༢༠༡༤ ཟླ་ ༢ ཚེས་ ༡༧ རེས་གཟའ་ཟླ་བ།
༄༅། །ཕྱི་ལོ་ ༢༠༡༤ ཟླ་ ༢ ཚེས་ ༡༤ ཉིན་གྱི་དགོང་དྲོ་ཆུ་ཚོད་ ༧ པའི་ཐོག་ཐེ་ཝན་ནང་རྟེན་གཞི་བྱས་པའི་ཀཱ་ཐོ་ཕི་ལོ་ཚོགས་པའི་གོ་སྒྲིག་འོག་ཐེ་པའེ་མང་ཚོགས་ཀྱི་ཚོགས་ཁང་ཆེ་མོའི་ནང་མང་ཚོགས་དང་སློབ་ཕྲུག་གི་ཁྲོད་བོད་ནང་གི་བོད་མིའི་རང་ལུས་མེར་སྲེག་སྐོར་གྱི་བགྲོ་གླེང་ལས་རིམ་ཞིག་ཚོགས་འདུག
དེ་ཡང་བགྲོ་གླེང་གི་ལས་རིམ་དེ་ལྟར་ཚོགས་དགོས་དོན་ནི། ཉེ་ཆར་ཐེ་ཝན་གྱི་སློབ་གྲྭ་ཆེ་མོའི་སློབ་མ་ཚོས་ལོ་ཉེར་ལྔའི་སྔོན་ཐེ་ཝན་མང་ཚོགས་ཀྱི་རང་དབང་ཆེད་རང་ལུས་མེར་སྲེག་གནང་མཁན་རྒྱལ་གཅེས་པ་ཀྲང་རུ་ཡི་ཆོད་སེམས་ལ་རྗེས་དྲན་ཞུ་སྐབས། སློབ་གྲྭ་ཆེ་མོའི་དགེ་རྒན་ཞིག་ནས་རང་ལུས་མེར་སྲེག་བྱ་སྤྱོད་ནི་འཇིགས་སྐུལ་བའི་བྱ་སྤྱོད་ཡིན་སྐོར་སྤེལ་བའི་གཏམ་བཤད་ལ་དགག་ལན་དང་། ཐེ་ཝན་གྱི་རྒྱལ་གཅེས་པ་ཀྲང་རུ་ཡི་ལགས་དང་དུས་ད་ལྟ་བར་དུ་བོད་མིའི་རང་དབང་ཆེད་རང་ལུས་མེར་སྲེག་གནང་མཁན་བོད་མིའི་ཚོའི་ལས་འགུལ་ནི་འཚེ་བ་མེད་པ་ཡིན་སྐོར་རྒྱ་རིགས་མང་ཚོགས་ཁྲོད་ལ་ངོ་སྤྲོད་ཆེད་གོ་སྒྲིག་གནང་བ་ཞིག་ཆགས་ཡོད་པ་དང་། ལྷག་པར་བགྲོ་གླེང་ལྷན་ཚོགས་དེར་བོད་ནང་རང་ལུས་མེར་སྲེག་སྐོར་ལ་ཐེ་ཝན་རྒྱལ་སྤྱིའི་ཉེས་ཡངས་ཚོགས་པའི་ཚོགས་མིས་ངོ་སྤྲོད་ཀྱི་གསུང་བཤད་གནང་ཡོད་འདུག