༢༠༠༩ ཕྱི་ཟླ་ ༨ ཚེས་ ༡༨ རེས་མིག་དམར།
༄༅། །འདི་གར་ཁུངས་ལྡན་གྱི་གནས་ཚུལ་འབྱོར་གསལ་ལྟར་ན། བོད་ཀྱི་རྒྱལ་ས་ལྷ་སའི་ཤར་ཕྱོགས་སུ་ཡོད་པའི་མལ་དྲོ་གུང་དཀར་རྫོང་ཁོངས་སུ་ཕྱི་ལོ་ ༢༠༠༩ སྤྱི་ཟླ་ ༦ ཚེས་ ༢༠ ཉིན་རྒྱ་མི་གཏེར་ཁ་སྔོག་འདོན་བྱེད་མཁན་གྱིས་ཡུལ་ཆུ་བཀག་སྟེ་ཡུལ་མིར་ཞིང་ཆུ་གཏོང་མི་ཐུབ་པའི་དཀའ་ངལ་འཕྲད་རྗེས་ས་གནས་ཡུལ་མི་དང་རྒྱ་མི་གཏེར་ཁ་སྔོག་འདོན་བྱེད་མཁན་དབར་འཁྲུག་རྩོད་བྱུང་སྟེ་བོད་མི་གསུམ་ལ་
རྨས་སྐྱོན་ཚབས་ཆེ་ཕོག་པ་དང་། ཟླ་ ༦ ཚེས་ ༢༡ ཉིན་བོད་རང་སྐྱོང་ལྗོངས་ཀྱི་འབྲེལ་ཡོད་ལས་བྱེད་ས་གནས་སུ་ཡོང་སྐབས་མང་ཚོགས་རྣམས་ནས་དགོས་འདུན་བཏོན་པ་གཙོ་བོ་ནི་རྒྱ་མི་གཏེར་ཁ་འདོན་མཁན་རྣམས་ལུང་པ་དེ་ནས་ཕྱིར་ལོག་བྱེད་དགོས་པ་དང་། ཁོང་ཚོ་ང་ཚོའི་ལུང་པར་སླེབས་པ་ནས་བཟུང་འཐུང་ཆུ་དུག་ཆུར་གྱུར་བ་དང་། 
ཆུ་མིག་སྐམ་པ། རྩ་ཤིང་རི་དྭགས་རྩ་མེད་བཏང་བ། ཞིང་འབྲོག་གི་སྒོ་ཕྱུགས་སེམས་ཅན་ཆིག་སྟོང་ལྷག་དུག་ཆུ་བཏུངས་ཏེ་ཤི་ཡོད་པ་སོགས་ཀྱི་སྐོར་མང་ཚོགས་ཚོས་ངུ་བཞིན་ཞུ་འབོད་བྱས་ཡོད་སྟབས། དེ་མཇུག་ཉིན་གཅིག་གི་རྗེས་རྒྱ་མི་གཏེར་འདོན་པ་རྣམས་ས་གནས་ནས་ཕྱིར་ལོག་བྱས་རྗེས་རྫོང་ནས་ལས་དོན་ཚོགས་ཆུང་བཏང་སྟེ་ཁྱིམ་ཚང་རེ་རེ་བྱས་ཏེ་གཏེར་ཁ་སྔོག་འདོན་བཀག་འགོག་བྱ་མི་ཆོག་པ་དང་། རྗེས་སུ་གནས་ཚུལ་དེ་ལྟར་བྱུང་ཚེ་ཆབ་སྲིད་ཐོག་ཐག་གཅོད་བྱ་རྒྱུ་ལས་གཞན་འགྲོ་ས་མེད་པའི་སྐོར་འཇིགས་བསྐུལ་བྱས་ཡོད་པ་མ་ཟད། གཏེར་འདོན་ལས་གྲྭས་གནོད་སྐྱོན་བྱུང་བ་རྣམས་ལ་གུན་གསབ་སྤྲོད་རྒྱུ་སོགས་བཤད་ཡོད་ཀྱང་། ཉེ་ཆར་མལ་དྲོ་རྒྱ་མ་ཤང་ཁོངས་ཀྱི་རུ་ཁག་བཅོ་ལྔ་ཡོངས་རྫོགས་ནས་བསམ་འདུན་གཅིག་གྱུར་གྱིས་གཏེར་འདོན་ལས་གྲྭ་མཚམས་འཇོག་ཡོང་བའི་སྙན་ཞུ་ཞིག་མལ་དྲོ་གུང་དཀར་རྫོང་ལ་སླར་ཡང་ཕུལ་ཏེ་བརྡ་ལན་ཡོང་རྒྱུར་རེ་སྒུག་བྱས་ཡོད་ཀྱང་། རྒྱ་གཞུང་ནས་དེ་ལས་ལྡོག་སྟེ་ད་ལྟ་ས་གནས་དེར་དམག་མི་ཤུགས་ཆེ་བཀྲམ་ཡོད་པ་མ་ཟད། ཁ་དཔར་སོགས་འབྲེལ་ལམ་བྱ་རྒྱུ་དང་ཕྱི་ཕྱོགས་ནས་ས་གནས་དེར་ཡོང་བའི་འགྲུལ་པར་དམ་བསྒྲགས་ཆེན་པོ་བྱེད་བཞིན་ཡོད་འདུག
ད་ལྟའི་ཆར་ས་གནས་སུ་དམག་མིའི་དམ་བསྒྲགས་ཤུགས་ཆེ་བྱེད་བཞིན་པའི་ཐོག་ས་གནས་རྒྱ་གཞུང་ནས་དངུལ་དངོས་སྤྲད་དེ་གསོ་སྐྱོང་བྱས་པའི་མི་སྣ་ཧུར་བརྩོན་ཅན་ཁག་གཅིག་གིས་མང་ཚོགས་ལ་འཇམ་རྩབ་གཉིས་ཐོག་ནས་གཏེར་འདོན་ལས་གྲྭ་འགོ་འཛུགས་བྱེད་བཅུག་དགོས་པའི་སྐུལ་སློང་བྱེད་བཞིན་ཡོད་འདུག་པ་དང་། ས་གནས་མང་ཚོགས་ཚོས་གོ་སྐབས་དེ་དང་བསྟུན་ནས་རྒྱལ་སྤྱིའི་སྟེང་གི་ཁོར་ཡུག་ཚོགས་པ་དང་། འཕྲོད་བསྟེན་ལྟ་རྟོག་ཚོགས་པ་སོགས་ནས་ཁོང་ཚོའི་རེ་འབོད་དེ་དག་ལ་རྒྱབ་སྐྱོར་གྱིས་ས་གནས་མི་མང་ལ་ཕན་ཐོགས་མེད་པའི་གཏེར་འདོན་ལས་གྲྭ་དེ་གང་མགྱོགས་མཚམས་འཇོག་ཡོང་ཐབས་ལ་རེ་བ་ཆེན་པོ་བྱེད་བཞིན་ཡོད་འདུག
ཡིན་ནའང་མལ་དྲོ་གུང་དཀར་རྫོང་འབྲེལ་ཡོད་ཚན་པས་མང་ཚོགས་ཀྱི་སྙན་ཞུར་ད་བར་ཡ་ལན་གང་ཡང་སྤྲད་མེད་པའི་གནས་ཚུལ་ཐོན་བཞིན་འདུག
