༢༠༠༩ ཕྱི་ཟླ་ ༨ ཚེས་ ༡༨ རེས་མིག་དམར།
༄༅། །འདི་གར་ཁུངས་ལྡན་གྱི་གནས་ཚུལ་འབྱོར་གསལ་ལྟར་ན། ལོ་སྔོན་མའི་ཨ་མདོ་རྔ་པ་ཁུལ་དུ་ཞི་བའི་ངོ་རྒོལ་ཤུགས་ཆེ་བྱུང་བ་དང་། སྐབས་དེེར་རྒྱ་མིའི་དྲག་ཆས་དམག་མི་སོགས་ནས་བོད་མི་ཞི་རྒོལ་བར་མེ་མདའ་བརྒྱབ་སྟེ་དམར་གསོད་བཏང་བའི་སྐབས་དེའི་གནས་ཚུལ་དང་བརྙན་དཔར་སོགས་དུས་ཐོག་ཏུ་ཕྱི་ཕྱོགས་སུ་ཁྱབ་བསྒྲགས་བྱུང་བ་སོགས་ལས། རྔ་པ་རང་སྐྱོང་ཁུལ་ཞེས་པའི་ཁོངས་གཏོགས་ཀྱི་མཛོད་དགེ་རྫོང་དང་། རྔ་པ་རྫོང་། རྐ་ཁོག་རྫོང་། འབར་ཁམས་རྫོང་ཁོངས་ཀྱི་བོད་མི་སྤྱི་དང་ལྷག་པར་ས་གནས་གཞན་དུ་འགྲོ་བསྐྱོད་བྱེད་བཞིན་པའི་ཚོང་པ་དང་ཞི་རྒོལ་གྱི་སྔ་རྗེས་སུ་ཕྱི་ཕྱོགས་སུ་གནས་མཇལ་དུ་བསྐྱོད་མྱོང་བ་སོགས་ལ་ཉེས་མེད་ཉེས་འཛུགས་ཀྱིས་དཀའ་ངལ་ཆེན་པོ་བཟོ་བཞིན་ཡོད་པ་དང་། ཕྱི་རྒྱལ་དུ་སྤུན་ཉེ་སོགས་མི་སུ་དང་འབྲེལ་བ་ཡོད་མེད་འདྲི་རྩད་བྱེད་པ། སྐྱབས་རྗེ་ཀིརྟི་རིན་པོ་ཆེའི་བཀའ་སློབ་དང་སྐུ་དཔར་ཡང་འཕྲོག་འཁྱེར་གྱིས་ཉེས་པ་འཛུགས་པ། སྲུང་མདུད་ཡོད་པ་ཚུན་ཆད་སུས་སྤྲད་ཡོད་མེད་ཀྱིས་འདྲི་ཞིབ་བྱེད་པ། ཐ་ན་ཕྱི་ལོག་ནས་བརྒྱུད་བསྐུལ་བྱས་པའི་དཔང་རྟགས་བྱས་ཚེ་དངུལ་འབོར་ཆེན་པོའི་བྱ་དགའ་སྤྲོད་རྒྱུའི་ཁྱབ་བསྒྲགས་བྱས་ཏེ་གཙོ་བོ་སྔ་ལོའི་ཞི་རྒོལ་དེ་ཕྱི་ཕྱོགས་ནས་བརྒྱུད་བསྐུལ་བྱས་པ་ཞིག་ཏུ་ཁག་དཀྲི་འདོགས་རྒྱུའི་ཆེད་ས་གནས་མི་མང་ཚོར་དཀའ་ངལ་ཤུགས་ཆེ་བཟོ་བཞིན་ཡོད་པའི་གནས་ཚུལ་ཐོན་འདུག
