༢༠༡༤ ཟླ་ ༡ ཚེས་ ༢༣ རེས་གཟའ་ཕུར་བུ།
༄༅། ཕྱི་ལོ་ ༢༠༡༤ ཟླ་ ༡ ཚེས་ ༢༢ ནས ༢༦ བར་ཉིན་གྲངས་ ༥ རིང་ཨོ་སི་ཊོ་ལི་ཡར་བོད་ཀྱི་དུས་སྟོན་ཐེངས་དྲུག་པ་འགོ་འཛུགས་ཀྱིས་དུས་སྟོན་ཉིན་གཉིས་པ་ཚེས་༢༣ ཉིན་གྱི་ལས་རིམ་ཐོག་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་ནས་མང་ཚོགས་ལ་བོད་ནང་གི་བོད་མིའི་གནས་སྟངས་སྐོར་ལ་གཏམ་བཤད་གནང་རྒྱུ་ཡིན་འདུག དེ་ཡང་དུས་སྟོན་དེ་བཞིན་ལོ་ལྟར་ཨོ་སི་ཊོ་ལོ་ཡར་གནས་བཞུགས་བོད་ཀྱི་གཞས་པ་དང་སྒྱུ་རྩལ་བ་བསྟན་འཛིན་ཆོས་རྒྱལ་ལགས་ཀྱིས་གོ་སྒྲིག་གནང་བཞིན་ཡོད་པ་དང་།དུས་སྟོན་ཐེངས་དྲུག་པ་དེ་ཕྱི་ལོ་ ༢༠༡༤ ཟླ་ ༡ ཚེས ༢༢ ཉིན་དབུ་འབྱེད་མཛད་སྒོར་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་མཆོག་གིས་གཙོས་ཨོ་སི་ཊོ་ལི་ཡའི་སྐུ་ཚབ་དོན་གཅོད་དྭགས་པོ་བསོད་ནམས་ནོར་བུ་ལགས་དང་། ཁུལ་དེའི་ཕྱོགས་འགལ་ཚོགས་པའི་གྲོས་ཚོགས་གོང་མའི་འཐུས་མི་ལྕམ་ལེ་རི་ས་ཝལ་ཀྲར་ལགས་སོགས་གནད་ཡོད་མི་སྣ་ཁག་གཅིག་ཆེད་ཕེབས་གནང་འདུག་པ་མ་ཟད། དུས་སྟོན་དེ་བཞིན་བྷི་རི་སི་བྷེན་ཁུལ་གྱི་གདོད་མའི་མི་རིགས་ (Ab origin people) ཞེས་པའི་ཚོགས་པའི་དཔོན་རིགས་ཤིག་གིས་དབུ་འབྱེད་གནང་འདུག སྤྱིར་བཏང་ཨོ་སི་ཊོ་ལི་ཡའི་ནང་བོད་ཀྱི་དུས་སྟོན་དེ་བཞིན་ཕྱི་ལོ་ ༢༠༠༨ ནས་འགོ་འཛུགས་ཀྱིས་ལོ་ལྟར་ཆད་མེད་ཚོགས་ཏེ་ཁུལ་དེའི་མི་མང་ལ་བོད་དོན་དྲིལ་བསྒྲགས་དང་། བོད་ཀྱི་རིག་གཞུང་འཁྲབ་སྟོན། བོད་དོན་སྐོར་བགྲོ་གླེང་སོགས་ཚོགས་ཀྱི་ཡོད་པ་དང་། ཐེངས་འདིའི་དུས་སྟོན་དབུ་འབྱེད་སྔོན་ Road to Peace with H.H.the Dalai Lama ༸གོང་ས་ཏཱ་ལའི་བླ་མ་མཆོག་དང་ལྷན་ཞི་བདེའི་ལམ་བུ། ཞེས་པའི་མགོན་པོ་གང་ཉིད་མཆོག་གིས་འཚེ་མེད་ཞི་བའི་མཛད་རྗེས་ཀྱི་གློག་བརྙན་ཞིག་མང་ཚོགས་ ༣༠༠༠ བརྒལ་བ་ཕེབས་ཡོད་པ་རྣམས་ལ་བསྟན་འདུག ལྷག་པར་ཕྱི་ཚེས་ ༢༣། ༢༤ བཅས་ ཉིན་གྲངས་གཉིས་ཀྱི་རིང་གི་དུས་སྟོན་སྐབས་བཀྲ་ཤིས་ལྷུན་པོའི་དགེ་འདུན་པ་རྣམས་ནས་མང་ཚོགས་ལ་ནང་ཆོས་ངོ་སྤྲོད་དང་སྒོམ་སྒྲུབ་བྱེད་ཚུལ། སྨན་བླའི་དཀྱིལ་འཁོར་ངོ་སྤྲོད། དེ་བཞིན་བོད་ཀྱི་རི་མོ་བ་ཀརྨ་ཕུན་ཚོགས་ལགས་ཀྱིས་བོད་ཀྱི་ཐུན་མོང་མ་ཡིན་པའི་ཡིག་གཟུགས་དང་ཐང་གའི་སྒྱུ་རྩལ་སྐོར་ངོ་སྤྲོད་གནང་རྒྱུ་ཡིན་འདུག
གཞན་ཡང་ཕྱི་དྲིལ་བཀའ་བློན་མཆོག་གིས་བོད་དོན་ངོ་སྤྲོད་སྤྱི་དང་། ཡང་སྒོས་བོད་ཀྱི་བུད་མེད་སྐོར་ལ་གཏམ་བཤད་གནང་རྒྱུ་མ་ཟད། ཕྱི་ཚེས་ ༢༥ ཉིན་བཀའ་བློན་མཆོག་གིས་དབུས་ཕྱོགས་བརྒལ་ཚོགས་པའི་གྲོས་ཚོགས་གོང་མའི་འཐུས་མི་ལྕམ་ལེ་རི་ས་ཝལ་ཀྲར་ལགས་དང་། ཨོ་སི་ཊོ་ལི་ཡའི་བོད་དོན་རྒྱབ་སྐྱོར་ཚོགས་པའི་གཞུང་འབྲེལ་བརྒྱུད་ལམ་འབྲེལ་མཐུད་པ་སྐྱིད་འཛོམས་ལགས་བཅས་ཆེད་ཕེབས་ཀྱིས་མང་ཚོགས་དང་ལྷན་ད་ལྟའི་བོད་ནང་གི་ཆེས་ཛ་དྲག་གནས་སྟངས་ཏརིཇྣག་རིནཔོཅཧེ༉ས་དང་འབྲེལ་བའི་བརྗོད་གཞི་ཁག་གཅིག་གི་ཐོག་བགྲོ་གླེང་གནང་རྒྱུའི་ལས་རིམ་ཡང་ཡོད་འདུག བསྟན་འཛིན་ཆོས་རྒྱལ་ལགས་ཀྱིས་གསུང་དོན། ད་རེས་ནི་བོད་ཀྱི་དུས་སྟོན་ཐེངས་དྲུག་པ་ཆགས་ཡོད། དུས་སྟོན་དེ་བཞིན་ལོ་ལྟར་གོ་སྒྲིག་ཞུས་དགོས་དོན་གཙོ་བོ་ནི། ཕྱི་ལོ་ ༢༠༠༨ ནས་བཟུང་བོད་ནང་གི་ཛ་དྲག་གནས་སྟངས་ལ་གཞིགས་པས་འཛམ་གླིང་སྤྱི་ལ་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་། སྐད་ཡིག་ངོ་སྤྲོད་ཡོང་ཆེད་ཡིན། ལྷག་པར་རྒྱ་ནག་གཞུང་གིས་ད་ཆ་ལག་བསྟར་བྱེད་བཞིན་པའི་མཁྲེགས་འཛིན་ཅན་གྱི་སྲིད་བྱུས་འོག་བོད་ནང་གི་ཛ་དྲག་གནས་སྟངས་སོགས་མང་ཚོགས་ལ་སྔར་ལྷག་གསལ་སྟོན་ཡོང་ཆེད་དམིགས་པ་ཡིན་སྐོར་གསུངས་ཡོད་པ་མ་ཟད། དེ་སྔོན་བོད་ཀྱི་དུས་སྟོན་འདི་བརྒྱུད་ནས་བྱུང་བའི་ཁེ་ཟང་རྣམས་བོད་ཕྲུག་ཁྱིམ་སྡེར་ཞལ་འདེབས་ཕུལ་ཡོད། ཅེས་གསུངས།
དེ་བཞིན་ཕྱི་དྲིལ་བཀའ་བློན་མཆོག་བྷེ་རི་སི་བྷེན་ནང་འཚོགས་བཞིན་པའི་བོད་ཀྱི་དུས་སྟོན་ཐེངས་དྲུག་པའི་སྐུ་མགྲོན་གཙོ་བོར་མགྲོན་འབོད་ལྟར་དབུ་བཞུགས་མ་གནང་གོང་ཕྱི་ཚེས་ ༢༠ ཉིན་ཁུལ་དེའི་རྒྱལ་ཡོངས་བརྙན་འཕྲིན་ཨེ་བྷི་སི་ཞེས་པའི་སྔ་དྲོའི་ལས་རིམ་ཐོག་བོད་དོན་དང་འབྲེལ་བའི་སྐོར་བཅར་འདྲི་དང་ལེན་གནང་སྟེ། བོད་ནང་གི་བོད་མིས་རང་ལུས་མེར་སྲེག་བཏང་བའི་རྒྱུ་རྐྱེན་གཙོ་བོ་རྒྱ་ནག་གཞུང་གིས་བོད་མིའི་ཐོག་འཛིན་པའི་དམ་བསྒྲགས་ཅན་གྱི་སྲིད་བྱུས་ལ་ཐུག་ཡོད་སྐོར་གསལ་སྟོན་གནང་བ་མ་ཟད། ཨོ་སི་ཊོ་ལི་ཡའི་གཞུང་ནས་རྒྱ་ནག་གཞུང་དང་ལྷན་ཚོང་འབྲེལ་གནང་བ་དང་དུས་མཚུངས་བོད་དང་རྒྱ་ནག་ནང་གི་འགྲོ་བ་མིའི་ཐོབ་ཐང་གནས་སྟངས་ཡར་རྒྱས་གཏོང་དགོས་པའི་རེ་སྐུལ་ཡང་ཞུས་འདུག
