༢༠༡༤ ཟླ་ ༢ ཚེས་ ༢༠ རེས་གཟའ་ཕུར་བུ།

༄༅། །བོད་མིའི་སྒྲིག་འཛུགས་ཀྱི་འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་ཕྱི་ལོ་ ༢༠༡༤ ཟླ་ ༢ ཚེས་ ༢༡ ནས་ཟླ་ ༣ ཚེས་ ༤ བར་ཉིན་གྲངས་བཅུ་གཉིས་རིང་ལ་དྭགས་སླེ་བྱང་ཁུལ་དུ་གཞུང་འབྲེལ་ཕྱོགས་ཕེབས་གནང་གཏན་འཁེལ་ཡོད།  དེ་ཡང་ཕྱི་ཚེས་ ༢༡ ཉིན་བཀའ་བློན་མཆོག་རྡ་ནས་ཅན་རྡི་གྷར་བརྒྱུད་ལྡི་ལིར་ཕེབས་འབྱོར་གྱིས་ཕྱི་དྲོ་ཆུ་ཚོད་  ༥ ཐོག་སྨན་པ་ས་བར་ཇིཏ་སིང་ཅ་ཊ Dr.sarabjit Singh Chadha, Director of the Union South-East Asia office,International Union against Tuberculosis and Lung Disease མཇལ་འཕྲད་གནང་རྒྱུ་དང་།  ཕྱི་ཚེས་ ༢༢ ཉིན་ལྡི་ལི་ནས་ལ་དྭགས་ཕེབས་འཐོན་གྱིས་ཕྱི་ཚེས་ ༢༣ ནས་ ༢༦ བར་ལ་དྭགས་བྱང་ཐང་ཧན་ལེ་དང་།  བཀག་གཞུང་གཉིས་ཀྱི་བོད་མི་རྣམས་ལ་བཙན་བྱོལ་བོད་མིའི་སྨན་བཅོས་ལྟ་སྐྱོང་ལས་གཞིའི་སྐོར་གོ་རྟོགས་སྤེལ་རྒྱུ་མ་ཟད།  འཕྲོད་བསྟེན་གནས་སྟངས་དཔྱད་ཞིབ་གནང་རྒྱུ།  ཕྱི་ཚེས་ ༢༦ ནས་ཕྱི་ཟླ་ ༣ ཚེས་ ༡ བར་བསོད་ནམས་གླིང་གཞིས་གྲོང་དང་པོ་ནས་བཅུ་གཉིས་ནང་གནས་སྡོད་བོད་མི་རྣམས་ལ་བཙན་བྱོལ་བོད་མིའི་སྨན་བཅོས་ལྟ་སྐྱོང་ལས་གཞིའི་སྐོར་གོ་རྟོགས་སྤེལ་རྒྱུ་དང་།  ལ་དྭགས་ནང་པའི་ཆོས་ཚོགས་ཀྱི་འགན་འཛིན་མཇལ་འཕྲད་གནང་རྒྱུ་ཡིན་འདུག  དེ་བཞིན་ལ་དྭགས་རི་ལྗོངས་ལྷན་ཁང་གི་ Ladakh Autonomous Hill Council འགན་འཛིན་མཇལ་འཕྲད་དང་ལ་དྭགས་བསོད་ནོར་བུའི་སྨན་ཁང་གི་འགན་འཛིན་རྣམས་དང་མཇལ་འཕྲད་གནང་རྒྱུ།  ཕྱི་ཚེས་ ༢ ཉིན་ལ་དྭགས་བསོད་ནམས་གླིང་གཞིས་མིའི་མཉམ་བོད་ཀྱི་ལོ་གསར་གཏོང་རྒྱུ།  ཕྱི་ཚེས་ ༣ ཉིན་ལ་དྭགས་ནས་ལྡི་ལིར་ཕེབས་འཐོན་གནང་རྒྱུ་དང་།  ཕྱི་ཚེས་ ༤ ཉིན་ལྡི་ལི་ནས་རྡ་སར་ཕྱིར་ཕེབས་གནང་ཡིན་འདུག