ཕྱི་ལོ་ ༢༠༡༤ ཟླ་ ༢ ཚེས་ ༡༠ རེ་གཟའ་ཟླ་བ།
༄
དེ་ཡང་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། རྒྱ་ནག་གཞུང་གིས་ ༢༠༡༣ ལོའི་ཟླ་ ༡༡ ཚེས་ ༢༣ ཉིན་ལྷ་སར་འཛིན་བཟུང་བྱས་པའི་རྒན་ངག་དབང་འཇམ་དབྱངས་ལགས། བཀག་ཉར་བྱས་ཏེ་འདྲི་གཅོད་སྐབས་གཅར་རྡུང་གིས་དམར་གསོད་བཏང་ཡོད་པ་མ་ཟད། སྔར་ལོའི་ཕྱི་ཟླ་ ༡༢ ནང་འབྲི་རུ་རྫོང་འབྲི་རུ་ཞང་ལྕམ་རམ་གྲོང་གི་ན་གཞོན་དཀོན་མཆོག་གྲགས་པ་ལགས་འཛིན་བཟུང་བཙན་འཁྲིད་བྱས་ཏེ། ༢༠༡༤ ལོའི་ཟླ་ ༡ ཚེས་ ༢༠ ཡས་མས་སུ་རྒྱ་གཞུང་ཉེན་རྟོག་པས་བཙོན་ཁང་ནང་ཉེས་རྡུང་ཚད་མེད་བཏང་སྟེ་དམར་གསོད་བཏང་རྗེས། ཕུང་པོ་ནང་མིར་རྩིས་སྤྲོད་བྱས་ཡོད་པ་དང་། ད་དུང་ཕུང་པོ་རྩིས་སྤྲོད་སྐབས་གནས་ཚུལ་དེའི་སྐོར་ཕྱིར་བསྒྲགས་མི་ཆོག་པའི་བཙན་བཀའ་བཏང་ཡོད་འདུག
དེ་བཞིན་སྔ་ལོའི་ཕྱི་ཟླ་ ༡༡ ཚེས་ ༢༣ ཉིན་འབྲི་རུ་རྫོང་ཚྭ་ཆུ་ཞང་ཨུ་ཐང་གྲོང་ནས་ཡིན་པའི་གྲྭ་སྐལ་བཟང་ཆོས་གླང་ལགས་ལྷ་སར་འཛིན་བཟུང་བྱས་ཡོད་པ་དང་། འདི་ལོའི་ཕྱི་ཟླ་ ༡ ནང་ཁོང་ལ་མི་མང་འདུ་འཛོམས་བྱེད་བཅུག་པའི་ཉེས་མིང་འོག་ལོ་ ༡༠ བཙོན་འཇུག་གི་ཁྲིམས་ཐག་བཅད་ཡོད་འདུག ཡང་སྔ་ལོའི་ཕྱི་ཟླ་ ༡༠ ཚེས་ ༣ ཉིན་འཛིན་བཟུང་བྱས་པའི་འབྲི་རུ་རྫོང་ཟླ་ཐང་ཞང་གཡང་ཐང་གྲོང་ཚོ་བཞི་པའི་རྡོ་རྗེ་གྲགས་རྩལ་ལགས་སུ། དེ་སྔོན་གནས་རི་ནགས་ལྷའི་གཏེར་ཁ་སྔོག་འདོན་ལ་བཀག་འགོག་བྱེད་མཁན་གཙོ་གྲས་ཡིན་སྐོར་བསྙད་འདོགས་བྱས་ཏེ་ལོ་ ༧ དང་། མི་གཞན་ལ་དངུལ་མང་པོ་བསྐྱི་གཡར་བྱས་པར་ལོ་ ༣ ། རྒྱ་གཞུང་གི་བཅའ་སྡོད་ལས་བྱེད་མི་སྣ་བཀག་འགོག་བྱས་པར་ལོ་ ༡ བཅས། ཁྱོན་བསྡོམས་ལོ་ ༡༡ ཁྲིམས་ཐག་བཅད་ཡོད་འདུག
ཕྱོགས་མཚུངས་སྔ་ལོའི་ཕྱི་ཟླ་ ༡༢ ནང་རྒྱ་གཞུང་གིས་ལྷ་སར་འཛིན་བཟུང་བྱས་པའི་འབྲི་རུ་རྫོང་ཚ་ཆུ་ཞང་རབ་བརྟན་དགོན་པའི་གྲྭ་ཚུལ་ཁྲིམས་སྙན་གྲགས་ལགས། ད་དུང་ཡང་གར་ཡོད་ཅི་བྱུང་གི་གནས་ཚུལ་ཅི་ཡང་མ་ཤེས་པར་ལྷག་ཡོད་འདུག ལྷག་པར་རྒྱ་གཞུང་གིས་ད་ལྟའི་ཆར་ཡང་འབྲི་རུ་རྫོང་དུ་དམག་མི་འགྲེམས་འཇོག་གིས་དམ་བསྒྲགས་སྔར་ལྷག་བྱས་དང་བྱེད་མུས་ཡིན་འདུག
