༢༠༠༩ ཕྱི་ཟླ་ ༨ ཚེས་ ༡༠ རེས་གཟའ་ཟླ་བ།
༄༅། །ཕྱི་ལོ་ ༢༠༠༩ ཟླ་ ༨ ཚེས་ ༥ ཉིན་༸གོང་ས་མཆོག་ནས་སུད་སིའི་གྲོང་ཁྱེར་ལུགས་བསམ་གྱི་མ་ལའི་པཀ་ཚོགས་ཁང་དུ་སྨན་བླའི་བཀའ་དབང་གི་སྔོན་དུ་དེར་འདུས་སུད་སི་བོད་རིགས་རྣམས་ལ་དམིགས་ཏེ་བཀའ་སློབ་ཕེབས་དོན། སུད་སིའི་ནང་དེང་སང་ང་ཚོ་བོད་རིགས་ནང་ལ་ (Drug) བཟི་སྨན་གྱི་རིགས་འཐེན་མཁན་དེ་འདྲའི་དཀའ་ངལ་ཡོད་པ་རེད་ཟེར་བ་དེ་དེང་སྐབས་གང་འདྲ་འདུག་གམ། ཕྲན་བུ་ཉུང་དུ་སོང་ཡོད་ན་འགྲིག་འདུག དཔེ་ཡག་པོ་རེད། ཉལ་ཐ་རིགས་འཐེན་རྒྱུ་དེ་འདྲ་ཁྱོན་ནས་བྱེད་རྒྱུ་མེད། མི་ཁ་ཤས་ནས་ངོས་ལ་སྐད་ཆ་འདྲི་གི་འདུག་ (Drug) འཐེན་རྒྱུ་འདིར་ངོས་ལ་བསམ་ཚུལ་ག་རེ་ཡོད་དམ་ཞེས་ཟེར་གྱི་འདུག བྱས་ཙང་ང་ཚོ་ནང་པའི་ངོས་ནས་བཤད་པ་ཡིན་ན་དུས་རྒྱུན་གཏན་ནས་འཁྲུལ་པའི་བློ་ཡོད་ཡོད་པ་རེད། དེ་ཐོག་ད་དུང་འཁྲུལ་སྐྱོར་བརྒྱབ་པ་ཡིན་ན་བྱབ་ཁྱོན་ནས་མི་འདུག ཅེས་ངོས་ནས་དེ་འདྲ་བརྗོད་ཀྱི་ཡོད། དཔེར་ན་ཆང་བཏུངས་ནས་ར་བཟི་པ་ནང་བཞིན་རེད། ང་ཚོས་ཤོད་ཀྱི་ཡོད་པ་ལྟར། ཁོ་ཐུག་པ་ར་བཟི་ཞེས་མིས་མཐོང་ཆུང་བྱེད་ཀྱི་རེད་མ་གཏོགས་ཁོས་ར་བཟི་ཤོད་ཀྱི་འདུག་ཡག་པོ་རེད་ཟེར་མཁན་སུ་གཅིག་མེད།
དེ་ཚོའི་གྲས་ཁྱོན་ནས་བྱེད་རྒྱུ་མེད། དེ་རིང་ཁ་སང་བོད་ནང་ལ་ཡང་ (Drug) བཟི་སྨན་འཐེན་མཁན་མང་དུ་མང་དུ་འགྲོ་གི་འདུག་ཅེས་ཤོད་མཁན་འདུག དཔེ་བློ་ཕམ་པོ་རེད། རྒྱ་གར་ནང་དུའང་གང་ཙམ་འདུག ཏོག་ཙམ་མང་དུ་འགྲོ་གི་ཡོད་པ་ལྟ་བུ་འདུག་པ་ཐབས་སྐྱོ་པོ་རེད། འདི་ག་སུད་སིའི་ནང་ཆང་འཐུང་བརྒྱབ་ནས་ཆང་ཚོད་མེད་བཏུངས་ Alcohol ཆང་རིགས་མ་འཐུང་བར་སྡོད་མི་ཐུབ་པའི་རྙོག་གྲ་དེ་འདྲ་གང་འདྲ་འདུག་གམ། དེ་རིང་ས་ཁང་བོད་ནང་གི་བོད་མི་རྣམས་ལ་དངུལ་ཏོག་ཙམ་ཞིག་བྱུང་བ་ཡིན་ན། མ་གཞི་སེམས་སྐྱིད་པོ་མེད་པ་རེད། དེ་འདྲའི་ཐོག་ནས་སྦིི་ཅུའུ་ཞེས་སྦི་རག་དེ་འདྲ་བཏུངས་དེ་ཚོའི་གྲས་ཁ་ཤས་ཡག་པོ་ཡོད་པ་མ་རེད་ཟེར་འདུག སྦི་ཅུའུ་བཏུངས་ནས་ནད་པ་ཆགས་ཀྱི་འདུག་ཟེར་མཁན་ཡོང་གི་འདུག ལྷག་དོན་ལྷ་སའི་ཉེ་འཁོར་དུ་སྦིི་ཅུའུ་འམ་སྦི་རག་བཟོ་གི་ཡོད་པ་རེད། ཟེར་གྱི་འདུག དེ་ཚོའི་གྲས་དེ་ཡག་པོ་མེད་པའི་སྐད་ཆ་ཤོད་ཀྱི་འདུག གང་ལྟར་དེ་རིང་ཁ་སང་ཆང་འཐུང་བརྒྱབ་པར་བརྟེན་མཆིན་པའི་ན་ཚ་ཕོག་པ་མང་པོ་ཞིག་ཡོང་གི་འདུག་ཟེར་དེ་འདྲ་བཤད་ཀྱི་འདུག་ལ་གོ་གི་ཡང་འདུག དཔེ་བློ་ཕམ་པོ་རེད། སྔོན་མ་ར་ཤག་མདའ་དཔོན་མི་ཡག་པོ་ཞེ་དྲག་ཡོད། ང་ཚོ་ནོར་གླིང་ནས་བྲོས་ཡོང་སྐབས་མཉམ་དུ་ཡོད་པ་རེད། རྗེས་ལ་འབྲས་ལྗོངས་སུ་ཁོང་རང་གི་ཁྱིམ་ཚང་གི་སྤན་མཆེད་དེ་འདྲ་ཡོད་པ་ཡིན་ཙང་། འབྲས་ལྗོངས་སུ་བསྡད་པ་རེད། རྗེས་སུ་ཉིན་གཅིག་ངོས་ཐུག་པར་སླེབས་བྱུང་། སྐབས་དེར་གདོང་པ་ནག་རྐྱང་རེད་འདུག་མཆིན་པ་ལ་སྐྱོན་ཤོར་འདུག་ཅེས་ཟེར་གྱི་འདུག ངོས་གཉིས་སྔོན་མ་ནས་ངོ་ཤེས་ཡིན་དུས་ངོས་ནས་ད་རེས་ཁྱེད་རང་གི་ན་ཚ་འདི་ཁྱེད་རང་གིས་བཟོས་པ་རེད། ཅེས་བརྗོད་པ་ཡིན། ཆང་རག་མང་པོ་བཏུངས་པའི་རྐྱེན་བྱས་ཏེ་མཐའ་མ་མཆིན་པ་འཕྲོ་བརླག་ཕྱིན་པ་རེད། དེ་ལྟར་ཉལ་ཐ་མཚོན་པའི་ཆང་དང་ཨ་རག མ་ཅང་གི་མཚོན་པའི་ཤོ་སྦག་གཉིས་ནི་དཔལ་འབྱོར་དང་དུས་ཚོད་ཆུད་ཟོས་གཏོང་བའི་གཞི་རྩ་ཡིན་ལ། དེ་བཞིན་གཟུགས་གཞི་བདེ་ཐང་ལའང་གནོད་ཚབས་ཆེ་ལ་གང་ལའང་ཕན་ཐོགས་མེད། དེ་མིན་སྒེར་གྱི་ལས་དོན་འཐུས་ཤོར་འགྲོ་རྒྱུ་སྨོས་མེད་ཁར་བོད་སྤྱི་པའི་ཐོག་ལའང་གནོད་ཚབས་ཆེ་བས་དེ་རིགས་བོད་མི་རྒན་གཞོན་ཚང་མས་སྤངས་བྱ་བྱེད་དགོས།
དེ་བཞིན་སེར་མོ་བའི་ཁྲོད་དུའང་དེ་མཚུངས་ཀྱི་བཀའ་སློབ་ཕེབས་དོན། ངོས་ནས་སྐབས་རེ་བརྗོད་ཀྱི་ཡོད། གྲྭ་བཙུན་མང་པོ་བཟོས་ནས་དགོས་པ་དེ་ཙམ་མི་འདུག ཡོད་པ་དེ་གྲྭ་བཙུན་གང་ཡིན་ཡང་སྡོམ་གཙང་སྤ་དག་པོ་ཞིག་བྱེད་དགོས། དེ་མིན་སྐྱ་མིན་སེར་མིན་ནང་དུ་སླེབས་སྐབས་མི་སྐྱ་ཡིན་པ་ལྟ་བུ་དང་ཕྱི་ལ་སླེབས་དུས་སེར་མོ་བ་ཡིན་པ་ལྟ་བུ་བྱས་ན་ཡག་པོ་མི་འདུག འབྲུག་པ་ཀུན་ལེགས་ཀྱིས་སྐྱ་མིན་སེར་མིན་དེ་དག་གི་སྡུག་པོ་མྱངས་ཀྱིས་ཞེས་གསུངས་ཡོད་པ་དེའི་འདྲ་བཟོ་རེད། བྱས་ཙང་ཡོད་པ་དེ་སྤ་དག་པོ་ཞིག་བྱས། ཡོང་ལ་མི་ཡོང་ཨུ་ཚུགས་བརྒྱབ་ན་དགོས་པ་མི་འདུག དེ་ནི་མི་རིགས་འཕེལ་རྒྱས་ལའང་གནོད་ཀྱི་འདུག དེ་འདྲ་ཡིན་དུས་འདི་ལྟ་བུ་འུག་ཐུག་ནས་ཤོད་དགོས་ཀྱི་འདུག ང་ཚོ་མི་རིགས་གྲངས་ཀ་ཉུང་དྲགས་པའི་སྐྱོན་ཡོང་གི་ཡོད། བོད་ནང་ལ་ཡིན་ནའང་རེད། རྒྱ་གར་ནང་དུ་ཡིན་ནའང་རེད། ཡོད་ཚད་རབ་བྱུང་ཕོ་མོ་བཟོས་ནས་སྤ་དག་པོ་མེད་པར་མང་པོ་བྱས་ཀྱང་དགོས་པ་ཨེ་ཡོད་ཅེས་བརྗོད་ཀྱི་ཡོད། ཅེས་དང་ད་དུ་ཁྱིམ་ཚང་ཕན་ཚུན་ཁང་པ་རྫིག་པོ་དང་དེའི་ནང་གི་འཛིན་ཆས་ལ་དང་དོད། འགྲན་བསྡུར་གྱི་མཚོན་རྒྱས་སྤྲོས་བྱས་ཏེ་རང་གི་བུ་ཕྲུག་མ་འོངས་བོད་ཀྱི་སོན་རྩ་ཚོའི་ཤེས་ཡོན་སློབ་སབྱོང་གི་རྒྱུན་གྲོན་ཐད་ལ་སེར་སྣ་བྱེད་ཀྱི་ཡོད། དེ་རིགས་རྩ་བ་ནས་བྱེད་རྒྱུ་མེད་ཅེས་སོགས་ཀྱི་རིན་བྲལ་བཀའ་སློབ་སྩལ་ཡོད།
