༢༠༠༩ ཕྱི་ཟླ་ ༨ ཚེས་ ༢༡ རེས་གཟའ་ཕུར་བུ།
༄༅། །ཕྱི་ལོ་ ༢༠༠༩ ཟླ་ ༦ ཚེས་ ༢༢ ཉིན་རྡོར་གླིང་དུ་བོད་དོན་རྒྱབ་སྐྱོར་ཚོགས་པ་གསར་འཛུགས་ཆེད་ཚོགས་འདུ་ཞིག་ཚོགས་པའི་སྐོར་འདི་གའི་གསར་འགོད་པར་སྤྱི་འཐུས་ཀིརྟི་སྒྲོལ་དཀར་ལྷ་མོ་ལགས་ནས་ངོ་སྤྲོད་གནང་གསལ། རྡོར་གླིང་ཁུལ་དུ་ཧི་མ་ལ་ཡའི་ནང་ཆོས་ཚོགས་པ་དང། རྒྱ་གར་རྒྱལ་ཡོངས་རྟ་དབང་ནང་ཆོས་ཚོགས་པ། དེ་བཞིན་སྐྱིད་སྡུག་བཅུའི་ཚོགས་པ་དང་། བོད་པ་ཁ་ཆེའི་ཚོགས་པ། ཡོ་མོ་ནང་ཆོས་ཚོགས་པ་བཅས་འདུག་ཀྱང་ད་བར་བོད་དོན་རྒྱབ་སྐྱོར་ཚོགས་པ་དངོས་སུ་འཛུགས་ཐུབ་པ་བྱུང་མི་འདུག ད་རེས་ང་དང་སྤྱི་འཐུས་དགེ་བཤེས་བེ་རི་འཇིགས་མེད་དབང་རྒྱལ་ལགས་གཉིས་རྡོར་གླིང་ས་གནས་སུ་བཅར་ཏེ་དེ་གའི་འགོ་འཛིན་ལ་ངེད་གཉིས་ས་གནས་ས་ཐོག་ལ་འབྱོར་རྐྱེན་ཚོགས་པ་དེ་དག་གི་མི་སྣ་དང་མཇལ་འདོད་ཆེན་པོ་ཡོད།
ས་གནས་འགོ་འཛིན་ནས་དེ་དག་སྐོང་ཚོགས་གནང་རོགས་ཞེས་རེ་སྐུལ་ཞུས་པ་ལྟར་མཐུན་འགྱུར་རོགས་རམ་གང་ལེགས་གནང་བྱུང་། ད་རེས་ཀྱི་ཚོགས་འདུར་གོང་འཁོད་ཀྱི་ཚོགས་པ་རྣམས་ཡོད་པ་རེད། འོན་ཀྱང་རྟ་དབང་ཚོགས་པ་དང་སྐྱིད་སྡུག་བཅུའི་ཚོགས་མི་ཚང་མེད་སྟབས་ངེད་རྣམས་ར་ཝ་ང་ལ་དང་། སྒང་ཏོག་སོགས་ཀྱི་ལྟ་སྐོར་གྲུབ་རྗེས་རྡོར་གླིང་དུ་བཅར་སྐབས་ས་གནས་འགོ་འཛིན་གྱི་གཙོས་ལས་བྱེད་རྣམས་ནས་གྲ་སྒྲིག་བྱས་ཏེ་ཚོགས་འདུ་དེ་ཚུགས་ཐུབ་པ་བྱུང་། ཚོགས་འདུ་ཚུགས་རིང་གྲོས་བསྡུར་ལྷུག་པོ་བྱུང་ནས་མཐའ་མ་ཚང་མས་ཚོགས་པ་དེ་འཛུགས་རྒྱུར་མོས་མཐུན་བྱུང་བ་རེད། ང་ཚོས་རྡོར་གླིང་ས་གནས་གལ་ཆེན་པོ་འདི་ལྟ་བུར་ནང་པའི་ཆོས་ཚོགས་མང་པོ་ཡོད་པ་དང་། ལྷག་པར་དུ་ང་ཚོ་སངས་རྒྱས་བསྟན་པའི་རྗེས་འཇུག་གཅིག་མཚུངས་ཡིན་པའི་ཐོག་ནས་ཆོས་དང་། རིག་གཞུང་ཚང་མ་འདྲ་པོ་ཆགས་ཡོད་པའི་ཁར། བོད་པའི་རྩ་དོན་ནི་འཚེ་བ་མེད་པ་དང་། དྲང་བདེན་ཡིན་པ་དེ་ལ་རྒྱབ་སྐྱོར་གནང་རྒྱུའི་གོ་སྐབས་ཤིག་ཀྱང་རག་གི་ཡོད་པ་དེ་ཁྱེད་རྣམས་ནས་ལེན་ཐུབ་པར་ང་ཚོས་ཐུགས་རྗེ་ཆེ་ཞུས་པ་ཡིན། དེ་བཞིན་ཚོགས་པ་གསར་འཛུགས་བྱུང་བ་དེར་ཚོགས་གཙོ་ཚོགས་གཞོན། དྲུང་ཆེ་སོགས་བསྐོ་གཞག་བྱས་ཡོད།
ཉིན་དེར་བོད་དོན་རྒྱབ་སྐྱོར་ཚོགས་པའི་ཚོགས་མི་ ༢༧ དངོས་སུ་ཕེབས་འདུག རྡོར་གླིང་ཁུལ་གནས་རྟ་དབང་དེ་དག་ནི་བོད་དོན་ལ་རྒྱབ་སྐྱོར་ཤུགས་ཆེ་གནང་མཁན་ཞིག་རེད་འདུག་ལ། དེ་ཉིན་ཡང་རྒྱབ་སྐྱོར་ཤུགས་ཆེ་བྱས་པ་མ་ཟད། ད་དུང་ཁོང་ཚོས་བོད་དོན་ཐོག་ལ་༸གོང་ས་མཆོག་ནས་བཀའ་གང་འདྲ་ཞིག་སྩལ་ཡང་སྲོག་ཚུན་ཆད་བློས་གཏོང་བྱེད་དགོས་བྱུང་ཡང་གྲ་སྒྲིག་ཨ་གསར་ཡོད། ཅེས་བློ་སྟོབས་ཆེན་པོས་གསུངས་བ་སོགས་ཀྱི་ངོ་སྤྲོད་མདོར་བསྡུས་ཤིག་གནང་བའི་གནས་བསྡུས་སུ།།
