༢༠༡༤ ཟླ་ ༡ ཚེས་ ༢ རེས་གཟའ་ཕུར་བུ།
༄༅། །འདི་གར་ཁུངས་ལྡན་གནས་ཚུལ་འབྱོར་དོན་ལྟར་ན། ཉེ་ཆར་རྒྱ་གཞུང་གིས་དྲག་གནོན་འོག་འབྲི་རུ་རྫོང་ཁོངས་སུ་ཡོད་པའི་དཔལ་ལྡན་འབྲོང་སྣ་དགོན་པ་སྒོ་རྒྱག་བཅུག་ཡོད་པ་དང་། དགོན་པའི་རིག་གནས་དགེ་རྒན་འཛིན་བཟུང་བྱས་ཡོད་འདུག ཉེ་ཆར་ཁམས་འབྲི་རུ་རྫོང་ཁོངས་སུ་ཡོད་པའི་ལོ་རྒྱུས་ཡུན་རིང་ལྡན་པའི་དཔལ་ལྡན་འབྲོང་སྣ་དགོན་པའི་ནང་དུ་ཛ་དྲག་གི་བཀག་སྡོམ་གནས་ཚུལ་འབྱུང་བཞིན་ཡོད་པ་མ་ཟད། ཕྱི་ལོ་ ༢༠༡༣ ཟླ་ ༡༡ ཚེས་ ༡༩ ཉིན། དགོན་པ་དེའི་རིག་གནས་རྒན་གྲྭ་སྐལ་བཟང་དོན་གྲུབ་ལགས་འཛིན་བཟུང་བྱས་ཡོད་འདུག
དེ་བཞིན། རྒྱ་གཞུང་གིས་གང་བྱུང་རྣམ་པ་འདྲ་མིན་དྲག་སྤྱོད་དང་མནར་གཅོད་ཚད་ལས་བརྒལ་བའི་སྒོ་ནས་དགེ་འདུན་པ་མང་པོ་འཛིན་བཟུང་དང་། དགོན་པའི་ཉེས་འགོག་སྒམ་ལ་སོགས་ཅ་དངོས་པོ་འཕྲོག་བཅོམ་དང་། ད་ལྟའི་ཆར་འབྲོང་སྣ་དགོན་དུ་གྲྭ་ཤག་ཚང་མ་སྒོར་ཤོག་བྱང་སྦྱར་ཏེ་སྒོ་རྒྱག་བཅུག་ཡོད་འདུག
ད་ལྟའི་ཆར་འབྲི་རུ་རྫོང་ཁོངས་སུ་བརྒྱུད་ལམ་ཡོངས་རྫོགས་དམ་བསྒྲགས་བཀག་སྡོམ་ཤུགས་ཆེན་པོ་བྱས་ཡོད་སྟབས། རྒྱ་གཞུང་གིས་གྲྭ་པ་རྣམས་འཛིན་བཟུང་བཀག་སྡོམ་དང་ཉེས་རྡུང་མནར་གཅོད་གཏོང་བཞིན་པའི་ཞིབ་ཕྲའི་གནས་ཚུལ་རིགས་གསལ་པོ་ཤེས་དཀའ་བའི་གནས་སུ་གྱུར་འདུག
