༢༠༡༣ ཟླ་ ༡༢ ཚེས་ ༡༡ རེས་གཟའ་ལྷག་པ།
༄༅། །འདི་གར་ཐེ་ཝན་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཐེ་ཝན་ནང་རྒྱ་ནག་སྐམ་སའི་ཡུལ་མི་ཡུལ་སྐོར་སྤྲོ་འཆམ་དུ་ཡོང་མཁན་ཉིན་རེར་མི་གྲངས་སུམ་སྟོང་བརྒལ་བ་ཡོད་པ་དང་། ཐེ་པེ་གྲོང་ཁྱེར་རང་དབང་ཐང་ཆེན་ནང་གི་ཅང་ཅེ་ཧྲེ་དྲན་གསོ་ཁང་ནི་ཡུལ་སྐོར་ལྟེ་གནས་གཙོ་བོ་ཞིག་ཆགས་ཡོད་པས། རྒྱ་ནག་མི་མང་ཚོས་༧གོང་ས་མཆོག་དང་བཙན་བྱོལ་བོད་མིའི་སྒྲིག་འཛུགས་ཀྱི་སྲིད་བྱུས། བོད་ནང་བོད་མིས་རང་ལུས་མེར་སྲེག་བྱེད་དགོས་དོན་སོགས་ཤེས་རྟོགས་དགོས་རྒྱུ་གལ་ཆེར་སོང་། ཐེ་ཝན་བོད་ཀྱི་སྐུ་ཚབ་དོན་གཅོད་ཁང་དང་། ས་གནས་བོད་རིགས་ཚོགས་པ་མཐུན་མོང་ནས་ཕྱི་ཟླ་ ༡༢ ཚེས་ ༩ ནས་ཚེས་ ༡༧ བར་དབུ་མའི་ལམ་ངོ་སྤྲོད་དང་། བོད་མིའི་རང་ལུས་མེར་སྲེག་ལ་རྗེས་དྲན་འགྲེམས་སྟོན་ཞེས་པ་ཞིག་བཤམ་སྟོན་གནང་ཡོད། ཐེངས་འདིའི་འགྲེམས་སྟོན་གྱི་ནང་དོན་གཙོ་བོ་ནི་བོད་ཀྱི་རྒྱལ་རབས་ལོ་རྒྱུས་དང་བོད་ནང་གི་གནས་སྟངས། བཙན་བྱོལ་སྒྲིག་འཛུགས། བོད་མིས་རང་ལུས་མེར་སྲེག་བཏང་དགོས་དོན།
དབུ་མའི་ལམ་ངོ་སྤྲོད་བཅས་ཡིན་པ་མ་ཟད། གུར་ཁག་གསུམ་གྱི་ཐོག་སྟེང་དུ་༧གོང་ས་མཆོག་གི་དབུ་མའི་ལམ་ནི་གཉིས་ཕན་དང་མི་རིགས་འདྲ་མཉམ་ཐོག་བོད་རང་བཙན་མ་རྩོད་པར། རྒྱ་ནག་གི་རྩ་ཁྲིམས་གཞི་བཟུང་བོད་མི་གཅིག་གྱུར་ཐོག་མིང་དོན་མཚུངས་པའི་མི་རིགས་ས་གནས་རང་སྐྱོང་དགོས་པ་དེ་ཡིན་ཞེས་རྒྱ་ཡིག་ཡིག་འབྲུ་ཤིན་ཏུ་ཆེ་བའི་ཕྲེད་དར་བཀལ་ཡོད་པ་དེས། རྒྱང་རིང་ནས་ནང་དོན་གསལ་པོ་མཐོང་ཐུབ་ཀྱི་ཡོད་པ་དང་། རྒྱ་ནག་ཡུལ་མི་ཚོས་འཇིག་སྣང་མེད་པར་དོ་སྣང་བྱེད་པར་ཡོང་མཁན་ཡང་མང་པོ་བྱུང་ཡོད།
གཞན་ཡང་ཚེས་ ༡༠ འགྲོ་བ་མིའི་ཐོབ་ཐང་ཉིན་མོའི་དགོང་དྲོ་རང་དབང་ཐང་ཆེན་ཐོག་ཐེ་སྡོད་བོད་མི་སེར་སྐྱ་མི་མང་དང་། བོད་དོན་རྒྱབ་སྐྱོར་གནང་མཁན་མི་གྲངས་ ༤༠ ལྷག་མཉམ་འཛོམས་ཀྱིས་འདི་ཚེས་ ༣ ཉིན་བོད་རྔ་བ་དམེ་རུ་མ་ཡུལ་ཚོའི་ཁྲོམ་གཞུང་དུ་རྒྱ་ནག་གཞུང་ལ་ངོ་རྒོལ་གྱིས་རང་ལུས་མེར་སྲེག་གནང་མཁན་རྒྱལ་གཅེས་པ་དཀོན་མཆོག་ཚེ་བརྟན་ལགས་ཀྱིས་དབུས་རྒྱལ་གཅེས་པ་ཕོ་མོ་རྣམས་ཀྱི་སྣང་བརྙན་མདུན་མར་མེ་བརྒྱ་ཚར་དང་། སྨོན་ལམ་གསུང་འདོན་གནང་ཡོད་པ་བཅས།།
