་པོ་ཆགས་ཡོད། བདེ་སྐྱིད་ངོ་མ་དེ་ནང་སེམས་ནས་ཡོང་དགོས་པ་རེད་མ་གཏོགས་ཕྱིའི་དཔལ་འབྱོར་གྱི་ཡོང་ཐབས་མེད། ང་ཚོས་དུས་རྒྱུན་དུ་ནང་སེམས་ཀྱི་བདེ་ཐང་དང་སེམས་སྐྱིད་པོ་ཡོང་ཐབས་སུ་འབད་བརྩོན་བྱས་ན། ཆུང་ས་ནས་ཆ་བཞག་ན། གང་ཟག་སྒེར་པ་སོ་སོའི་ལུས་ཀྱི་འཕྲོད་བསྟེན་ལ་ཕན་ཐོགས་ཡོད་པ་མ་ཟད། ཆེ་ས་ནས་ཁྱིམ་ཚང་དང་། སྤྱི་ཚོགས། རྒྱལ་ཁབ། དེ་བཞིན་སྐྱེ་འགྲོ་ཀུན་ལ་བདེ་སྐྱིད་ཀྱི་ཁོར་ཡུག་ཅིག་བསྐྲུན་རྒྱུར་ཧ་ཅང་ཕན་ཐོགས་ཆེན་པོ་ཡོང་ངེས་རེད། ཨ་རིའི་རྒྱལ་ཁབ་ལྟ་བུར་ཆ་བཞག་ན། འཛམ་གླིང་འདིའི་ནང་མང་ཚོགས་ཀྱི་རང་དབང་དང་ཕྱིའི་དངོས་པོ་གཉིས་ཐོག་ནས་འཛམ་གླིང་གི་རྩེ་མོར་སོན་པའི་རྒྱལ་ཁག་ཅིག་ཆགས་ཀྱི་ཡོད། ལྷག་པར་ཨ་རིར་གཞན་ལ་ཕན་ཐོགས་བྱ་རྒྱུའི་ནུས་པ་ཆ་ཚང་ལྡན་ཡོད་སྟབས། འགྲོ་བ་མི་རིགས་ཚང་མ་གཅིག་གྱུར་གྱི་འདུ་ཤེས་ལྡན་པའི་ཁོར་ཡུག་ཅིག་བསྐྲུན་རྒྱུར་སྔར་ལྷག་འབད་བརྩོན་བྱེད་རྒྱུ་ཧ་ཅང་གལ་ཆེན་པོ་ཆགས་ཡོད། མདོར་ན། ཚན་རིག་པ་ཚོས་ཀྱང་ཉམས་ཞིབ་བྱས་པའི་མྱོང་བ་བརྒྱུད་བྱམས་སེམས་ཆེ་བའི་མི་དེ་དག་སེམས་སྐྱིད་པོ་ཡོད་པར་བརྟེན་ལུས་པོའི་འཕྲོད་བསྟེན་ཡང་ཡག་པོ་ཡོད་པ་བརྗོད་ཀྱི་འདུག དེར་བརྟེན་ང་ཚོས་སེམས་ཞི་དུལ་དང་བདེ་སྐྱིད་ལྡན་པ་ཡོང་ཐབས་སུ་འབད་བརྩོན་བྱེད་དགོས་རྒྱུ་ཧ་ཅང་གལ་ཆེན་པོ་རེད། ང་ཚོ་དུས་རབས་ཉེར་གཅིག་པའི་འགོ་སྟོད་ལ་ཡོད། དུས་རབས་ཉི་ཤུ་པ་མཇུག་སྒྲིལ་ཟིན་པ་རེད། དུས་རབས་དེའི་ནང་འཁྲུག་འཛིང་དང་འཚེ་བའི་ལས་ཀྱི་ཐོག་ནས་མི་ས་ཡ་ཉིས་བརྒྱ་ལྷག་གི་ཚེ་སྲོག་ཤོར་ཡོད་སྟབས། དམག་འཁྲུག་གི་དུས་རབས་ཤིག་བརྗོད་ཀྱི་ཡོད། འོན་ཀྱང་དུས་རབས་ཉེར་གཅིག་འདིའི་ནང་མི་ཚང་མས་བསམ་བློ་བཏང་སྟེ་ཐབས་ལམ་གསར་པ་ཞིག་གི་ཐོག་ནས་བྱམས་བརྩེ་ལྡན་པའི་སྤྱི་ཚོགས་ཤིག་བསྐྲུན་རྒྱུར་འབད་བརྩོན་བྱེ་བཞིན་ཡོད། ལྷག་པར་གནད་དོན་དེའི་ཐོག་དམིགས་བསལ་ཨ་རི་ནི་རྒྱལ་ཁབ་ཁག་གི་སྣེ་ཁྲིད་བྱེད་མཁན་ཞིག་ཡིན་པར་བརྟེན་བྱམས་བརྩེ་དང་ཞི་བདེ་ལྡན་པའི་འཛམ་གླིང་ཞིག་བསྐྲུན་ཐབས་སུ་སྔར་ལྷག་འབད་བརྩོན་གནང་རྒྱུ་ཧ་ཅང་གལ་ཆེན་པོ་ཆགས་ཡོད། དེ་བཞིན་ཆོས་ལུགས་དང་མ་འདྲེས་པའི་ཐོག་ནས་ཡ་རབས་སྤྱོད་བཟང་གི་སློབ་གསོ་སྤྲོད་རྒྱུ་ནི་གལ་འགངས་ཆེན་པོ་ཆགས་ཡོད། ཅེས་སོགས་ཀྱི་བཀའ་སློབ་སྩལ་འདུག
