༢༠༡༤ ཟླ་ ༢ ཚེས་ ༦ རེས་གཟའ་ཕུར་བུ།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཨ་རིའི་ནང་རྟེན་གཞི་བྱས་པའི་ཚོང་ལས་སྒྲིག་འཛུགས་བསྟི་གནས་ཁང་ནས་ཇི་ལྟར་གསོལ་འདེབས་ཞུས་དོན་ལྟར་བཀའ་བཞེས་ཟབ་མོ་ཐོབ་སྟེ་ཨ་རིའི་རྒྱལ་ས་ཝ་ཤིང་ཊོན་དུ་ཆིབས་སྒྱུར་བསྐྱངས་ཏེ་གྲོས་ཚོགས་ཀྱི་ལས་བྱེད་དང་གཞོན་སྐྱེས་ཁག་གཅིག་ལ་བཀའ་སློབ་སྩལ་གཏན་འཁེལ་འདུག
དེ་ཡང་མགོན་པོ་གང་ཉིད་མཆོག་ཕྱི་ལོ་ ༢༠༡༤ ཟླ་ ༢ ཚེས་ ༡༨ ཉིན་ཨ་རིའི་རྒྱལ་ས་ཝ་ཤིང་ཊོན་དུ་༸ཞབས་སོར་འཁོད་རྗེས་ཕྱི་ཚེས་ ༡༩ ཕྱེད་ཡོལ་ཚན་པ་དེའི་ཉམས་ཞིབ་པ་དང་ཚོགས་མི། དེ་བཞིན་གྲོས་ཚོགས་ཀྱི་ལས་བྱེད་སོགས་ལ་འགོ་ཁྲིད་ཀྱིས་འཛམ་གླིང་ནང་ཡར་རྒྱས་གཏོང་ཐུབ་ཅེས་པའི་བརྗོད་གཞིའི་ཐོག་བཀའ་སློབ་དང་། ཕྱི་ཚེས་ ༢༠ ཉིན་ཚོང་ལས་ཚན་པ་དང་སེམས་དང་སྲོག་གི་བསྟི་གནས་ཁང་ཟུང་འབྲེལ་ཐོག་གོ་སྒྲིག་ཞུས་པའི་བཟང་སྤྱོད་དང་ལྡན་པའི་ཚོང་འབྲེལ་བྱེད་ཕྱོགས། དེ་བཞིན་འགྲོ་བ་མིའི་བདེ་སྐྱིད་སྐྲུན་ཐབས། ཕན་ཚུན་ཡིད་ཆེས་བློས་འགེལ་ཐོག་ནས་འཛམ་གླིང་འདིའི་ནང་སྤྱི་ཚོགས་ཀྱི་གནས་སྟངས་ཡར་རྒྱས་གཏོང་ཕྱོགས་ཀྱི་བརྗོད་གཞིའི་བགྲོ་གླེང་ཐོག་བཀའ་སློབ་སྩལ་རྒྱུ་ཡིན་འདུག
བགྲོ་གླེང་ལྷན་ཚོགས་དེར་ཨ་རིའི་ནང་གི་ཚོང་དོན་དང་ཆབ་སྲིད་མི་སྣ། ཤེས་ཡོན་ཅན། མཁས་དབང་སོགས་མང་དག་ཅིག་ནས་མཉམ་ཞུགས་གནང་འཆར་ཡོད་འདུག
